Azərbaycan gəncliyinin gələcək peşələrə hazırlanması VİDEO
Bakı, 17 dekabr, AZƏRTAC
Azərbaycanın əmək bazarı, getdikcə şaxələnən və rəqəmsallaşan iqtisadiyyata uyğun olaraq sürətlə dəyişir və heç kəsi kənarda qoymayaraq gənclərin yeni imkanlardan faydalanmasını təmin etmək üçün yeni növ təlim və bacarıqlar əldə edilməsinə çağırır.
Azərbaycan gəncliyinin gələcək peşələrə və əmək bazarlarının dəyişən mənzərəsinə uyğunlaşmağa hazırlanması məqsədilə, peşə təhsili və təliminin müasirləşdirilməsi və sərmayələşdirilməsi hökumətin, Avropa İttifaqının və BMT-nin İnkişaf Proqramının strateji baxışının mərkəzindədir. Artıq üç ildir əmək bazarının tələb etdiyi bacarıqlar istiqamətində peşə təhsili vasitəsilə inklüziv öyrənmə imkanlarının yaradılmasına kömək məqsədilə birgə çalışırıq.
Bu barədə AZƏRTAC-a BMT-nin İnkişaf Proqramından məlumat verilib. Bu məlumat Avropa İttifaqının Azərbaycandakı nümayəndəliyinin rəhbəri Kestutis Yankauskas, BMTİP-nin Azərbaycandakı Rezident nümayəndəsi Alessandro Frakassetti və Azərbaycanın Peşə Təhsili üzrə Dövlət Agentliyinin direktoru Pərviz Yusifov tərəfindən hazırlanıb.
Bildirilib ki, bu cür tədrisin tətbiqi, ölkə iqtisadiyyatının müasirləşdirilməsi və şaxələndirilməsi, həmçinin yeni yaranan sənaye sahələrinin inkişafı və gələcək tələblərə cavab verməsi, eyni zamanda, ənənəvi sahələrin qorunub saxlanılması üçün həlledici rol oynayır. Bu gün iqtisadiyyatın daha dayanıqlı və çoxşaxəli edilməsi hədəfinə çatmaq üçün bacarıqlı və səriştəli işçi qüvvəsinin mövcudluğu daha vacibdir.
Son araşdırmalar göstərir ki, gələcəkdə hər 10 işdən 6-sı peşə təhsili kvalifikasiyası tələb edəcək. Yetkinlərin təxminən 45 faizi iş qabiliyyətini artırmaq və bacarıqlarını təkmilləşdirmək potensialına malikdir. Bütün yaş qruplarından olan işçilər üçün səmərəli və əlçatan peşə təlimi sektoru iş yerlərini qoruyub saxlamağa və artırmağa, kadr çatışmazlığının qarşısını almağa və iqtisadiyyatı stimullaşdırmağa kömək etməklə Azərbaycanın rəqəmsal gələcəyə keçid etməsinə yol aça bilər.
Diqqətə çatdırılıb ki, aparılan strategiya çərçivəsində yüksək keyfiyyətli peşə təhsilinə investisiya qoymaqla hər kəs üçün inklüziv və keyfiyyətli təhsili təmin etməyi və ömür boyu öyrənməni təşviq etməyi nəzərdə tutan Dayanıqlı İnkişaf Məqsədlərinin həyata keçirilməsinə töhfə verilir. Ötən üç il ərzində birgə tərəfdaşlıq sayəsində böyük uğurlara imza atılıb. Gəncə və Cəlilabadda yerləşən peşə təhsili müəssisələrində avadanlıq və infrastrukturu modernləşdirilib. Layihənin icra olunduğu rayonlarda rəhbər heyətin və pedaqoji kadrların ixtisası artırılıb, informasiya texnologiyaları, proqramlaşdırma və geyim dizaynı kimi sahələrdə yeni tədris proqramları və təlim modulları hazırlanıb və qısamüddətli kurslar təşkil olunub.
COVID-19 pandemiyası ilə bağlı görülən tədbirlər çərçivəsində əyani formada keçirilən peşə təhsili və təlimi (PTT) kursları tədricən teledərslər və onlayn təlimlərlə əvəz edilib.
Həmçinin yerli müəssisələri tədris prosesinə cəlb etməklə məzunların bacarıqları təkmilləşdirilib və onların işlə təmin olunma imkanları artırılıb. Əməkdaşlıq etdiyimiz özəl müəssisələr gələcək məzunlara ilkin təcrübə üçün imkanlar yaradır və təhsillərini başa vurduqdan sonra iş təklif edirlər.
Peşə təhsilinin inklüzivliyinin artırılması istiqamətində əldə olunan digər mühüm nailiyyət ondan ibarətdir ki, son iki tədris ili ərzində Cəlilabad rayonunda peşə təhsili və təliminə cəlb olunan qızların sayı artaraq 10,6 faizə çatıb. Əvvəllər isə bu göstərici 2 faizdən aşağı idi. Bundan əlavə, qabaqcıl beynəlxalq təcrübələri tətbiq etməklə və peşə təhsilinin ümumi perspektivlərini təkmilləşdirməklə, PTT sisteminin yenidən formalaşdırılması istiqamətində həyata keçirilən işlər əvvəlki tədris ili ilə müqayisədə peşə təhsilini seçən şəxslərin sayının 27 faiz artmasına səbəb olub.
Vurğulanıb ki, peşə təhsili və təliminin modernləşdirilməsi strategiyasının səmərəliliyinə nail olmaq üçün kursların yüksək keyfiyyətdə keçirilməsi və əmək bazarının tələblərinə cavab verməsi ilə yanaşı, PTT-nin nüfuzunun artırılması və PTT kvalifikasiyalarının tanınması məsələləri də təşviq edilməlidir. Buna görə də əhalidə peşə hazırlığı ilə bağlı mövcud yanaşmanı dəyişdirmək üçün bir sıra ictimai maarifləndirmə işlərinə başlanılıb və formal və qeyri-formal təhsilin tanınması üzrə yeni mexanizmlər təqdim edilib.
Bildirilib ki, bu il peşə təhsili sektorunun əhəmiyyətli dərəcədə modernləşdirilməsi istiqamətində yeni dörd illik birgə layihə start götürəcək. Layihə çərçivəsində PTT-nin təşviqi məqsədilə həyata keçirilən işlərin miqyası genişlənəcək, peşə təhsili ilə bağlı düşüncəni dəyişmək üçün bütün əsas maraqlı tərəflər bir araya gələcək, təhsil müəssisələrinin müasirləşdirilməsi nəticəsində bütün ölkə üzrə PTT mərkəzlərinin təxminən 5 min şagird yeni imkanlardan faydalanacaq.
PTT-nin modernləşdirilməsi istiqamətində görülən işlərin əsas məqsədi hər kəs üçün, xüsusilə də bu çətin dövrdə gələcəyi sual altında olan şəxslər üçün keyfiyyətli peşə hazırlığı və məşğulluq imkanları yaratmaqla iqtisadiyyatın inklüzivliyini, şəffaflığını və dayanıqlılığını artırmaqdır.
Bölmənin digər xəbərləri
