AMEA-da görkəmli dilçi-alimin yubileyi qeyd olunub
Bakı, 17 aprel, AZƏRTAC
AMEA-nın Nəsimi adına Dilçilik İnstitutunda görkəmli dilçi-alim, filologiya elmləri doktoru, professor, Əməkdar müəllim, Prezident təqaüdçüsü Cəfər Cəfərovun anadan olmasının 95 illik yubileyinə həsr edilmiş elmi tədbir keçirilib.
AZƏRTAC xəbər verir ki, tədbiri açan AMEA-nın prezidenti akademik İsa Həbibbəyli alimin Azərbaycan dilçiliyinin inkişafında mühüm xidmətlərindən bəhs edib. Bildirilib ki, professor Cəfər Cəfərov çoxcəhətli elmi yaradıcılığı ilə Azərbaycan dilçiliyinin əsas istiqamətlərinin müəyyənləşdirilməsində, dilçiliyin aktual problemlərinin araşdırılmasında və bu sahənin tədrisində böyük rol oynamış görkəmli alimlərdəndir.
Tədbirdə çıxış edən Milli Məclisin deputatı, Azərbaycan Yazıçılar Birliyinin üzvü, professor Əlibala Məhərrəmzadə alimin zəngin elmi irsindən bəhs edərək onun Azərbaycan filologiyasının inkişafına verdiyi töhfələri yüksək qiymətləndirib. Qeyd olunub ki, professor Cəfər Cəfərov Azərbaycan dilçiliyinin inkişafına mühüm töhfələr verib, gənc tədqiqatçıların formalaşmasında böyük rol oynayıb.
Yubiley tədbirində Azərbaycan Dövlət Pedaqoji Universitetinin Filologiya fakültəsinin dekanı dosent Könül Həsənova, Bakı Dövlət Universitetinin professoru Zahif Cəfərov, həmçinin dilçi və ədəbiyyatşünas-alimlər professor Cəfər Cəfərovun elmi yaradıcılığı, Azərbaycan dilçiliyinin inkişafına verdiyi töhfələr və formalaşdırdığı elmi ənənələr barədə fikirlərini bölüşüblər.
Dilçilik İnstitutunun direktoru professor Nadir Məmmədli çıxışında bildirib ki, professor Cəfər Cəfərov Azərbaycan dilçiliyində bir sıra fundamental tədqiqatların müəllifidir. Onun “Nitq hissələrində keçid prosesləri” (1983), “Müasir Azərbaycan ədəbi dilində inkarlığın ifadə vasitələri” (2000), “Nitq hissələrində keçid prosesləri və konversiya” (2009) monoqrafiyaları, eləcə də “Müasir Azərbaycan dilinin morfologiyası” və “Linqvistik təhlil nümunələri” kimi dərslikləri Azərbaycan dilçiliyinin mühüm elmi mənbələri hesab olunur. Alimin tədqiqatlarında müasir Azərbaycan ədəbi dilinin leksikologiya, semasiologiya, morfologiya və derivatologiya sahələri ilə bağlı mühüm nəzəri məsələlər araşdırılıb, xüsusilə nitq hissələri, onların qarşılıqlı əlaqələri və keçid prosesləri yeni metodoloji yanaşma əsasında təhlil edilib. Professor Cəfər Cəfərov Azərbaycan dilçiliyində nitq hissələrində keçid prosesləri və konversiya məsələlərinin elmi əsaslarla işlənməsində mühüm rol oynamış alimlərdən biridir.
Konfransda filologiya elmləri doktoru Baba Məhərrəmli “Cəfər Cəfərovun elmi və pedaqoji fəaliyyəti” mövzusunda məruzəsində alimin elmi yaradıcılığı ilə pedaqoji ustalığının vəhdət təşkil etdiyini, professorun nəzəriyyəni praktika ilə birləşdirərək dilçilik elminin tədrisində yeni standartlar müəyyənləşdirdiyini bildirib.
Professor Sayalı Sadıqova “Cəfər Cəfərovun yaradıcılığında morfologiyanın aktual problemləri” mövzusunda məruzəsində alimin tədqiqatlarının müasir dilçiliyə yeni baxış bucağı gətirdiyini deyib.
Yubiley tədbirində professor İlham Tahirov “Cəfər Cəfərovun yaradıcılığında nitq hissələrində keçid prosesi”, professor İsmayıl Kazımov “Cəfər Cəfərovun yaradıcılığında sintaktik tədqiqatlar” mövzularında məruzə ediblər. Qeyd olunub ki, Cəfər Cəfərov Azərbaycanın dilçilik elminin müxtəlif istiqamətlərində tədqiqatlar aparıb, pedaqoji fəaliyyəti ilə yanaşı, ana dilimizin çox mühüm elmi problemlərini tədqiq edib. Zəngin və əhatəli yaradıcılıq erudisiyası ilə fərqlənən alim filologiyamızın müxtəlif nəzəri məsələlərini araşdırıb. Həmçinin qeyd olunub ki, alimin “Müasir Azərbaycan ədəbi dilində inkarlığın ifadə vasitələri” adlı fundamental tədqiqatında inkarlıq anlayışı, onun qrammatik və məntiqi xüsusiyyətləri, eləcə də bu kateqoriyanın Azərbaycan dilində ifadə vasitələri geniş şəkildə araşdırılıb.
Tədbirin sonunda professor Cəfər Cəfərov Azərbaycan dilçiliyi elminin inkişafındakı xidmətlərinə görə fəxri fərmanla təltif olunub. İştirakçılar görkəmli alimi 95 illik yubileyi münasibətilə təbrik edərək ona möhkəm cansağlığı və yeni elmi uğurlar arzulayıblar.
Bölmənin digər xəbərləri
