Şuşa, 1 fevral, AZƏRTAC

Bu gün biz - Azərbaycanın Rus İcmasının nümayəndələri, eləcə də Azərbaycan Rus Gəncləri Assosiasiyasının təmsilçiləri ekofəallarımızı dəstəkləməkdən ötrü Laçın yoluna gəlmişik. 50 gündən çox davam edən aksiya başlanandan bəri Rus İcması ekofəalların, qeyri-hökumət təşkilatlarının təmsilçilərinin Azərbaycanın Qarabağ regionunda yataqların artıq 30 ildən çox müddətdir davam edən talanmasının qarşısını almaq tələblərini fəal dəstəkləyir.

Bu barədə AZƏRTAC-a müsahibəsində Azərbaycanın Rus İcması sədrinin birinci müavini Anastasiya Lavrina deyib.

“Təəssüf ki, Ermənistan İkinci Qarabağ müharibəsi başa çatandan sonra Azərbaycanın Qarabağ regionundakı yataqları talamaqda davam edir. Təbii ehtiyatların talanması artıq ekoloji terrora çevrilib. Buraya, işğaldan azad olunmuş ərazilərə gələn hər kəs 30 illik işğalın fəsadlarını, o cümlədən meşələrin yandırılmasını, mənbələrin talanmasını görə bilər. Xoşbəxtlikdən 44 günlük xilaskarlıq müharibəsindən sonra əvvəllər erməni işğalı altında olan torpaqlarda bunun qarşısını almaq bizə nəsib oldu. Lakin burada, Rusiya sülhməramlıları kontingentinin müvəqqəti yerləşdirildiyi zonada yataqların talanması davam edir, bu, hələ ki, baş verir. Buna görə də biz təbii ehtiyatların dağıdılmasının dayandırılması üçün fəal çıxış edirik. Laçın yolundan yalnız təyinatı üzrə - humanitar məqsədlər üçün istifadə olunmalıdır.

Burada olduğumuz halda, deyə bilərik ki, Laçın yolu humanitar yüklər üçün açıqdır. Bəzi adamlar guya burada mühasirə olması barədə yalan xəbərlər yaymaq istəyirlər. Bu informasiyalar həqiqətə uyğun deyil.

Biz həqiqətən istəyirik ki, bu dinc aksiyada iştirakımız Cənubi Qafqazda sülhün bərqərar olmasına xidmət etsin. Biz ümid edirik ki, beynəlxalq strukturlar və digər ölkələr, Avropa ölkələri Azərbaycanın Cənubi Qafqaz regionunda uzunmüddətli sülhün bərqərar olunmasına yönələn səylərini fəal dəstəkləyirlər”, - deyə A.Lavrina bildirib.

Qeyd olunub ki, Azərbaycanın Rus İcması 1993-cü ildə yaranandan bəri Azərbaycan Respublikasının hökumətinin, rəhbərliyinin çoxdan gözlənilən sülhün qurulmasına yönələn fəaliyyətini həmişə dəstəkləyib. “Azərbaycan Respublikasının xeyli etnik rus vətəndaşı var ki, onlar 44 günlük Vətən müharibəsində fəal iştirak ediblər. Onlar Azərbaycan Respublikasının ərazi bütövlüyünü qoruyub, başqa millətlərin nümayəndələri ilə çiyin-çiyinə torpaqlarımızı azad ediblər, çünki biz - vahid Azərbaycan xalqıyıq. Biz həmişə həmrəy olmuşuq, həmrəyik və həmrəy olacağıq ki, bizim fəaliyyətimiz multikultural, multietnik cəmiyyətin inkişafına yönəlsin”, - deyə A.Lavrina sonda vurğulayıb.