“Ata, mənə bayraq alarsan” - Şəhid Ağa Hüseynlinin son istəyi VİDEO
Sabirabad, 28 sentyabr, Aydın Yavərzadə, AZƏRTAC
Vətənimizin azadlığı uğrunda canını fəda edən qəhrəmanlar sırasında İkinci Qarabağ müharibəsində şəhadətə ucalan Ağa Hüseynlinin də adı çəkilir. Ağanın 19 yaşı olmasına baxmayaraq, fizki qüvvəsi və istedadı onun kəşfiyyatçı əsgər kimi xidmət etməsinə imkan verirdi. Ağa da müharibənin ilk günündən düşmən təxribatının qarşısının alınması üçün döyüşlərə qoşulanlar sırasında yer alıb.
AZƏRTAC-ın bölgə müxbiri xəbər verir ki, Hüseynli Ağa Aydın oğlu 2001-ci il sentyabrın 7-də Sabirabad rayonu Moranlı kəndində dünyaya göz açıb. Hələ azyaşlı vaxtlarından vətənpərvərliyi ilə seçilib. Həqiqi hərbi xidmətə ruh yüksəkliyi ilə yollanıb.
Şəhidin atası Aydın Hüseynov övladı haqqında qürurla danışır. "Vətəninə bayrağına çox bağlı idi. Hələ məktəb illərindən bayrağa olan sevgisi hər birimizi heyrətləndirirdi. Bu sevgi onun fotolarında da öz əksini tapıb. Cəbhəyə yollanda məndən bir istəyi oldu. Dedi ki, mənə bayraq al gətir. Sözlə ifadə olunmayan bir sevgisi var idi Vətənə. Biz onunla hər zaman fəxr edirik”
“Bütün şəhidlərimizlə qürur duyuruq, onların sayəsində bu gün Vətənimiz azaddır. Şəhidlərimiz canlarını Vətənə fəda etməklə həm də gələcək nəsillərə örnək oldular. Onlar daim Azərbaycan xalqının xatirində qəhrəman kimi yaşayacaq" deyə şəhid atası bildirib.
Şəhidin anası Səadət Hüseynova Ağa haqqında danışarkən gözləri dolsa da, onunla fəxr etdiyini deyir: “Ağa uşaqlıdan mərdliyi ilə seçilirdi. Azyaşlı olmasına baxmayaraq, yaşıdlarına örnək olurdu. Həqiqi hərbi xidmətə yollananda sevincinin həddi hüdudu yox idi və öz sevinci ilə bizləri qürurlandırırdı. Onun Vətənə olan sevigisi valideynlərinə bəslədiyi sevgi qədər müqəddəs idi. Onunla hər zaman fəxr etmişik”
Şəhidin bacısı Nuranə Hüseynzadə isə deyir ki, ailənin son beşiyi olan Ağa çox mehriban idi: "Böyükdən kiçiyə hərkəs onu çox sevirdi. Yaş fərqimiz az olduğu üçün bütün arzu-istəkləri barədə mənə danışardı. Hələ uşaq vaxtlarından onun bayrağa, Vətənə olan sevgisinə həsəd aparırdım. Hərbi xidmətə yollanacağı günü səbirsizliklə gözləyirdi. Məktəb illərində cudo idman növü üzrə bir çox nailiyyətləri var idi. Hərbi xidməti dövründə könüllü olaraq kəşfiyyat bölməsini seçmişdi və həmin vaxt bizimlə əlaqə saxlayanda öz arzusuna çatdığı səsindən bilinirdi. Döyüşlərdə də kəşfiyyatçı kimi bir çox tapşırıqların öhdəsindən gəldi və qəhrəmancasına şəhidlik zirvəsinə ucaldı. Biz onunla hər zaman fəxr edəcəyik”.
Qeyd edək ki, Ağa Hüseynli İkinci Qarabağ müharibəsi zamanı Füzuli və Cəbrayıl istiqamətlərində gedən döyüşlərdə şücaəti ilə seçilib. Oktyabrın 5-də Füzuli istiqamətində gedən gərgin döyüşlər zamanı qəhrəmancasına şəhid olub. Oktyabrın 8-də isə doğulub boya başa çadığı Moranlı kəndində dəfn edilib. Ölümündən sonra “Vətən uğrunda” və “Füzuinin azad olunmasına görə” medalları ilə təltif edilib.
Bölmənin digər xəbərləri
