AZƏRBAYCAN İDMANÇILARI DAHA İKİ OLİMPİYA LİSENZİYASI QAZANMIŞLAR
Onları sərbəst güləşçilər – Sidney Olimpiadasının çempionu Namiq Abdullayev və Rüstəm Ağayev əldə etmişlər. Gənclər, İdman və Turizm Nazirliyinin mətbuat xidmətindən AZƏRTAC-ın müxbirinə bildirmişlər ki, yanvarın 31-dən fevralın 1-dək Bratislavada sərbəst güləş üzrə “Super A” dərəcəli olimpiyaqabağı lisenziya turniri keçirilmişdir. Yarışlarda üç idmançımız – Namiq Abdullayev (55 kq), Elman Əsgərov (66 kq) və Rüstəm Ağayev (96 kq) - iştirak etmişlər. Turnirin qaydalarına uyğun olaraq, ilk beş yeri tutan idmançılar Olimpiya oyunlarına lisenziya qazanmışdır. Yarışlarda Namiq Abdullayev dördüncü, Rüstəm Ağayev isə üçüncü yeri tutmuşlar.
Xatırladaq ki, güləşin bu növündə Arif Abdullayev (60 kq) və Elnur Aslanov (74 kq) artıq Afina Olimpiadasına lisenziya əldə etmişlər.
Beləliklə, Azərbaycan idmançıları indiyədək 2004-cü ilin Olimpiya oyunlarına 15 lisenziya qazanmışdır.
Bölmənin digər xəbərləri
