Görüşü ölkəmizin Ukraynadakı səfiri TƏLƏT ƏLIYEV açaraq dedı:

- Möhtərəm cənab Prezident!

Çox rəmzidir ki, 1997-ci ildə möhtərəm Prezidentimiz Heydər Əliyev elə bu salonda Azərbaycan diasporunun nümayəndələri ilə görüşmüşdü. O gündən Ukraynada Azərbaycan diasporunun formalaşması geniş vüsət almışdır.

Bu gün də Ukraynada, Moldovada və Belarusdakı Azərbaycan diasporunun fəalları Sizinlə görüşə gəlmişdir. İcazə verin, onların adından Sizi səmimi salamlayım və Ukraynaya dövlət səfərinizin uğurlu keçməsi münasibətilə ürəkdən təbrik edim. Xalqımızın gələcəyi üçün təkcə ölkəmizin daxilində göstərdiyiniz səylərə görə deyil, həm də uğurlu xarici səfərləriniz, apardığınız danışıqlar və onların nəticələri münasibətilə Sizi ürəkdən təbrik edirik.

Azərbaycan diasporunun inkişafında böyük əməyi olan insanlar bu gün Sizinlə görüşə gəliblər. Burada bizim məşhur akademiklərimiz, idmançılarımız, dövlət və hökümət xadimləri, iş adamları iştirak edirlər. İcazənizlə, mən sözü onlara verərdim.

UKRAYNA AZƏRBAYCANLILARI KONQRESİNİN

SƏDRİ OQTAY ƏFƏNDİYEVİN ÇIXIŞI

- Möhtərəm cənab Prezident, ilk növbədə, Ukrayna Azərbaycanlıları Konqresi adından Sizi salamlayır və vaxt ayırıb bizimlə görüsdüyünüzə görə dərin minnətdarlığımızı bildiririk.

Mən Ukrayna Azərbaycanlıları Konqresi haqqında bir neçə kəlmə demək istərdim. Konqres 1997-ci ildə ümummilli liderimiz Heydər Əliyevin Ukraynaya səfəri vaxtı diasporun nümayəndələri ilə görüşdən sonra yaradılmışdır.

Həmin görüşdə ümummilli liderimiz bizə birləşməyi, bir yerdə olmağı, Azərbaycana və azərbaycançılığa xidmət etməyi, milli dəyərlərimizi və adət-ənənələrimizi respublikadan kənarda qoruyub saxlamağı tövsiyə etmişdir. Konqres bu tövsiyələr, ideya və prinsiplər əsasında azərbaycanlıların ölkə hüdudlarından kənarda yaradılmış ilk təşkilatıdır. Ötən bir neçə il ərzində Konqres inkişaf edərək monolit, güclü bir ictimai quruma çevrilmişdir. Ukraynanın bütün vilayətlərində Konqresin regional təşkilatları vardır və onlar mərkəzləşdirmə prinsipləri əsasında fəaliyyət göstərirlər.

Biz həm Ukraynanın, həm də Azərbaycanın ictimai-siyasi həyatında fəal iştirak edirik. Ötən ilin payızında biz Azərbaycanda keçirilmiş prezident seçkilərində fəal iştirak etdik, burada ümumukrayna konfransı çağırdıq və yekdilliklə ümummilli liderimiz Heydər Əliyevin siyasətinin davamçısı olan İlham Əliyevin namizədliyini dəstəklədik. Bu konfransda Azərbaycan xalqına müraciət qəbul olundu. Müraciətdə deyilirdi ki, biz gələcəyimiz üçün düzgün seçim etməli və yalnız ümummilli liderimiz Heydər Əliyevin xəttinə və onun layiqli davamçısı olan İlham Əliyevin siyasətinə xidmət etməliyik.

Bundan əlavə, biz çalışırıq ki, Ukraynanın ictimai-siyasi həyatında fəal iştirak edək. Qeyd etmək istəyirəm ki, 2002-ci ildə ümummilli liderimizin Ukraynaya səfəri zamanı Yalta şəhərində onunla görüşdə qarşımızda qoyduğu əsas vəzifələrdən biri Ukrayna parlamentində - Ali Radada azərbaycanlıların təmsil olunması idi. Biz ümummilli liderimizə söz verdik ki, 2006-cı ildə keçiriləcək parlament seçkilərində mütləq bir neçə azərbaycanlı burada təmsil olunacaqdır. Biz bu sahədə gərgin iş aparırıq.

