Bakı, 9 aprel (AZƏRTAC). Azərbaycan Milli Elmlər Akademiyası (AMEA) Rəyasət Heyətinin binasında AMEA Folklor İnstitutunun təşkilatçılığı ilə respublika “Dədə Qorqud günü”nə həsr olunmuş elmi sessiya keçirilmişdir.

AZƏRTAC xəbər verir ki, institutun direktoru, filologiya elmləri doktoru Muxtar İmanov tədbirin məqsəd və əhəmiyyətindən danışmışdır. Bildirilmişdir ki, sessiya qorqudşünaslığın 200 illiyi ilə bağlı tədbirlərə hazırlıq məqsədi ilə keçirilir.

M.İmanov demişdir ki, 1815-ci ildə qədim oğuz dastanı “Kitabi-Dədə Qorqud”un əlyazmasını ilk dəfə tanınmış alman şərqşünası, türkoloqu və diplomatı Haynrix F. fon Dits üzə çıxararaq tərcümə etmiş və bununla da, qorqudşünaslığın əsası qoyulmuşdur.

2015-ci ildə F. Dits tərəfindən “Kitabi-Dədə Qorqud”un nəşrinin və elm aləminə təqdim edilməsinin 200 ili tamam olur. Folklor İnstitutu tərəfindən təşkil edilən ənənəvi respublika “Dədə Qorqud günü” bu il məşhur alimin xatirəsinə həsr olunmuşdur.

“Kitabi-Dədə Qorqud”un həm şifahi, həm də yazılı ədəbiyyatımızın müqəddəs kitabı olduğunu deyən M.İmanov bildirmişdir ki, bu mövzuyla bağlı keçirilmiş bütün konfrans və sessiyaların materialları institut tərəfindən toplanaraq toplu şəklində dərc etdirilmişdir. Ənənə bundan sonra da davam etdiriləcəkdir.

AMEA Humanitar və İctimai Elmlər Bölməsinin akademik-katibi, akademiyanın müxbir üzvü, Bakı Slavyan Universitetinin rektoru Kamal Abdullayev rəhbərlik etdiyi ali təhsil müəssisəsi ilə Almaniyanın Yohannes Quttenberq Universiteti və Osvald fon Volkenşteyn Cəmiyyəti arasında 2008-ci ildən başlayaraq “Kitabi-Dədə Qorqud” və “Nibelunqlar haqqında nəğmə: Ortaçağ qəhrəmanlıq dastanlarında Şərq və Qərb” adlı 10 illik birgə layihənin həyata keçirilməsindən danışmışdır. Bildirilmişdir ki, iki ölkə arasında elmi və mədəni əlaqələrin inkişafına mühüm töhfə olan, Azərbaycan xalqının ədəbi abidəsi “Kitabi-Dədə Qorqud”un nəşrinin və elm aləminə təqdim edilməsinin 200 illiyinə həsr edilən silsilə tədbirlər ölkəmizdə 2015-ci ilədək davam edəcəkdir.

Tədbirdə “Oğuz elinin keşikçisi Bəkil”, “Kitabi-Dədə Qorqud”da at kultu”, “Dədə Qorqud oğuzlarının zamanı və həyat tərzi”, “Kitabi-Dədə Qorqud”un bəzi mübahisəli məqamları haqqında”, “C.Luis “Kitabi-Dədə Qorqud” haqqında” və digər mövzularda məruzələr dinlənilmişdir. Natiqlər qeyd etmişlər ki, “Kitabi-Dədə Qorqud”un əlyazmasını ilk dəfə üzə çıxarmış fon Ditsin adı nəinki alman türkoloji məktəbinin, həm də Azərbaycan filologiyasının unudulmaz simalarından birinə çevrilmişdir.