AVROPA BİRLİYİ DÖVLƏT VƏ HÖKUMƏT BAŞÇILARININ ZİRVƏ TOPLANTISI BAŞA ÇATMIŞDIR

19.06.2004 [14:14]
Çap et
A⁺ A^-

AZƏRTAC-ın Almaniyadakı xüsusi müxbiri xəbər verir ki, iyunun 18-də Avropa Birliyinin 25 üzv ölkəsinin dövlət və hökumət başçılarının Brüsseldə keçirilən zirvə toplantısı başa çatmışdır. Zirvə toplantısının iştirakçıları Avropa Konstitusiyasının layihəsinin düzəlişlər və əlavələrlə bütövlükdə təsdiqinə nail olmuşlar. Layihə öncə AB üzvü 25 dövlətin parlamentlərində və ümumxalq referendumunda təsdiqini tapandan sonra, 2007-ci ildən gec olmayaraq, qüvvəyə minməlidir.

AB dövlət və hökumət başçıları Avropa Konstitusiyasının mətnində iclaslara dair gələcək səsvermə prosedurlarının dəqiq mexanizmlərinin müəyyənləşdirilməsində ümumi məxrəcə gəlmişlər. Gələcəkdə hər hansı bir məsələnin təsdiqindən ötrü üzv dövlətlərin 55 faizinin, AB məkanı əhalisinin isə 65 faizinin səs verməsi, səsvermədə yetərsay üçün AB-nin 25 üzvündən azı 15 ölkənin iştirakı mütləq prosedur kimi təsdiq olunmuşdur.

Avropa Komissiyasının səlahiyyət müddəti başa çatmış sədri Romano Prodini əvəz edəcək namizədin irəli sürülməsi, müzakirəsi və təsdiqi məsələsi kəskin debatlara səbəb olduğundan təxirə salınmışdır. Dövlət və hökumət başçıları Avropa Komissiyasının sədrini seçmək üçün 14 gündən gec olmayaraq, növbədənkənar zirvə toplantısı keçirmək qərarına gəlmişlər.

Zirvə toplantısı Xorvatiyanın Avropa Birliyi üzvlüyünə namizədlik statusunu təsdiq etmişdir.