Azərbaycanda səfərdə olan Avropa Şurası Parlament Assamleyasının sədri lord Rassel Conston sentyabrın 14-də Şəhidlər xiyabanını ziyarət edərək, ölkəmizin azadlığı və ərazi bütövlüyü uğrunda canlarından keçmiş cəsur Azərbaycan övladlarının xatirəsini ehtiramla yad etmişdir.

         Xatirə kompleksinin ziyarəti mərasimində qonağı Milli Məclis sədrinin müavini Ziyafət Əsgərov  müşayiət edirdi.

                                 X            x           X

        Sentyabrın 14-də Azərbaycan Respublikasının xarici işlər naziri Vilayət Quliyev Avropa Şurası Parlament Assambleyasının sədri lord Rassel Constonu qəbul etmişdir.

        Görüş zamanı Azərbaycanın Avropa Şurası iləəməkdaşlığı əsas müzakirə obyekti olmuşdur.

        Vilayət Quliyev Azərbaycanın Avropa Şurası Parlament Assambleyasındakı nümayəndə heyətinəlazımi şərait yaratdığı üçün lord Rassel Constona öz təşəkkürünü bildirdi və cənab Constonun fəaliyyətinin əsl parlamentarizm ənənələrindən qaynaqlandığını vurğuladı. Nazir Azərbaycanın Avropa Şurasına bərabər hüquqlu üzv olmasını ölkəmizin suverenliyinin möhkəmləndirilməsi və yeni cəmiyyətin inkişafı baxımından müstəsna addım kimi qiymətləndirdi.

        Lord Rassel Conston regiona səfərinin məqsədini açıqlayaraq, AŞ-yə üzv olmuş Azərbaycanın qarşısında qoyulmuş öhdəliklərin və demokratik islahatların, həmçinin insan hüquqlarının qorunması istiqamətində işlərin yüksək templə həyata keçirilməsindən məmnunluq duyduğunu bildirdi. Ermənistan-Azərbaycan, Dağlıq Qarabağ münaqişəsinin sülh yolu ilə tənzimlənməsinə toxunan AŞPA sədri, münaqişənin həllinə müdaxilə etmək yox, yalnız Venetsiya komissiyası vasitəsilə yardım etmək niyyətində olduğunu bildirirək, eyni zamanda, Azərbaycanın Dağlıq Qarabağ bölgəsinin işğal altında olmasını fakt olaraq qeyd etdi.

        Nazir Vilayət Quliyev Azərbaycanda demokratiyanın inkişafı, insan haqlarının müdafiəsi sahəsində gedən müsbət proseslər, qaçqın və məcburi köçkünlərin vəziyyəti və hökumətin humanitar problemlərin həllinə yönəldilmiş tədbirləri barədə qonağa geniş məlumat verdi.

        Görüşdə qarşılıqlı maraq doğuran bir sıra məsələlər haqqında da fikir mübadiləsi aparıldı. 

                                X                     X                        X

        AŞPA-nın sədri lord Rassel Conston və onu müşaiyət edən şəxslər  həmin gün Səttarxan adına neft maşınqayırması zavodunun tikintisi başa çatmamış inzibati binasında məskunlaşmış qaçqınlar və məcburi köçkünlərlə görüşmüşlər.

        AŞPA-nın sədrinə məlumat verildi ki, zavodun ərazisində Ermənistanın bir neçə rayonundan qovulmuş qaçqınlar və ermənilər tərəfindən işğal olunmuş Azərbaycan rayonlarından olan məcburi köçkünlər yerləşdirilmişlər. Qonaqlar görüşdə iştirak edən Milli Məclis sədrinin müavini Ziyafət Əskərov və baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov ilə birlikdə məcburi köçkün Müqalib Sadığovun qaçqınlar Həsrət Məmmədova və Dilşad Cəfərovanın ailələrinin yaşayış şəraiti ilə tanış oldular. Baş nazirin müavini Əli Həsənov lord Rassel Constona bir milyona yaxın qaçqın və məcburi köçkünün ağır vəziyyətindən danışaraq vurğuladı ki, bu insanlarınəksər hissəsi 8 ildən artıqdır  Azərbaycanın bir sıra rayonlarında salınmış çadır şəhərciklərindədözülməz şəraitdə yaşayırlar.

        Qaçqınlar və məcburi göçkünlər ümidvar olduqlarını bildirdilər ki, Avropa Şurası və digər beynəlxalq təşkilatlar işğal olunmuş ərazilərin tezliklə azad edilməsinə və onların öz yerlərinə qayıtmasına kömək göstərəcəklər.

