AŞPA-NIN QIŞ SESSİYASININ GÜNDƏLİYİNƏ AZƏRBAYCANLA BAĞLI MƏSƏLƏ DAXİL EDİLMƏMİŞDİR
Yanvarın 23-də sessiya öz işinə başlamışdır. Günün birinci yarısında ayrı-ayrı komitə və qruplarda yığıncaqlar keçirilmişdir. Deputatlarımız müzakirə olunmuş məsələlərə öz münasibətlərini bildirmişlər.
Günün ikinci yarısında sessiya öz işini davam etdirmişdir. Yığıncağı aparmış sədr qış sessiyasının gündəliyini müzakirə etməzdən əvvəl, yeni seçilmiş azərbaycanlı deputatların mandatlarının təsdiqi məsələsini müzakirəyə çıxarmışdır. Ölkəmizə qarşı həmişə qərəzli mövqe tutmuş isveçrəli deputat Andreas Qross bu dəfə də ənənəsinə sadiq qalmış, noyabrın 6-da Azərbaycanda keçirilmiş parlament seçkisi zamanı guya pozuntulara yol verildiyi üçün deputatları Azərbaycan nümayəndə heyəti üzvlərinin mandatlarını təsdiq etməməyə çağırmışdır.
Nümayəndə heyətimizin rəhbəri A.Qrossun mövqeyinə qəti etirazını bildirmiş, məsələnin əvvəlcə monitorinq komitəsində müzakirə olunmasını təklif etmişdir.
Sessiya S.Seyidovun çıxışını nəzərə almış, məsələnin monitorinq komitəsində müzakirəsindən sonra, yığıncağın yanvarın 25-də keçiriləcək iclasında müzakirə etməyi qərara almışdır.
Sonra qış sessiyasının gündəliyi deputatların müzakirəsinə verilmişdir. Deputatlar AŞPA-nın sədr və üç müavininin seçilməsi, AŞPA-nın baş katibi vəzifəsinə yeni təyinat, Avropada su hövzələrinin yaxşılaşdırılması, Avropada mühacir qadınların vəziyyəti, Çeçenistanda insan hüquqlarının pozulması halları, kommunist rejimi cəmiyyətlərinin beynəlxalq səviyyədə pislənməsi, prezident seçkiləri ərəfəsində Belarusda vəziyyət, Avropa Şurasına üzv ölkələrdə gizli həbsxanaların araşdırılması, Avropanın iqtisadi inkişafı, Gürcüstanın Avropa Şurası qarşısında götürdüyü öhdəliklərin yerinə yetirilməsinin vəziyyəti və digər məsələləri müzakirə etməyi qərara almış, sessiyanın gündəliyinə Azərbaycanla bağlı məsələ daxil etməmişlər.
Hollandiyalı deputat Rene van der Linden səs çoxluğu ilə yenidən AŞPA-nın sədri vəzifəsinə seçilmişdir. Sessiya iştirakçıları AŞPA-nın vaxtı bitmiş baş katibi Bruno Xaylerin yaxşı işini qeyd etmiş, onun yerinə Mateo Sorinosun namizədliyini dəstəkləmişlər.
Sessiyanın sonunda bir çox məsələlərlə yanaşı, Ermənistanda Konstitusiyaya edilmiş dəyişikliklərlə əlaqədar noyabrın 27-də keçirilmiş referendumun nəticələri müzakirə edilmişdir. Bu məsələ ilə bağlı məruzə etmiş çexiyalı deputat Tomas Çupsa referendum zamanı çoxlu saxtakarlıqlara yol verildiyini, onun Avropa Şurasının tələblərinə uyğun keçirilmədiyini, hakimiyyətin səs verənlərə təzyiq göstərdiyini bildirmişdir.
Bununla da sessiya ilk iş gününü başa vurmuşdur.
Bölmənin digər xəbərləri
