Azərbaycan Elm Fondu ölkəmizdə elm siyasətinin həyata keçirilməsində yaxından iştirak edir
Bakı, 27 mart, AZƏRTAC
Böyük tarixi ənənələri olan Azərbaycan elmi bu gün milli dövlətçilik maraqları əsasında inkişaf etdirilir. Azərbaycan elminin bugünkü inkişaf səviyyəsinə yüksəlməsində müstəqil Azərbaycan dövlətinin memarı və qurucusu, xalqımızın Ümummilli Lideri Heydər Əliyevin müstəsna xidmətləri olub. Ulu Öndər ölkəmizə rəhbərlik etdiyi hər iki dövrdə elmin inkişaf etdirilməsi ilə bağlı məsələlərə xüsusi diqqət yetirib, daim qayğı göstərib, elm-təhsil problemlərinə kompleks şəkildə yanaşıb, elmin sürətli inkişafı üçün mühüm qərarlar verib, müvafiq sahədə problemlərin aradan qaldırılması məqsədilə ciddi tədbirlər həyata keçirib.
Heydər Əliyevin bütün istiqamətlərdə müəyyən etdiyi siyasəti uğurla davam etdirən Prezident İlham Əliyevin rəhbərliyi ilə Azərbaycanda gedən sürətli inkişaf prosesləri elmimizin daha da inkişaf etməsinə geniş imkanlar açıb.
Bu fikirləri AZƏRTAC-a açıqlamasında Azərbaycan Elm Fondunun icraçı direktoru Mehriban İmanova söyləyib.
M.İmanova qeyd edib ki, son illər ölkəmizin hərtərəfli inkişafının hərəkətverici qüvvəsinə çevrilmiş Azərbaycan elminin nüfuzunun yüksəldilməsi, cəmiyyətin inkişafında elmin əhəmiyyətinin artırılması və elmi fəaliyyətin stimullaşdırılması istiqamətində bir sıra dövlət əhəmiyyətli tədbirlər həyata keçirilməkdədir.
Bu istiqamətdə qəbul edilmiş mühüm qərarlardan biri də dövlətimizin başçısının Azərbaycan Respublikasında Elm Gününün təsis edilməsinə dair 2018-ci il 9 aprel tarixli Sərəncamıdır. Həmin Sərəncama əsasən, martın 27-si Azərbaycanda Elm Günü kimi təsis edilib. Bu, elmə dövlət səviyyəsində qayğı göstərilməsinin bariz nümunələrindən biridir.
Elm Gününün qeyd edilməsi elmimizin nailiyyətlərini, innovasiyaları nümayiş etdirmək, elmin təbliğinə nail olmaq, cəmiyyətdə elmə olan marağı artırmaq, ölkəmizdə savadlı, yüksəkixtisaslı gənclər yetişdirmək, onların potensialını üzə çıxarmaq, həmçinin elm-təhsil-istehsalat arasında əlaqələri gücləndirmək baxımından olduqca əhəmiyyətli hadisələrdən biridir. Bu əlamətdar gün bütün ölkə üzrə elm sahəsində fəaliyyət göstərən alim və mütəxəssisləri bir araya gətirməklə yanaşı, həm də əldə olunan elmi nailiyyətləri ictimaiyyətə təqdim etməyə, Azərbaycan elmində olan çatışmazlıqları geniş şəkildə müzakirə etməyə və problemlərin həlli ətrafında birləşməyə imkan verir.
Elmin təbliği və alimlərimizin beynəlxalq elmi mühitə inteqrasiyasını sürətləndirmək məqsədilə görülən işlər, qəbul olunan fərman və sərəncamlar elmin inkişafının dövlət siyasətinin prioritetlərindən olduğunu sübut edir.
Elmin inkişafı istiqamətində görülən mühüm işlərdən biri də Azərbaycan Respublikası Prezidentinin “Azərbaycan Respublikasının Prezidenti yanında Elmin İnkişafı Fondunun yaradılması haqqında” Sərəncamıdır. Dövlətimizin başçısının 2022-ci il 15 oktyabr tarixli Sərəncamı ilə Azərbaycan Respublikasının Prezidenti yanında Elmin İnkişafı Fondunun əsasında “Azərbaycan Elm Fondu” publik hüquqi şəxs yaradılıb.
Azərbaycan Elm Fondu ölkəmizdə elm siyasətinin həyata keçirilməsində yaxından iştirak edir, qrant müsabiqələri yolu ilə ölkədə elmin inkişafını çevik şəkildə dəstəkləmək, Azərbaycanda əldə olunan elmi nəticələri ölkə hüdudlarından kənarda tanıtmaq, elmi təşkilat və qurumlarda müxtəlif tədqiqatlarla bağlı maddi-texniki bazanı ən müasir səviyyədə yeniləmək və ya gücləndirmək, eyni zamanda, kadr hazırlığına xüsusi diqqət yetirmək, müxtəlif elmi tədbirlər keçirmək, alimlərin xaricə elmi tədbirlərə göndərilməsini, qısamüddətli təcrübəartırmada iştirakını təmin etmək, elmi nəşrləri dəstəkləmək və başqa bu kimi məsələlərin həllini bir məqsəd kimi müəyyənləşdirib. Fond təbiət, texniki, humanitar və ictimai sahələr üzrə fundamental, tətbiqi və eksperimental tədqiqatların və digər elmi tədbirlərin qrant şəklində məqsədli maliyyələşdirilməsi sahəsində fəaliyyətini uğurla davam etdirir.
Hazırda Azərbaycan Elm Fondu dünyanın bir sıra innovativ müəssisələri, elmi fondları ilə elm, təhsil, innovasiya sahəsində bilik və təcrübə mübadiləsinin aparılması baxımından yeni üfüqlər açan yüksək səmərəli əməkdaşlıq əlaqələrini davam etdirir, birgə layihələrin həyata keçirilməsində yaxından iştirak edir.
“Bu gün Azərbaycan elmi müstəqil dövlətçiliyin yaratdığı geniş imkanların işığında irəliyə doğru inkişaf edir və ölkəmizin müasir inkişafına mühüm töhfələr verir. Azərbaycan Elm Fondu olaraq bundan sonra da Azərbaycanın elminin inkişafına, alimlərimizin fəaliyyətinin stimullaşdırılmasına, ölkəmizdə müxtəlif elm sahələri üzrə əldə olunan fundamental nəticələrin iqtisadiyyatda öz tətbiqini tapmasına dəstək verəcəyik”, - deyə Mehriban İmanova fikrini yekunlaşdırıb.
Bölmənin digər xəbərləri