        Əli Həsənov qaçqınlara dövlət yardımı ilə maraqlanan lord Rassel Constonun sualına cavab verərək dedi ki, şəxsən Azərbaycan Prezidenti Heydər Əliyev onlara daim qayğı göstərir və bu kateqoriyadan olan vətəndaşların həyat şəraitini yaxşılaşdırmaq məqsədi ilə otən ay yeni Fərman və Sərəncam imzalamişdir.

        Lord Rassel Conston ümidvar olduğunu bildirdi ki, beynəlxalq təşkilatların köməyi ilə münaqişənin dinclikləhəlli yolları tezliklə tapılacaqdır.

                        X               X            X

Elə həmin gün Baş nazir Artur Rasizadə ölkəmizdə rəsmi səfərdə olan AŞPA-nın sədri lord Rassel Constonu qəbul etmişdir.

        A.Rasizadə qonağı səmimi salamlayaraq ona Azərbaycanda aparılan iqtisadi islahatlar barədə məlumat verdi. Bildirdi ki, ölkəmizdə bazar iqtisadiyyatı prinsipləri, özəlləşdirmə ardıcıl olaraq həyata keçirilir,təkcə neft-qaz sənayesi deyil, qeyri-neft sektorunun inkişaf etdirilməsinə də önəm verilir.

        Baş nazir müstəqillik illərində Azərbaycanda demokratiyanın durmadan inkişaf etdiyini, mətbuat və söz azadlığının təmin olunduğunu, insan hüquq və azadlıqlarının qorunması sahəsində çox mühüm tədbirlər görüldüyünü, bunun üçün möhkəm hüquqi baza yaradıldığını da vurğuladı.

        O, Azərbaycanın Avropaya və dünyaya inteqrasiya yolunu tutduğunu, bir sıra mühüm beynəlxalq təşkilatlarla, o cümlədən Avropa Şurası, Dünya Bankı, Beynəlxalq Valyuta Fondu ilə sıx əməkdaşlığa xüsusi diqqət yetirdiyini söylədi. 

        Baş nazir vurğuladı ki, indi ölkəmizin qarşısında duran ən mühüm və təxirəsalınmaz problem Ermənistan-Azərbaycan, Dağlıq Qarabağ münaqişəsidir. Bu problemin həllinin xalqımız üçün həyati əhəmiyyəti var.

        Çünki Ermənistanın hərbi təcavüzü nəticəsində torpaqlarımızın 20 faizi işğal edilmiş, bir milyona qədər soydaşımız qaçqın və köçkün kimi çadırlarda ağır vəziyyətdə yaşayır. Azərbaycan Prezidenti Heydər Əliyev bu münaqişəni sülh yolu ilə həll etməyə çalışır. Müntəzəm olaraq danışıqlar aparır. Lakin Ermənistanın qeyri-konstruktiv mövqe tutması problemin həllinəimkan vermir.

Səmimi qəbul üçün təşəkkürünü bildirən Avropa Şurası Parlament Assambleyasının sədri lord Rassel Conston başçılıq etdiyi beynəlxalq təşkilatın strukturu və fəaliyyətindən, AŞPA-nın ölkəmizləəməkdaşlığından danışdı. O, Azərbaycanda qanunvericilik bazasının yaradılması, qəbul edilmiş qanunların beynəlxalq hüquq normalarına uyğun olması, respublikamızda mətbuat və söz azadlığı, insan hüquq və azadlıqlarının qorunması, demokratiyanın inkişaf etdirilməsi məsələlərinə toxunaraq, son illər həmin sahələrdə ölkəmizdə mühüm irəliləyiş olduğunu söylədi. Qonaq dedi ki, bütün bunlar başçılıq etdiyi beynəlxalq təşkilatın daim diqqət yetirdiyi məsələlərdir.

        Daha sonra O, Avropa Parlamenti deputatlarının iş şəraiti, onlarla əməkdaşlıq barədə söhbət açdı, Azərbaycanın demokratiya və iqtisadi islahatlar yolu ilə inkişafı, böyük nailiyyətlər əldə etməsi barədə məlumatı olduğunu bildirdi.

        Bu yaxınlarda ABŞ-da baş vermiş dəhşətli terror hadisəsini qətiyyətlə pisləyən cənab Rassel Conston beynəlxalq terrorizmə,  narkotik maddələrin qeyri-qanuni dövriyyəsinə qarşımübarizənin vacibliyini xüsusi vurğuladı. O dedi ki, bizdə olan məlumatlara görə, Dağlıq Qarabağdan və Azərbaycanın işğal olunmuş digər ərazilərindən qeyri-qanuni yolla narkotik maddələr daşınır. Bu da transmilli cinayətkar qrupların həmin regionda fəallaşmasına şərait yaradır. Belə hallar yolverilməzdir və buna qarşı mübarizədə beynəlxalq qurumlar öz səylərini birləşdirməlidirlər. 

