ANALİTİKA
Azərbaycan Cənubi Qafqazda sabitliyin, təhlükəsizliyin və iqtisadi inkişafın təmin olunmasının tərəfdarıdır
Bakı, 22 yanvar, Səadət Hakıyeva, AZƏRTAC
Yerli televiziya kanallarına müsahibəsində Prezident İlham Əliyev qazanılan nailiyyətlər, işğaldan azad edilən ərazilərdə uğurla həyata keçirilən nəhəng layihələrin ölkəmizin inkişaf yolunda daha da irəliləməsi naminə əhəmiyyətindən danışdı. Həmişə olduğu kimi, həyatın bütün sahələri üzrə görülən və görüləcək işlərdən bəhs edən dövlətimizin başçısı postmüharibə dövründə ölkəmizin yürütdüyü siyasəti şərh edərək Azərbaycan dövlətinin qətiyyətli mövqeyini bir daha ortaya qoydu.
Azərbaycan Prezidenti İkinci Qarabağ müharibəsində rəşadətli Ordumuz qarşısında məğlub olaraq kapitulyasiya aktına imza atan Ermənistanın hazırkı mövqeyi ilə bağlı fikirlər səsləndirdi. Bildirdi ki, Azərbaycanın düşmən üzərində Qələbəsindən bir ildən çox vaxt ötsə də, qarşı tərəf hələ də sülh müqaviləsi imzalamaqdan yayınır.
Azərbaycan, Rusiya və Ermənistan liderlərinin 2020-ci il 10 noyabr, 2021-ci il 11 yanvar və 26 noyabr tarixli üçtərəfli bəyanatlarından irəli gələn, həllini gözləyən məsələlər var. Azərbaycan üzərinə düşən öhdəlikləri yerinə yetirsə də, məğlub Ermənistan üzərinə düşən vəzifələrin icrasından boyun qaçırır. Demarkasiya və delimitasiya məsələləri hələ də həll olunmayıb.
Hadisələrin gedişi göstərir ki, Ermənistan sülh müqaviləsinin imzalanması məsələsində tərəddüd edir və dilemma qarşısında qalıb. Bunu Azərbaycan Prezidenti yanvarın 12-də yerli televiziya kanallarına verdiyi müsahibəsində də qeyd etdi. Qarşı tərəf bir tərəfdən sülh müqaviləsini imzalamaq istəsə də, Azərbaycanın ərazi bütövlüyünü tanımaq baxımından ehtiyat edir. Çünki buna hazır deyil. Odla su arasında qalan Ermənistan nə edəcəyini bilmir. Amma bunun bir sonu olmalıdır. Çünki müharibə bitsə də, münaqişə həll olunsa da, Ermənistan silahlı qüvvələri tərəfindən davamlı təxribatlar törədilir.
Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu nəyə qadir olduğunu 2020-ci ildə bütün dünyaya nümayiş etdirdi. Ərazisinin 20 faizi 30 ilə yaxın işğal altında qalan ölkəmiz sülh təşəbbüsləri ilə çıxış etsə də, Ermənistan buna reaksiya vermədi, əksinə, öz həyasız siyasətini davam etdirdi, bəzi hallarda hətta azğınlaşdı. Daha çoxunu istəyən düşmənə sonunda əlində olanları da itirdi. Necə deyərlər, çox istəyən azdan da olar.
Münaqişənin hərbi yolla həllindən əvvəl sülh çağırışları edən Azərbaycan indi də Ermənistanı sülh sazişi imzalamağa dəvət edir. Çünki hər zaman siyasətində humanist mövqe nümayiş etdirən ölkəmiz Cənubi Qafqazda sabitliyin, təhlükəsizliyin və iqtisadi inkişafın təmin olunmasının tərəfdarıdır və bu, üçtərəfli Bəyanatda da öz əksini tapır.
Müharibə bitib, qalib və məğlub tərəflər bəllidir. Bəs Ermənistan niyə tərəddüd edir? Ermənistan Qarabağın statusu ilə bağlı diplomatik danışıqlar aparmaq ümidindədir, amma bu, olmayacaq. Prezident İlham Əliyevin dediyi kimi, heç bir statusdan söhbət gedə bilməz. Görünür, düşmən hələ yuxudan ayılmayıb. Müharibə qanunlarına görə, şərtləri qalib tərəf diktə edir. Əhalisinin sayı onsuz da az olan Ermənistandan köçüb başqa ölkələrə gedənlərin sayı artmaqda davam edir və bu ölkədə insan hüquqları kobud şəkildə pozulur. Xəstə təxəyyülə malik erməni cəmiyyətinin, ölkənin siyasi hakimiyyətinin reallıqları qəbul etməkdən başqa yolu yoxdur.
Ermənistan münaqişənin həll olunması məsələsini uzatdığı kimi, sülh müqaviləsinin imzalanmasını gecikdirdiyi və təxribatlarını davam etdirdiyi təqdirdə, Azərbaycanın düşməni sərt şəkildə cəzalandırmaqdan başqa yolu qalmır. Dövlətimizin başçısı bizim xoş, humanist niyyətimizin əbədi olmayacağını diqqətə çatdırdı. Azərbaycan Prezidenti Ermənistana düşünmək və qərar vermək üçün vaxt verərək dedi: “Bizim Ermənistanın ərazi bütövlüyünü tanımamaq üçün, necə deyərlər, bir çox amillərimiz var. Amma buna baxmayaraq, gələcək sülh naminə, ölkələr arasındakı əlaqələrin qurulması naminə biz buna hazırıq. Amma mən qarantiya verə bilmərəm ki, bu, altı aydan sonra da eyni olacaq”.
Dövlətimizin başçısı birmənalı və qətiyyətli şəkildə bildirdi ki, sülh müqaviləsi imzalansa da, imzalanmasa da, biz öz hərbi gücümüzü, qüdrətimizi daim artıracağıq. Azərbaycanla Ermənistan arasında sülh müqaviləsinin imzalanmasını şərtləndirən amillərdən biri də erməni separatçılarının Azərbaycan ərazisindən çıxarılmasıdır. Azərbaycan ərazisində yaşayan ermənilər də ölkəmizin vətəndaşlığını qəbul etməlidirlər.
Prezident İlham Əliyev müsahibəsində 2020-ci il 10 noyabr Bəyanatından sonra Azərbaycanın açıq qalan məsələlərin bir qismini öz xeyrinə həll etdiyini diqqətə çatdırdı. Laçın dəhlizi kimi strateji əraziyə Azərbaycanın nəzarəti tədricən bərpa olunub. Ölkəmizin Laçın dəhlizinə nəzarəti Ermənistandakı revanşistlərdən və onlara himayədarlıq edən qüvvələrdən separatçılara edilən dəstəyin və köməyin qarşısını almış olur.
Azərbaycan lideri ərazi bütövlüyünə dair hər hansı məsələnin güzəşt predmeti olmadığını dəfələrlə bəyan edib və bu istiqamətdə ölkəmizin hərbi-siyasi potensialını ortaya qoyub.