Azərbaycan alimi Türkiyə universitetlərinin elmi-texnoloji texnoparklarının fəaliyyəti ilə tanış olub
Bakı, 5 avqust (AZƏRTAC). AMEA-nın İnformasiya Texnologiyaları İnstitutunun şöbə müdiri, dosent Əlövsət Əliyev Türkiyənin İstanbul şəhərində səfərdə olub.
İnformasiya Texnologiyaları İnstitutundan AZƏRTAC-a bildiriblər ki, səfər Azərbaycan Respublikasının Prezidenti yanında Elmin İnkişafı Fondu, Rabitə və Yüksək Texnologiyalar Nazirliyinin birgə “İKT-2” qrant layihəsi - “Azərbaycanda innovativ informasiya iqtisadiyyatının formalaşmasının analizi və inkişafı üzrə tövsiyələrinin işlənilməsi” layihəsi çərçivəsində reallaşıb.
Məqsəd innovativ iqtisadiyyatın formalaşmasında Türkiyə universitetlərinin təcrübəsini öyrənmək, xüsusən yeni iqtisadi mühitdə formalaşan elmi-texnoloji texnoparkların fəaliyyəti ilə yaxından tanış olmaq idi.
İstanbul Texniki və Yıldız Texniki universitetlərinin əsas fəaliyyət istiqamətləri ilə tanışlıq olub. Yıldız Texniki Universiteti texnoparkının baş direktoru, professor Mahmut Karaman ilə görüşdə müvafiq qurumların fəaliyyəti, yeni innovasiya texnologiyaları, İKT infrastrukturu, e-hökumət layihələri, elmi inkubatorlar və s. barədə məlumatlar verilib.
Eyni zamanda, Yıldız Texnoparkı və orada olan 200-dək müxtəlif profilli firmalarla tanışlıq olub.
Bölmənin digər xəbərləri