X X X

AŞPA-nın sədri lord Rassel Conson həmin gün Sentyabrın 14-də Qafqaz Müsəlmanları İdarəsi sədrinin iqamətgahında Azərbaycanın dini konfessiyalarının başçıları ilə görüşmüşdür.

Qafqaz Müsəlmanları İdarəsinin sədri şeyxülislam Hacı Allahşükür Paşazadə görüşü açaraq vurğuladı ki, Prezident Heydər Əliyevin müdrik siyasəti sayəsində respublikamızda bütün ənənəvi dinlərə - islama, xristianlığa, yəhudiliyə etiqad edənlər həmrəylik şəraitində yaşayırlar.

Rus Pravoslav kilsəsinin Bakı-Xəzəryanı bölgəsi yeparxiyasının başçısı yepiskop Aleksandr, Bakıdakı dağ yəhudiləri dini icmasının sədri Semyon İxiilov görüşdə çıxış edərək bildirdilər ki, Azərbaycanda bütün dini konfessiyaların hüquqları, insan hüquqları tamamilə qorunur.

AŞPA-nın sədri səmimi qəbula görə təşəkkür edərək dedi ki, burada gördükləri bunu bəyan etməyə haqq verir ki, Azərbaycan tezlliklə Avropa ailəsində daha yüksək yer tutacaqdır.

x x x

“Hesab edirəm ki, Azərbaycanda siyasi məhbuslar yoxdur”, - bu sözləri Avropa Şurası Parlament Assambleyasının sədri lord Rassel Conston sentyabrın 14-də Milli Məclisin deputatları və siyasi partiyaların nümayəndələri ilə keçirilmiş görüşdə Xalq Cəbhəsi Partiyasının sədri Əli Kərimovun sualına cavab olaraq demişdir.

AŞPA-nın sədri ölkəmizə ikinci səfərinin Azərbaycanın Avropa Şurasının tam hüquqlu üzvü olduğu bir şəraitdə keçməsindən məmnun qaldığını da söylədi. O vurğuladı ki, Azərbaycan rəhbərliyi ölkənin bu təşkilata qəbulu zamanı üzərinə götürdüyü öhdəliklərin yerinə yetirilməsi üçün bütün tədbirləri görür.

Rassel Conston Ermənistan-Azərbaycan, Dağlıq Qarabağ münaqişəsinin dincliklə nizama salınması ilə bağlı məsələlərə toxunaraq bildirdi ki, Avropa Şurası bu problemin tezliklə həlli üçün öz səylərini gücləndirmək niyyətindədir. O dedi: Bizim təşkilatımız danışıqlar prosesində müəyyən irəliləyişə nail olmaq üçün ATƏT-in Minsk qrupuna və münaqişə tərəflərinə yardım göstərəcəkdir. Rusiya Federasiyasının hərbi bazalarının Ermənistanda yerləşdirilməsi də bu münaqişənin aradan qaldırılmasına mənfi təsir göstərir. AŞPA-nın sədri hesab edir ki, Azərbaycan Prezidenti Heydər Əliyevin və Ermənistan Prezidenti Robert Koçaryanın görüşləri davam etməlidir.

Qonaq nəzərə çarpdırdı ki, Dağlıq Qarabağın statusu məsələsi beynəlxalq hüquq normaları çərçivəsində həll olunmalıdır. Hazırda Avropa Şurasının Venetsiya komissiyası bu məsələ üzərində işləyir. AŞPA-nın mövqeyi belədir ki, Ermənistan Dağlıq Qarabağ ərazisini işğal etmişdir və biz bu problemin həlli üçün kompromisli variantlar tapmalıyıq.

AŞPA-nın sədri dedi ki, bizim aldığımız məlumata görə, Dağlıq Qarabağ ərazisindən narkotik vasitələrin qanunsuz istehsalı və dövriyyəsi üçün istifadə olunur. O bildirdi ki, Avropa Şurasının Parlament Assambleyası öz iclaslarında bu məsələyə baxacaqdır.

Lord Rassel Conston Yeni Azərbaycan Partiyası icra aparatının rəhbəri, Milli Məclisin deputatı Əli Əhmədovun, Ana Vətən Partiyasının sədri, deputat Fəzail Ağamalının, Vətəndaş Həmrəyliyi Partiyasının sədri, deputat Sabir Rüstəmxanlının, parlamentin iqtisadi siyasət daimi komissiyasının sədri Səttar Səfərovun suallarına da cavab verdi.

Görüşdə Milli Məclis sədrinin birinci müavini Arif Rəhimzadə, parlament sədrinin müavinləri Ziyafət Əsgərov, Gövhər Baxşəliyeva iştirak edirdilər.