AZƏRBAYCAN İLƏ RUSİYA ARASINDA İQTİSADİ ƏMƏKDAŞLIQ ÜZRƏ HÖKUMƏTLƏRARASI KOMİSSİYANIN ALTINCI İCLASI
Aprelin 10-da “Həyat-Recensi Naxçıvan” mehmanxanasında Azərbaycan Respublikası ilə Rusiya Federasiyası arasında iqtisadi əməkdaşlıq üzrə hökumətlərarası komissiyanın 6-ci iclası keçirilmişdir.
Iclas başlanmazdan əvvəl Rusiya hökuməti sədrinin müavini Viktor Xristenko və onu müşaiyət edən şəxslər Şəhidlər xiyabanını ziyarət edərək, ölkəmizin suverenliyi və müstəqilliyi uğrunda canlarından keçmiş cəsur Azərbaycan övladlarının xatirəsini andılar. Rusiya hökuməti sədrinin müavini “Əbədi məşəl” abidəsinin önünə əklil qoydu.
Əklilqoyma mərasimində baş nazirin birinci müavini Abbas Abbasov, Rusiya Federasiyasının Bakıdakı səfiri Nikolay Ryabov, Azərbaycanın Moskvadakı səfiri Ramiz Rizayev, digər rəsmi şəxslər iştirak edirdilər.
Komissiyanın iclasının gündəliyinə ötən iclasın qərarının yerinə yetirilməsinın gedişi, müqavilə-hüquqi bazanın vəziyyəti və inkişaf etdirilməsi, ticarət-iqtisadi münasibətlərin vəziyyəti və inkişaf perspektivləri, 2010-cu ilədək dövrdə uzunmüddətli iqtisadi əməkdaşlıq proqramının həyata keçirilməsinə dair tədbirlərin təsdiqi, əmlak mübahisələrinin tənzimlənməsi, yanacaq-energetika kompleksi sahəsində əməkdaşlıq, nəqliyyat və rabitə sahəsində əməkdaşlıq, humanitar sahədə əməkdaşlıq, Rusiya Federasiyasının subyektləri ilə regional əməkdaşlığın genişləndirilməsi, sərhəd və gömrük işləri sahəsində qarşılıqlı fəaliyyət, komissiyanın növbəti iclasının keçirilməsi vaxtı və yeri məsələləri daxil edilmişdi.
Komissiyanın Azərbaycan tərəfdən sədri, baş nazirin birinci müavini Abbas Abbasov iclası açaraq dedi ki, ötən dövrdə qarşılıqlı ticarət-iqtisadi əməkdaşlığın genişləndirilməsi, bu sahədə mövcud problemlərin həlli üçün müəyyən iş görülmüşdür. Rusiya Federasiyasının Prezidenti Vladimir Putinin 2001-ci ilin yanvarında Bakıya rəsmi səfəri və Azərbaycan Respublikasının Prezidenti Heydər Əliyevin 2002-ci ilin yanvarında Moskvaya dövlət səfəri bir çox istiqamətlərdə ikitərəfli münasibətlərin inkişafına xüsusi təkan vermişdir. Dövlətimizin başçısının səfəri zamanı bir sıra sənədlər, o cümlədən 2010-cu ilədək dövrdə ölkələrimiz arasında uzunmuddətli iqtisadi əməkdaşlıq haqqında müqavilə, Qəbələ radiolokasiya stansiyasının statusu, istifadə prinsipləri və şərtləri haqqında saziş kimi çox mühüm sənədlər imzalanmışdır.
Abbas Abbasov dedi ki, Azərbaycan Rusiya ilə münasibətlərin inkişaf etdirilməsi və dərinləşdirilməsinə xüsusi əhəmiyyət verir. Rusiya xarici iqtisadi fəaliyyətdə ölkəmizin əsas tərəfdaşlarından biridir. Bir çox istiqamətlərdə əməkdaşlığımız səmərəlidir.
Sonra komissiyanın Rusiya tərəfdən sədri, Rusiya Federasiyası hökuməti sədrinin müavini Viktor Xristenko çıxış edərək, səmimi qonaqpərvərliyə görə təşəkkürünü bildirdi və dedi ki, iki dövlət başçılarının qarşılıqlı səfərlərindən ötən bu qısa dövrdə komissiya əvvəlki illərdəkinə nisbətən daha çox iş görmüşdür.
İclas başa çatdıqdan sonra birgə sənədlərin imzalanması mərasimi oldu. Azərbaycan Respublikasının Dövlət Gömrük Komitəsi ilə Rusiya Federasiyasının Dövlət Gömrük Komitəsi arasında xarici ticarətin gömrük statistikası sahəsində metodoloji əməkdaşlıq və informasiya əməkdaşlığı haqqında, habelə mədəni dəyərlərin ölkədən qanunsuz çıxarılması və gətirilməsi ilə mübarizədə əməkdaşlıq haqqında protokolları Azərbaycan Dövlət Gömrük Komitəsinin sədri Kəmallədin Heydərov və Rusiya Dövlət Gömrük Komitəsinin sədri Mixail Vanin imzaladılar. Abbas Abbasov və Viktor Xristenko 2010-cu ilədək dövrdə uzunmüddətli iqtisadi əməkdaşlıq haqqında müqaviləyə uyğun olaraq, 2010-cu ilədək dövrdə Azərbaycanin və Rusiyanın uzunmuddətli iqtisadi əməkdaşlıq proqramının həyata keçirilməsinə dair tədbirləri təsdiqlədilər, komissiyanın altıncı ıclasının protokolunu imzaladılar.
Bundan sonra keçirilən mətbuat konfransında bildirildi ki, imzalanmış sənədlərdə həm ayrı-ayrı sahələrdə əməkdaşlıq, həm də gömrük qaydaları və prosedurlarının müəyyənləşdirilməsi ilə bağlı sistem xarakterli tədbirlər, ölkələrimizin qanunvericiliklərinin uyğunlaşdırılması, onların arasında ticarət rejimi yaradılması nəzərdə tutulur. Tərəflər Azərbaycan gəmilərinin Rusiyanın daxili sularından keçməsi məsələlərini, ticarət-iqtisadi əlaqələrin, nəqliyyat və rabitə sahəsində əməkdaşlığın perspektivlərini də müzakirə etmişlər.
Bölmənin digər xəbərləri
