AZƏRBAYCAN DÖVLƏT OPERA VƏ BALET TEATRI MÜNXEN QASTROLUNA HAZIRLAŞIR
Azərbaycan Dövlət Akademik Opera və Balet Teatrından AZƏRTAC-a bildirmişlər ki, teatrın simfonik orkestri Münxen opera festivalına hazırlaşır.
İyulun 24-dən avqustun 4-dək C.Verdinin “Traviata”, “Riqoletto” və “Trubadur” operalarını təqdim edəcək simfonik orkestrin avqustun 3-də qrand-konsertdə iştirakı da nəzərdə tutulmuşdur. Riqoletto partiyasını ifa etmək üçün festivala ilk dəfə teatrın solisti Əvəz Abdullayev dəvət olunmuşdur.
Münxen festivalına Avropanın, Latın Amerikasının, ABŞ-ın, Yaponiyanın aparıcı vokalçıları və dirijorları toplaşacaqlar. Azərbaycan Opera və Balet Teatrı bu mötəbər festivala ikinci dəfədir dəvət edilir.
Qala-konsertdə xarici bəstəkarların əsərləri ilə yanaşı, Azərbaycan klassikləri Üzeyir Hacıbəyovun, Qara Qarayevin və Fikrət Əmirovun əsərləri səslənəcəkdir. Bu əsərlər Münxen festivalının bədii rəhbəri və baş dirijoru Korneliya fon Kerssenbrok və Azərbaycan Dövlət Akademik Opera və Balet Teatrının dirijoru, xalq artisti Cavanşir Cəfərov səsləndirəcəklər.
Bölmənin digər xəbərləri
