Ankarada Dünya Azərbaycanlılarının Həmrəyliyi Günü qeyd olunub

28.12.2014 [22:06]
Çap et
A⁺ A^-

İstanbul, 28 dekabr, AZƏRTAC

Ankarada 31 Dekabr - Dünya Azərbaycanlılarının Həmrəyliyi Günü və Yeni il münasibətilə bayram tədbiri təşkil olunub. Tədbirdə Türkiyədəki səfirliyimizin əməkdaşları, diaspor nümayəndələrimiz, elm və incəsənət xadimləri, qardaş ölkədə təhsil alan azərbaycanlı tələbələr və müxtəlif ictimai birliklərin əməkdaşları iştirak ediblər.

Azərbaycanın Türkiyədəki səfirliyindən verilən məlumata görə, bayram tədbirində çıxış edən səfirliyin təhsil müşaviri Nəcibə Nəsibova ümummilli lider Heydər Əliyevin təşəbbüsü ilə Dünya Azərbaycanlılarının Həmrəyliyi Gününün təsis olunmasından, azərbaycançılıq məfkurəsinin formalaşması istiqamətində həyata keçirilən siyasətin əhəmiyyətindən bəhs edib.

Azərbaycan Respublikasının Prezidenti İlham Əliyevin əlamətdar gün münasibətilə dünya azərbaycanlılarına müraciəti tədbir iştirakçılarının diqqətinə çatdırılıb.

Sonra bir qrup azərbaycanlı tələbəyə səfirliyin təşəkkürnamələri təqdim olunub.

Azərbaycanlı tələbələr geniş musiqi proqramı ilə çıxış ediblər.

Tədbir ziyafətlə davam etdirilib.

Sabir Şahtaxtı

AZƏRTAC-ın xüsusi müxbiri

İstanbul