Aqrar Sığorta Fondundan fermerlərə müraciət: Türkiyədəki yanğınlardan nəticə çıxarılmalıdır
Bakı, 5 avqust, AZƏRTAC
Aqrar Sığorta Fondu (ASF) kənd təsərrüfatı sektorunda fəaliyyət göstərən iş adamları və sahibkarlara müraciət edərək onları öz təsərrüfatlarını sığortalamağa və risklərdən qorumağa çağırıb.
Fonddan AZƏRTAC-a bildirilib ki, qonşu Türkiyədə baş verən yanğınlar təbiət hadisələri və digər zərərli halların hər an baş verə biləcəyini, bunun nəticəsində fermerlərin böyük itkilərlə üzləşəcəyini göstərir.
Belə ki, Türkiyədə iyulun sonundan başlayan yanğınlar təbiətlə yanaşı, aqrar sektora da böyük zərər vurub. Fəlakət ərazilərində istixanalar, heyvandarlıq təsərüfatları, əkin sahələri, arı ailələri və digər kənd təsərrüfatı obyektləri məhv olub.
Türkiyənin Kənd Təsərrüfatı Sığortaları Sisteminin (TARSİM) məlumatına görə, yanğınlarla əlaqədar olaraq indiyədək Adana, Osmaniyə, Antalya, Mersin, Muğla, Balıkesir, İzmir və Karamanda 210 sığorta hadisəsi qeydə alınıb. Yanğınlar nəticəsində təkcə istixanalara dəyən zərər 70 milyon TL civarındadır. Buna baxmayaraq, Türkiyədə yanğın bölgəsindəki istixanaların 88 faizi sığortalandığına görə, əksər istixana sahibi kompensasiya alacaq.
Bundan başqa, yanğınlar nəticəsində arı ailələri, xırdabuynuzlu və iribuynuzlu heyvanlarla bağlı sığorta hadisələri də qeydə alınıb. Hazırda TARSİM mütəxəssisləri fəlakət ərazilərində kəndləri gəzərək, təsərrüfatlara baxış keçirir və dəyən zərəri hesablayırlar. Bu obyektlərin əksəriyyəti sığortalandığına görə, onlara ödəniş veriləcək. Yanğınlar zamanı zərər çəkən fermerlərin bir hissəsi təsərrüfatlarını sığortalamadığından onlara dəyən zərər komspensasiya edilməyəcək.
Aqrar Sığorta Fondu bildirir ki, iqlim dəyişiklikləri, insan faktoru və digər səbəblərdən son illər Azərbaycanda da yanğınların sayı və miqyası artmaqdadır. Nəticədə təsərrüfatlara tamamilə gözlənilməz vaxtlarda və gözlənilməyən səbəblərdən zərər dəyə bilər: “Türkiyədə təsərrüfatını sığortalamayan sahibkarlar belə bir hadisənin baş verəcəyini gözləmirdilər, nəticədə böyük zərərə düşdülər. Bizim sahibkarlar bu vəziyyətdən nəticə çıxarmalıdırlar”.
Fond sahibkarları və şirkətləri dövlət dəstəyi ilə aqrar sığorta ilə təsərrüfatlarını və gəlirlərini sığortalamağa dəvət edir. Dövlət dəstəyi ilə aqrar sığorta elə əlverişli şərtlərlə təqdim edilir ki, fermerlər ciddi xərcə düşmədən, cüzi vəsait ödəməklə bütün bu risklərdən sığortalana bilərlər. “Aqrar sığorta üçün xərclənən vəsait dəyən zərərlə müqayisəyəgəlməz dərəcədə kiçikdir. Fermerlərimiz bunu nəzərə almalıdırlar”, - deyə Aqrar Sığorta Fondundan bildirilib.
Xatırladaq ki, Azərbaycanda dövlət dəstəyi ilə aqrar sığorta mexanizmi 2020-ci ilin noyabrından fəaliyyətə başlayıb. Aqrar sığorta vasitəsilə 14 növ bitki növü, südlük inəklər və balıqçılıq təsərrüfatları sığortalanır.
Aqrar sığota üzrə hesablanmış sığorta haqlarının 50 faizi dövlət tərəfindən ödənilir. 2021-ci ilin iyun ayından etibarən aqrar sığorta üzrə dəyən zərərlərə görə ödənişlərin verilməsinə başlanılıb.
Fermerlər aqrar sığorta haqlarını ASF-nin rəsmi internet səhifəsindəki bitkiçilik və heyvandarlıq kalkulyatorlarından istifadə etməklə hesablaya bilərlər.
Bölmənin digər xəbərləri
