QAN YADDAŞI
ASTARADA 20 YANVAR ŞƏHİDLƏRİNİN XATİRƏSİ EHTİRAMLA YAD EDİLMİŞDİR
Astara, 19 yanvar (AZƏRTAC). Qanlı 20 Yanvar faciəsinin 20 illiyi ilə əlaqədar Astara şəhərindəki Şəhidlər xiyabanında keçirilən mərasimdə azadlıq mücahidlərinin xatirəsi ehtiramla yad edilmişdir.
Tədbir iştirakçıları “Şəhidlər” abidə kompleksinin önünə gül dəstələri düzmüş, burada şəhidlərin ruhuna dualar oxunmuşdur.
Mərasimdə çıxış edən Astara Rayon İcra Hakimiyyətinin başçısı Mahir Quliyev 20 il əvvəl Qanlı Yanvar günlərində qanları ilə xalqımızın qəhrəmanlıq tarixinə parlaq səhifələr yazaraq şəhidlik zirvəsinə ucalan istiqlal mücahidlərinin xatiəsinin həmişə böyük məhəbbətlə anıldığını bildirmişdir. Bu böyük faciəyə hələ Moskva şəhərində yaşadığı dövrdə ilk etirazını bildirən və bu hadisəyə düzgün qiymət verən ümummilli lider Heydər Əliyevin söylədiyi “1990-cı il yanvarın 20-si Azərbaycanın tarixinə ən faciəli günlərdən biri, eyni zamanda xalqımızın qəhrəmanlıq səhifəsi kimi daxil olmuşdur” sözlərini diqqətə çatdırmışdır.
Tədbir rayon mədəniyyət evində davam etmişdir.
Mərasim iştirakçıları mədəniyyət evinin foyesində 20 Yanvar faciəsinin dəhşətlərini əks etdirən sərgi ilə tanış olmuş, “Qan yaddaşımız” sənədli filminə tamaşa etmişlər.
Rayonun bədii özfəaliyyət kollektivlərinin ifasında “Şəhidlik ən böyük zirvədir” mövzusunda ədəbi-bədii kompozisiya nümayiş etdirilmişdir.