ATƏT-İN PARLAMENT ASSAMBLEYASININ SƏDRIREGİONA SƏFƏR EDƏCƏK
Milli Məclisin ATƏT-in Parlament Assambleyasındakı nümayəndə heyətinin rəhbəri, iqtisadi siyasət daimi komissiyasının sədri Səttar Səfərov AZƏRTAC-ın müxbirinə demişdir ki, ATƏT PA-nın sədri Corc Brus özünün Ermənistan-Azərbaycan, Dağlıq Qarabağ münaqişəsi üzrə məruzəçisi Qoran Lenmarkerin regiona səfərinin nəticələri ilə bağlı çıxışından sonra bu qənaətə gəlmişdir. Lenmarker qurumun qış sessiyasındakı qısa hesabatında Ermənistanın Azərbaycan torpaqlarını işğal etməsi faktını təsdiqləmiş, bu ərazilərin tezliklə azad olunmasının, minalardan təmizlənməsinin və məcburi köçkünlərin doğma yurd-yuvalarına qaytarılmasının vacibliyini vurğulamışdır. O, ATƏT-in Minsk qrupunun fəaliyyətini də tənqid etmişdir. Məruzəçinin çıxışından sonra Corc Brus Azərbaycan nümayəndə heyəti ilə görüşmüş və münaqişənin həlli yollarını müzakirə etmək məqsədi ilə regiona səfər edəcəyini bildirmişdir.
Səttar Səfərov onu da demişdir ki, cənab Lenmarker regiona səfəri ilə bağlı geniş məruzəni təşkilatın bu ilin iyul ayında Edinburq şəhərində keçiriləcək yay sessiyasında edəcəkdir. Çox güman ki, orada ATƏT-in Minsk qrupunun hesabatı da dinlənilsin.
Azərbaycan nümayəndə heyəti Minsk qrupunun fəaliyyətinin müzakirəyə çıxarılmasına çalışacaqdır.
Bölmənin digər xəbərləri
