Avropa İttifaqı zəlzələdən sonra Əfqanıstana ilk humanitar yardımını göndərib
Bakı, 31 oktyabr, AZƏRTAC
Oktyabrın 7-də baş verən zəlzələlərlə əlaqədar Avropa İttifaqının (Aİ) yaratdığı humanitar hava körpüsü vasitəsilə Əfqanıstana 92 ton humanitar yardım tədarük edilib.
AZƏRTAC xəbər verir ki, Aİ Komissiyasının məlumatında deyilir: “Oktyabrın 7-də Əfqanıstanın qərb hissəsində baş verən bir sıra zəlzələlərdən sonra, bu gün Aİ-nin ilk humanitar təyyarəsi Herata enib və zəlzələ nəticəsində zərər çəkmiş əhaliyə yardım məqsədilə 92 tonluq zəruri ləvazimat çatdırıb”.
Yaxın vaxtlarda Brindizi və Dubaydan Herat və Kabilə ikinci və üçüncü reyslərin təşkil edilməsi planlaşdırılır.
Oktyabrın 7-də Əfqanıstanda ilk zəlzələ baş verdikdən sonra Aİ ölkəyə humanitar yardım paketini təsdiqləyib. Həyata keçirilən və planlaşdırılan uçuşlarla birgə, Aİ-nin güclü zəlzələ ilə bağlı göstərdiyi dəstəyin ümumi məbləği 4,5 milyon avro təşkil edəcək.
Qeyd edək ki, təbii fəlakət nəticəsində Əfqanıstan ciddi itkilərə məruz qalıb, minlərlə insan ev-eşiyini itirib, tibb müəssisələri və məktəblər dağılıb, zəlzələ ərazilərindəki infrastruktura ciddi ziyan dəyib.
Bölmənin digər xəbərləri
