Azərbaycan hər zaman regional əlaqələrin inkişafına böyük önəm verir
Bakı, 3 iyun (AZƏRTAC). İyunun 3-də Azərbaycanın xarici işlər nazirinin müavini Xələf Xələfov ABŞ Dövlət Departamentinin Enerji Resursları Bürosunun baş müşaviri Daniel Stayn ilə görüşmüşdür.
Xarici İşlər Nazirliyindən AZƏRTAC-a bildirmişlər ki, nazir müavini regionda enerji sahəsində həyata keçirilən layihələr barədə ətraflı məlumat vermişdir. Azərbaycanın hər zaman regional əlaqələrin inkişafına böyük önəm verdiyini diqqətə çatdıran X.Xələfov bu çərçivədə aparılan ikitərəfli və çoxtərəfli dialoqların inkişaf etdirilməsinin əhəmiyyətli olduğunu bildirmişdir.
Nazir müavini Xəzər dənizində beynəlxalq əməkdaşlıq ruhunun gücləndirilməsi və inkişaf etdirilməsinin vacibliyini və bu istiqamətdə tərəfdaşların dəstəyinin zəruriliyini önə çəkmişdir. O, region və qonşu ölkələrlə qurulmuş əlaqələrin inkişaf etdirilməsi üçün bölgədə təhlükəsizliyin və sabitliyin qorunmasının əhəmiyyətini diqqətə çatdırmışdır. Ermənistan-Azərbaycan, Dağlıq Qarabağ münaqişəsi və onun doğurduğu fəsadlar, problemin həllinə dair Azərbaycanın ədalətli mövqeyi barədə qonağı məlumatlandıran X.Xələfov Ermənistanın qeyri-konstruktiv mövqeyinin münaqişənin həll olunmasına imkan vermədiyini demiş, beynəlxalq birliyin bu məsələdə ardıcıl və prinsipial mövqe nümayiş etdirməsinin zəruriliyini vurğulamışdır.
Görüşdə qarşılıqlı maraq doğuran məsələlər ətrafında müzakirələr aparılmışdır.
Bölmənin digər xəbərləri
