Azərbaycan beynəlxalq səviyyədə böyük işlər görən dövlətə çevrilib ŞƏRH
Bakı, 13 dekabr, AZƏRTAC
Azərbaycanda növbədənkənar prezident seçkilərinin keçirilməsi məlumatını xalqımız böyük məmnunluq hissi ilə qarşılayıb. Növbəti seçkilərdə də xalqımız öz siyasi iradəsini aşkar şəkildə ifadə edərək öz liderinə səs verəcək.
Bu fikirləri AZƏRTAC-a açıqlamasında Milli Məclisin Əmək və sosial siyasət komitəsinin sədri Musa Quliyev söyləyib.
Bu seçkilərin əlamətdar bir dövrdə keçiriləcəyini diqqətə çatdıran komitə sədri onu indidən “Zəfər seçkisi” adlandırıb: “Növbədənkənar prezident seçkilərinin əlamətdar cəhətlərindən biri də ondan ibarətdir ki, bu, müstəqillik tariximizdə ərazi bütövlüyümüzün tam təmin olunması, suverenliyimizin tam bərpa olunması şəraitində keçirilən ilk seçki olacaq. Məhz Ali Baş Komandan Prezident İlham Əliyevin rəhbərliyi ilə Azərbaycan xalqı bu zəfərə nail oldu. Otuz ildən artıq bir müddətdə işğal altında qalan torpaqlarımız tamamilə azad edildi. Ölkəmizin hər yerində üçrəngli bayrağımız dalğalanmaqdadır.
Prezident İlham Əliyevin rəhbərliyi ilə Azərbaycanın beynəlxalq nüfuzu artıb və olduqca yüksək bir səviyyəyə çatıb. Xüsusilə sonuncu prezident seçkilərindən sonrakı dövrdə dövlətimizin başçısı qarşıya qoyduğu bütün məqsədləri yerinə yetirib. Azərbaycanda dərin sosial-iqtisadi islahatlar başladı və uğurla davam etdi. Heç kəsin gözləmədiyi bir halda ortaya çıxan koronavirus pandemiyasından Azərbaycan ən az itki ilə çıxan ölkələrdən biri oldu, dünyaya öz töhfəsini verdi. 80-dən çox ölkəyə dövlətimiz humanitar yardım göstərdi, BMT ilə sıx əməkdaşlıq etdi. Ölkəmizdə ən qısa müddət ərzində vaksinasiyanın həyata keçirilməsi nəticəsində pandemiyanın qarşısı alındı. Eyni zamanda, 2020-ci il sentyabrın 27-də başlayan və 44 gün davam edən Vətən müharibəsində xalqımız tarixi Qələbə qazandı. Prezident İlham Əliyevin rəhbərliyi ilə ərazi bütövlüyümüz tam təmin olundu”.
Azərbaycanın bu gün beynəlxalq səviyyədə çox böyük işlər həyata keçirən dövlətə çevrildiyini diqqətə çatdıran M.Quliyev əlavə edib: “Prezident İlham Əliyevin rəhbərliyi ilə keçirilən Qoşulmama Hərəkatı öz tarixi boyunca ən yüksək zirvəyə qalxdı. Hərəkatın parlament şəbəkəsi, gənclər qanadı və qadınlar təşkilatı yarandı. Bütün bunlar Azərbaycan Prezidentinin, Azərbaycan dövlətinin dünya ictimaiyyətinə, dünya birliyinə verdiyi böyük töhfələrdir. Məhz Prezident İlham Əliyevin və Prezident Rəcəb Tayyib Ərdoğanın rəhbərliyi və təşkilatçılığı ilə Türk Dövlətləri Təşkilatı yarandı. Bu birlik artıq dünyada nüfuzlu güc mərkəzinə çevrilməlidir. Dövlətimizin başçısının ideyası olan orta dəhlizin Zəngəzurdan keçərək Şərqi Qərblə birləşdirən böyük bir magistral kommunikasiya sisteminə çevrilməsi də dünya iqtisadiyyatına verəcəyimiz böyük töhfələrdən biri olacaq. Ölkə Prezidenti məhz belə bir şəraitdə siyasi sistemin möhkəmləndirilməsi, demokratik seçkilərin keçirilməsi zərurətini görür və Azərbaycan xalqının böyük etimadını alaraq qarşıya qoyduğu daha böyük məqsədləri həyata keçirmək üçün buna ehtiyac olduğunu ortaya qoyur. Vaxtından əvvəl keçiriləcək seçkilərdən sonra xalqın növbəti dəfə böyük etimadını almaqla Prezident sülh müqaviləsi imzalayacaq, bununla da bölgədə böyük bir əməkdaşlıq, iqtisadi yüksəliş və tərəqqi başlayacaq. Bu isə həm Azərbaycana, həm də bölgə xalqlarına öz töhfəsini verəcək”.
Bölmənin digər xəbərləri