Bildiyiniz kimi bu yaxınlarda Ukraynada prezident seçkiləri olacaqdır. Təbii ki, Ukrayna vətəndaşları kimi biz bu seçkilərdə fəal iştirak edəcəyik və bizim bu və ya digər namizədi dəstəkləməyimiz Azərbaycan dövlətinin mənafeləri çərçivəsində olacaqdır. Çalışacağıq ki, buradakı sağlam qüvvələrə xidmət edək.

Möhtərəm cənab Prezident, bir daha Sizə öz dərin minnətdarlığımı bildirir və üzərinizə götürdüyünüz böyük və şərəfli işdə Sizə uğurlar diləyirəm.

BELARUSDAKI AZƏRBAYCAN İCMASININ

SƏDRİ NATİQ BAĞIROVUN ÇIXIŞI

- Möhtərəm cənab Prezident!

Mən Sizi Belarusda yaşayan azərbaycanlılar adından salamlamaq, bu gün bizimlə görüşə gəldiyinizə görə Sizə minnətdarlığımı bildirmək istəyirəm.

Mənim həmkarımın dediyi kimi, biz də Belarusda diasporumuzun fəaliyyətini gücləndirməyə, burada yaşayan azərbaycanlıları birləşdirməyə çalışırıq. Çünki tək əldən səs çıxmır. Ümummilli liderimiz Heydər Əliyevin qarşımıza qoyduğu bütün vəzifələri həll etmək, Azərbaycan diasporunu bütün dünyada möhkəmləndirmək məqsədi ilə biz yaşadığımız ölkənin parlamentinə seçkilərdə fəal iştirak etmək əzmindəyik. Bizimlə birlikdə Belarusda yaşayan Azərbaycan vətəndaşları da vətənimizin ictimai-siyasi həyatında fəal iştirak edirlər. Biz Azərbaycanda keçirilmiş referendumda və prezident seçkilərində yaxından iştirak etmişik. Eyni zamanda, biz burada milli bayramlarımızı geniş surətdə qeyd edir, uşaqlarımızı adət-ənənələrimizin ruhunda tərbiyə etməyə, idmana cəlb etməyə çalışırıq. Sentyabr ayında Minsk şəhərində bazar günü məktəbi açılacaqdır. Belarusda yaşayan azərbaycanlılar məndən xahiş ediblər ki, Sizi dəstəklədiyimizi bildirim və onlar Sizə gələcək fəaliyyətinizdə uğurlar arzulayırlar.

MOLDOVA AZƏRBAYCANLILARI KONQRESİNİN

SƏDRİ MEHMAN İSMAYILOVUN ÇIXIŞI

- Möhtərəm cənab Prezident!

İlk növbədə, mən Moldovada yaşayan azərbaycanlılar adından Sizin rəhbərliyinizlə ölkəmizin dünya siyasət meydanında qazandığı parlaq qələbələrə görə təşəkkürümü bildirmək istəyirəm.

Diaspor o deməkdir ki, hər bir millətin nümayəndəsi yaşadığı ölkədə öz adət-ənənələrini davam etdirir və öz vətənini ləyaqətlə təmsil edir. Bu gün biz Moldovada səfirliyin köməyi ilə geniş işlər aparırıq. Səfirimizin oradakı diasporun nümayəndələri ilə ilk görüşündən sonra bu fəaliyyətimiz daha da güclənmişdir. Biz moldovalılar arasında Azərbaycan xalqının nüfuzunu daim yüksəltməyə çalışırıq. Yaşadığımız ölkədə bazar günü məktəbi açmışıq, səfirliyin köməyi ilə bu məktəbə dərsliklər, müxtəlif kitablar verilmişdir. Kişinyov şəhərində, dahi Azərbaycan şairi Nizami Gəncəvinin adını daşıyan meydanda onun heykəlinin qoyulmasına çalışırıq. Dünya şöhrətli siyasətçi, ümummilli liderimiz Heydər Əliyevin adına da küçə veriləcək və onun vəfatının ildönümünədək biz bu küçəni abadlaşdıracağıq.

Demək istəyirəm ki, biz hər zaman öz vətənimizi düşünürük. Bizə deyirlər ki, sizin iki vətəniniz vardır. Bu, həqiqətən də belədir. Biz Bakıda dünya azərbaycanlıların I qurultayında iştirak etdik və hörmətli Prezidentimiz Heydər Əliyevin bu sözləri həmişə yaddaşımıza həkk olunmuşdur. O dedi ki, “mən ağacam, siz isə mənim budaqlarımsınız”. Bu dərin mənalı sözlər bizi daha sıx birləşməyə, vətənpərvərlik hisslərini daha uca tutmağa vadar etdi.

Möhtərəm cənab Prezident, bir daha Sizə öz minnətdarlığımı bildirir və söz verirəm ki, Moldovadakı Azərbaycan diasporunun nümayəndələri ölkəmizi daha yüksək səviyyədə təmsil edəcəklər.

