AZƏRBAYCAN İLƏ TACİKİSTAN ARASINDA ƏLAQƏLƏRİN İNKİŞAF PERSPEKTİVLƏRİ MÜZAKİRƏ OLUNMUŞDUR
AZƏRTAC xəbər verir ki, aprelin 8-də xarici işlər naziri Elmar Məmmədyarov Tacikistanın ölkəmizə yeni təyin olunmuş səfiri Zokir Vəzirov ilə görüşmüşdür.
Xarici İşlər Nazirliyinin mətbuat xidmətindən bildirmişlər ki, görüşdə ölkələrimiz arasında qarşılıqlı rəsmi səfərlərin artdığını və iqtisadi, siyasi müstəvidə daha sıx əməkdaşlığın qurulmasında vacib rol oynadığını qeyd edən tərəflər, ikitərəfli əlaqələrin mövcud baza əsasında daha da irəli aparılmasının zəruriliyini vurğulamışlar.
Tacikistanın səfiri bu yaxınlarda Bakı-Düşənbə hava reysinin açılacağını bildirmiş, ölkəsinin Azərbaycanda bir sıra iqtisadi maraqlarının olduğunu, neft koksundan əlavə, digər neft məhsullarının idxalı, kənd təsərrüfatı, bank sistemi və digər sahələrdə əməkdaşlığın möhkəmləndirilməsinin vacibliyini diqqətə çatdırmışdır.
Tərəflər, həmçinin sərmayə qoyuluşu, elmi kadrların hazırlanması, hərbi-texniki sahədə əməkdaşlıq, qarşılıqlı mədəniyyət günlərinin keçirilməsi və digər məsələlər ətrafında fikir mübadiləsi aparmışlar.
Səfir Zokir Vəzirov etimadnaməsinin surətini nazir Elmar Məmmədyarova təqdim etmiş və əlaqələrin inkişafı üçün əlindən gələni əsirgəməyəcəyini bildirmişdir.
Bölmənin digər xəbərləri
