AVROPA ÖLKƏLƏRİNDƏKİ AZƏRBAYCAN CƏMİYYƏTLƏRİ KONFEDERASİYASI YARADILACAQDIR
- “Biz vətəndən uzaqlarda yaşasaq da, özümüzü Azərbaycan Respublikasının ayrılmaz hissəsi sayırıq. Cəmiyyətimizin üzvləri və İsveçdə yaşayan əksər azərbaycanlılar vətənimizin qayğı və problemlərindən xəbərdardırlar. Ermənilər torpaqlarımıza göz dikməklə yanaşı, xalqımıza qarşı əsl informasiya müharibəsi elan etmişlər. Lakin biz də onların qarşısında aciz deyilik. Yeni yaratdığımız Azərbaycan saytı xalqımızın tarixi, mədəniyyəti, bu günü barədə geniş məlumatlar yayır.
Avropa ölkələrində müxalifət qüvvələrini dəstəkləyən cəmiyyətlər də mövcuddur. Onlar bizi Azərbaycan dövlətinə sadiqlikdə təqsirləndirirlər. Bizim onlara cavabımız isə Avropa azərbaycanlılarının konfederasiyasını yaratmağımız olacaqdır. Avropa ölkələrində yaşayan, dövlətçilik, vətənçilik, azərbaycançılıq ideyalarına sadiq həmvətənlərimizin birliyinin yaradılması istiqamətində işlər görürük. Bilirəm ki, bu günədək etdiklərimiz kifayət deyildir. Azərbaycanın Avropa ölkələrində, o cümlədən İsveçdə layiqincə təmsil olunması üçün hələ çox işlər görməliyik. Vətənimizin bu gün qarşılaşdığı çətinliklər o qədər çoxdur ki, xaricdə yaşayan hər bir azərbaycanlı ona öz yardımı ilə dəstək verməlidir. Mən bu gün İsveçdə yaşayan azərbaycanlılar adından inamla deyirəm ki, biz vətənimizin ali məqsədləri üçün Azərbaycan hökuməti ilə birlikdə çalışacağıq”.
Bölmənin digər xəbərləri