UKRAYNADAKI AZƏRBAYCAN DİASPORUNUN

NÜMAYƏNDƏSİ ELBRUS ABDULLAYEVİN ÇIXIŞI

- Hörmətli cənab Prezident!

Ukrayna-Azərbaycan əlaqələri durmadan inkişaf edir. Biz ümummilli liderimiz, dünya şöhrətli siyasətçi Heydər Əliyevin buradakı nüfuzunu həmişə hiss etmişik. Dövlət strukturlarında çalışdığımız zaman Azərbaycanın adını və nüfuzunu yüksək tutmağa səy göstərmişik. İstəmişik ki, bütün Ukrayna xalqı bizim həmişə layiqli işlərlə məşğul olduğumuzu bilsin.

Hörmətli Prezident, hazırkı siyasi şəraitdə ölkələrimizin dostluq münasibətləri, həqiqətən, möhkəmlənir və biz bunu hər addımda hiss edirik. Sizi əmin etmək istəyirik ki, biz öz işimizdə Azərbaycanın tarixi ənənələrini inkişaf etdirməyə və Sizin siyasətinizi daim dəstəkləməyə çalışacağıq. Bu görüşə görə Sizə minnətdarlığımızı bildirir və şərəfli fəaliyyətinizdə uğurlar diləyirik.

KİYEV ŞƏHƏRİ PEÇERSK RAYON RADASININ

DEPUTATI VİLAYƏT QULİYEVİN ÇIXIŞI

- Hörmətli cənab Prezident!

Ukraynada yaşayan azərbaycanlı kimi mən Sizi burada salamlayır və “Xoş gəlmisiniz!” deyirəm. Sözümü mayın 26-da Azərbaycanda səfərdə olan ABŞ konqresinin Silahlı Qüvvələr Komitəsinin sədri Kurt Ueldonun sözləri ilə başlamaq istəyirəm. O dedi ki, “biz Prezident İlham Əliyevin regionda nümayiş etdirdiyi liderliyə valeh olmuşuq”. Biz Sizə demək istəyirik ki, dünya şöhrətli siyasətçi, ümummilli liderimiz Heydər Əliyevin davamçısı kimi onun siyasətini məharətlə davam etdirməyinizə biz də valeh olmuşuq.

Ukrayna Azərbaycanlıları Konqresi sədrinin müavini kimi demək istəyirəm ki, bizim fəaliyyətimizdə həll olunası müəyyən məsələlər də vardır. Sizi əmin edə bilərik ki, bu məsələləri həll etməyə bizim imkanımız vardır. Mən həmişə bir hisslə yaşamışam - heç zaman soruşmayım ki, Azərbaycan mənim üçün nə etmişdir? Mən həmişə özümdən soruşmalıyam ki, mən Azərbaycan üçün nə etmişəm? Biz hələ 1990-cı illərdə, müharibə zamanı Azərbaycana əlimizdən gələn köməyi edirdik. Allaha şükürlər olsun ki, bu gün ölkəmiz dinc şəraitdə yaşayır və biz düşünürük ki, bu şəraitdə ölkəmizə hansı köməyimiz dəyə bilər. Mənim təmsil etdiyim Peçersk rayonu Kiyev şəhərinin mərkəzi rayonlarından biridir. Ukraynadakı yerli özünüidarəetmə haqqında qanun Peçersk rayon radasının təşəbbüsü əsasında həyata keçirilir. Bizim sədrimiz Anatoli Kovalenko bununla əlaqədar kitab yazmışdır və bu gün Ukraynada qüvvədə olan qanun onun kitabı əsasında təqdim olunmuşdur. Bu qanunun icrası baxımından deməliyəm ki, Azərbaycanda da bu müsbət təcrübəni tətbiq etmək olar və biz buna kömək etməyə həmişə hazırıq. Əgər mənim bu təcrübəni Azərbaycanda yaymağa hər hansı bir köməyim dəyərsə, bundan çox şad olardım.

Biz Sizə söz veririk ki, Azərbaycanın bayrağını, azərbaycançılıq ideyasını həmişə yüksək tutacağıq. Apardığınız uğurlu siyasətə görə Sizə öz minnətdarlığımızı bildiririk.

Möhtərəm Prezident, mən xarici ölkələrdə çox oluram. Həmişə fəxr edirəm ki, mənim dövlətimi, Azərbaycanımı Sizin kimi cavan və savadlı Prezident təmsil edir.

X X X

Azərbaycan Prezidenti İlham Əliyev diasporun nümayəndələri qarşısında nitq söylədi.