Aşqarlar Kimyası İnstitutu Hindistan Kimya Texnologiyaları İnstitutu ilə əməkdaşlıq edəcək
Bakı, 10 avqust, AZƏRTAC
AMEA-nın akademik Əli Quliyev adına Aşqarlar Kimyası İnstitutu Hindistan Kimya Texnologiyaları İnstitutu Üzvi sintez və kimya prosesi departamentinin Təbii məhsullar və yaşıl kimya tədqiqat bölməsi ilə elmi əməkdaşlıq edəcək.
Aşqarlar Kimyası İnstitutundan AZƏRTAC-a bildirilib ki, bununla bağlı Hindistan Kimya Texnologiyaları İnstitutunun Təbii məhsullar və yaşıl kimya tədqiqat qrupunun rəhbəri Sadu Naqesvara elmi müəssisəyə müraciət edib: “Aşqarlar Kimyası İnstitutu alimlərinin son illər beynəlxalq səviyyədə yerinə yetirdiyi tədqiqatlar diqqətlə və maraqla izlənilir. Ümid edirik ki, institutla birgə beynəlxalq tədqiqat qrupu yaratmaq təklifimiz müsbət dəyərləndiriləcək”
Sadu Naqesvara qeyd edib ki, zərif üzvi və fizioloji fəal maddələrin sintezi və tətbiqi yollarının müəyyənləşdirilməsində qarşılıqlı əməkdaşlıq yüksək nəticələr verəcək və tərəflər üçün faydalı olacaq.
Xatırladaq ki, Hindistan Kimya Texnologiyaları İnstitutunun Təbii məhsullar və yaşıl kimya bölməsi heterotsiklik makromolekulların sintezi və tədqiqi sahəsində beynəlxalq layihələr həyata keçirib. Bu qrupun apardığı tədqiqatlar və əldə etdiyi elmi nəticələr dünyanın müxtəlif nüfuzlu jurnallarında silsilə məqalələr şəklində yayımlanıb.
Bölmənin digər xəbərləri
