AVROPA BİRLİYİ KOMİSSİYASINDA YENİ VƏZİFƏ VƏ SƏLAHİYYƏTLƏR MÜƏYYƏNLƏŞDİRİLMİŞDİR

13.08.2004 [12:41]
Çap et
A⁺ A^-

AZƏRTAC-ın xüsusi müxbiri Berlindən xəbər verir ki, Avropa Komissiyasının avqustun 12-də Brüsseldə keçirilən toplantısında Komissiyanın yeni sədri Xose Manuel Barroza vəzifə və səlahiyyət bölgüsü aparmış, rəhbərlik edəcəyi qurumun strukturunu elan etmişdir.

Avropa Birliyinin genişləndirilməsi səlahiyyətlərini icra edən almaniyalı Günter Ferhoygen sənaye və iqtisadiyyat, ingiltərəli Peter Mandelson ticarət, niderlandlı Neeliye Kroes daxili bazara nəzarət, ispaniyalı Joakvin Almuniya valyuta və qiymətli kağızlar, avstriyalı Benita Ferrero-Valdner xarici siyasət, danimarkalı Mariann Fişer Boel kənd təsərrüfatı və aqrar sənaye, maltalı Yoe Borq balıq təsərrüfatı, litvalı Daliya Qrubauskayte büdcə məsələləri, polşalı Danuta Hübner AB regionlarında fondlar üzrə bölmələrin komissarları təyin olunmuşlar.

İtaliya nümayəndəsi ədliyyə, fransa nümayəndəsi nəqliyyat məsələləri üzrə komissarlar elan olunmuşlar.

İsveçrəli Marqot Vallştrom AB Komissiyası sədrinin müavini təyin edilmişdir. Ona AB Komissiyasının Avropa Parlamenti və AB-nin Nazirlər Şurası ilə münasibətlərini tənzimləmək səlahiyyəti həvalə edilmişdir.

Avropa Birliyi Komissiyası göstərilən tərkibdə 2004-cü il noyabrın 1-dən etibarən fəaliyyətə başlayacaqdır.