Azərbaycan kapoeyraçıları beynəlxalq turnirdə 6 medal qazanıblar
Bakı, 3 fevral, AZƏRTAC
Azərbaycan Kapoeyra Federasiyasının (AKF) idmançıları solo kapoeyra üzrə onlayn beynəlxalq turnirdə uğurla çıxış ediblər.
AKF-dən AZƏRTAC-a bildiriblər ki, Ümumdünya Kapoeyra Federasiyası (WCF) tərəfindən videoformatda keçirilən “Joga Legal U-18” adlı yarışda Braziliya, Rusiya, Yaponiya, Portuqaliya, İtaliya və digər ölkələrdən idmançılar güclərini sınayıblar.
Müxtəlif yaş kateqoriyası üzrə keçirilən yarışda Azərbaycan komandası 6 medal qazanıb. Belə ki, Azər Orucov, Cavidan Pənahlı, Dilqəm İsmayılov turnirin qalibi adını qazanıblar. Zülfüqar Zeynallı yarışı ikinci, Cəfər Usubov və Əli Tağızadə isə üçüncü pillədə başa vurublar.
Elgiz Əlizadə, Zahid Rüstəmbəyov və Oxçu Şahmuradov yarışda beynəlxalq referi kimi fəaliyyət göstəriblər.
Bölmənin digər xəbərləri
