Anım Günü ilə əlaqədar tələbə-gənclər tərəfindən silsilə tədbirlər təşkil olunub
Bakı, 28 sentyabr, AZƏRTAC
27 Sentyabr - Anım Gününün 5-ci ildönümü ilə əlaqədar Azərbaycan Tələbə Gənclər Təşkilatları İttifaqı (ATGTİ) və üzv Tələbə Gənclər Təşkilatları (TGT) tərəfindən 23-30 sentyabr tarixlərini əhatə edən “Qürur və anım günü” həftəsi çərçivəsində silsilə tədbirlər keçirilir.
ATGTİ-dən AZƏRTAC-a bildirilib ki, həftə ərzində keçirilən ədəbi-bədii kompozisiyalar, videotəqdimatlar, diskussiyalar, sosial aksiyalar, idman və intellektual yarışlar gənclərin milli-mənəvi dəyərlərə bağlılığını və dövlətimizə sədaqətini bir daha nümayiş etdirib. Tədbirlər zamanı tələbə-gənclər şəhidlərimizin əziz xatirəsini böyük ehtiramla yad edib, onların qəhrəmanlıq yolunu qürurla xatırlayıblar.
Bakı və regionlarda fəaliyyət göstərən 50-dən çox ali və orta ixtisas təhsili müəssisəsində üzv TGT-lərin təşəbbüsü ilə “Vətən uğrunda: Qəhrəmanlıq, şəhidlik və gəncliyin cavabdehliyi”, “27 Sentyabr – Anım günü: Qəhrəmanların əziz xatirəsinə”, “Əbədi yaddaş”, “Qürur tariximiz”, “Zəfərə aparan yol” və digər mövzularda seminar və görüşlər reallaşdırılıb.
Azərbaycan Dövlət Pedaqoji Universitetində Gənclər Fondu, ATGTİ, “Böyük Qayıdış” Gənclər Təşkilatı və ADPU TGT-nin birgə təşkilatçılığı ilə keçirilən “Anım və qürur günü” tədbirində Vətən müharibəsi qaziləri, şəhid ailəsi, professor-müəllim heyəti və tələbələr iştirak ediblər.
Eyni zamanda, Azərbaycan Respublikasının Gənclər Fondunun dəstəyi və ATGTİ-nin təşkilatçılığı ilə Bayraq Meydanı ətrafında 1000-dən çox tələbənin iştirakı ilə “Xarıbülbül” fləş-mobu təşkil olunub. Anım Günü ilə əlaqədar olaraq paytaxtda yerləşən Zəfər Abidəsinə gənclər təşkilatları və Tələbə Gənclər Təşkilatlarının 2000-dən çox tələbə-gəncinin iştirakı ilə kütləvi yürüş təşkil olunub. Yürüşün məqsədi şəhidlərimizin müqəddəs xatirəsini böyük ehtiramla yad etmək, onların qəhrəmanlıq yolunu gənc nəslin yaddaşında daim yaşatmaq olub.
27 Sentyabr – Anım Günü bir daha sübut etdi ki, gənc nəsil şəhidlərin müqəddəs xatirəsini daim uca tutur, onların qəhrəmanlıq nümunəsini öz həyat amalında rəhbər seçir. Müzəffər Ali Baş Komandan, Prezident İlham Əliyevin rəhbərliyi ilə 44 günlük Vətən müharibəsində Ordumuzun şücaəti və xalqımızın birliyi torpaqlarımızın azadlığına yol açdı. Bu azadlıq uğrunda canından keçən şəhidlərin xatirəsinin anılması və onların qəhrəmanlığının yaddaşlarda əbədi yaşadılması mühüm bir amal olaraq qalacaq.
Bölmənin digər xəbərləri
