Arif Əsədov: AFFA İcraiyyə Komitəsinin son qərarlarını futbolumuz üçün müsbət qiymətləndirmək olar
Bakı, 4 fevral, AZƏRTAC
“Qəbul olunan qərarlardan sonra istənilən halda çempionatın formatında dəyişikliklər baş verəcək. Dəyişikliklərin hansı istiqamətdə olacağını bilməsək də, qərarları futbolumuz üçün müsbət qiymətləndirmək olar”.
Bu sözləri AZƏRTAC-a açıqlamasında veteran futbolçu Arif Əsədov AFFA İcraiyyə Komitəsinin son qərarları barədə danışarkən deyib.
Mütəxəssis komandaların sayının 2025/2026-cı illər mövsümündən etibarən 10-dan 12-yə artırılacağı ilə bağlı verilən qərarın ölkə futboluna müsbət təsir göstərəcəyini bildirib: “Çox yaxşı qərardır. Uzun zaman idi ki, bu barədə müzakirələr gedirdi. Nəhayət qərar öz təsdiqini tapdı. Komanda sayının artmasından sonra çempionatda rəqabətin güclənməsini müşahidə edə bilərik. Böyük ehtimalla, ilk ildə səviyyə bir qədər aşağı olacaq. Amma kollektivlər yeni formata uyğunlaşdıqdan, keyfiyyətlərini artırdıqdan sonra daha maraqlı çempionat izləyəcəyik. Uyğunlaşma üçün də vaxt lazımdır. İclasda da bu qərarın inkişaf üçün verildiyi bildirilib. Bu, o demək deyil ki, sistem hər zaman belə işləyəcək. Sadəcə, futbolumuzun inkişafı üçün bu variantı da yoxlamaq lazımdır”.
O, legioner limitinin ləğvinə də münasibət bildirib: “Bununla bağlı müəyyən qaydalar var. Bu qaydalar yerli futbolçular üçün stimul rolunu oynayacaq. Balanslı şəkildə bölgü aparmaqla, yerli oyunçulara da şans yarana bilər. Matç zamanı meydana çıxacaq legionerlərin sayı artdıqca komandalar müəyyən məbləğdə rüsum ödəməli olacaqlar. Bu amil klubların büdcəsinə mənfi təsir göstərə bilər. Komandalar bunu itki kimi hesab edə bilərlər. Bu məqamı nəzərə alsaq, bir matçda meydana 11 əcnəbi futbolçu çıxaracaqlarını düşünmürəm. Çünki bu, əlavə xərcdir. Bəlkə də artıq meydanda legioner və yerli oyunçuların sayı bərabər olacaq. Rüsumun tətbiq edilməsi mənfi hal kimi görünsə də, digər məqamlar bunu balanslaşdırır. Çünki klublar xərcə düşməmək üçün yerli futbolçularımıza da şans vermək durumunda qalacaqlar”.
A.Əsədovun sözlərinə görə, yeni sistem avrokuboklar uğrunda mübarizəyə hazır olan komandaları da müəyyənləşdirəcək: “İndiyədək bütün klublarımız avrokuboklara vəsiqə qazanmaq üçün mübarizə aparırdılar. Amma belə olan halda mümkün deyil ki, 12 komandanın hər biri avrokubok üçün oynasın. Artıq yeni sistem sayəsində hansı kollektivlərin həm büdcə, həm də legionerlərin səviyyəsi baxımından Avropada çıxış etməyə hazır olduğu bilinəcək”.
Bölmənin digər xəbərləri
