AMEA Naxçıvan Bölməsində ötən ilin yekunları və qarşıda duran vəzifələr müzakirə edilib
Naxçıvan, 15 yanvar, AZƏRTAC
Ötən il AMEA Naxçıvan Bölməsinin əməkdaşları tərəfindən 8 mühüm elmi nəticə əldə olunub, 18 monoqrafiya, 19 kitab, 1 metodik vəsait, 462 elmi məqalə, 207 konfrans materialı, 12 tezis, ümumilikdə 719 elmi əsər nəşr edilib. Əsərlərdən 20-si Thomson Reuters indeksli olmaqla, ümumilikdə, 57 elmi məqalə yüksək impakt faktorlu jurnallarda işıq üzü görüb. Əsərlərə 522 istinad qeydə alınıb. Bölmədə iki seriya üzrə “Elmi əsərlər” və “Axtarışlar” jurnalının hər birinin 4 sayı nəşr olunub.
AMEA Naxçıvan Bölməsindən AZƏRTAC-ın Naxçıvan bürosuna bildirilib ki, bu faktları AMEA Naxçıvan Bölməsində Altıncı çağırış Naxçıvan Muxtar Respublikası Ali Məclisinin dördüncü sessiyasında qarşıya qoyulmuş vəzifələrə həsr edilmiş tədbirdə bölmənin sədri, akademik İsmayıl Hacıyev səsləndirib.
Akademik İsmayıl Hacıyev məruzəsində diqqətə çatdırıb ki, pandemiya dövrü qaydalarına əməl olunmaqla, bölmənin əməkdaşları elmi tədqiqatlarını davam etdirib, məqalələri müxtəlif jurnallarda dərc olunub, beynəlxalq və respublika səviyyəli konfranslara qatılıb, muxtar respublikanın ictimai həyatında fəal iştirak ediblər. 2020-ci ildə iki beynəlxalq səviyyəli qrant layihəsinin icrası uğurla davam etdirilib.
Bildirilib ki, bölmədə fəaliyyət göstərən laboratoriyalar üçün bəzi avadanlıqlar alınaraq komplektləşdirilib, bölmənin “Yaşıl aptek”i əsaslı təmir olunaraq istifadəyə verilib. Bölmənin həm elmi, həm də tətbiqyönümlü fəaliyyətindən söz açan akademik qeyd edib ki, son illər keyfiyyət göstəricilərində də müşahidə edilən artım elmə və elm adamlarına göstərilən qayğının nəticəsidir.
Məruzədə, həmçinin kadr hazırlığı məsələsi də diqqətə çatdırılıb. Qeyd olunub ki, Naxçıvan Muxtar Respublikası Təhsil Nazirliyi ilə birgə həyata keçirilən “Sabahın tədqiqatçıları” layihəsi də məhz gənc nəsildə elmə maraq yaratmaq, gələcəkdə elmi potensiallı insan kapitalının formalaşdırılmasında mühüm əhəmiyyətə malikdir. Alim muxtar respublika məktəbliləri üçün keçilən interaktiv və nümunəvi dərslərin, tələbələr üçün təşkil edilən elmi-praktik seminarların önəmini və ötən ildə bu sahədə əldə olunmuş uğurları tədbir iştirakçılarının diqqətinə çatdırıb.
“AMEA Naxçıvan Bölməsinin yaradılmasında əsas məqsəd Naxçıvanın tarixinin, ədəbi mühitinin, təbii ehtiyatlarının, bioresurslarının və elmin digər sahələrinin tədqiqinə xidmət etmək, Naxçıvanşünaslığın zənginləşdirilməsinə töhfə verməkdir”, - deyən İsmayıl Hacıyev bildirib ki, bu missiya 2020-ci ildə uğurla davam etdirilib.
Tədbirdə bölmənin Tarix, Etnoqrafiya və Arxeologiya İnstitutunun direktoru, AMEA-nın müxbir üzvü, professor Fəxrəddin Səfərli, İncəsənət, Dil və Ədəbiyyat İnstitutunun direktoru, AMEA-nın müxbir üzvü, professor Əbülfəz Quliyev, Təbii Ehtiyatlar İnstitutunun direktoru, AMEA-nın müxbir üzvü, professor Tofiq Əliyev çıxış edərək Qarabağ zəfərindən sonra Naxçıvanın “Şərqin qapısı” kimi öz missiyasını uğurla yerinə yetirəcəyinə əminliklərini ifadə ediblər.
Qeyd olunub ki, bölmənin hər bir əməkdaşı muxtar respublikada aparılan genişmiqyaslı işlərdə fəal iştirak etməli və bu inkişafa layiqli töhfəsini verməlidir.
Bölmənin digər xəbərləri
