AZƏRBAYCAN MƏRKƏZİ KOOPERATİVLƏR İTTİFAQININ XXI QURULTAYI KEÇİRİLMİŞDİR
AZƏRTAC xəbər verir ki, avqustun 16-da Azərbaycan Kooperasiya Universitetində Mərkəzi Kooperativlər İttifaqının (Azərittifaq) XXI qurultayı keçirilmişdir.
Qurultay nümayəndələri əvvəlcə Fəxri xiyabana gələrək, ulu öndər Heydər Əliyevin xatirəsini yad etmiş, məzarı önünə əklil qoymuşlar.
Görkəmli oftalmoloq alim, akademik Zərifə xanım Əliyevanın məzarı üstünə də gül düzülmüşdür.
Qurultayın başlanmasından əvvəl universitetin həyətində ümummilli lider, müstəqil Azərbaycan dövlətinin memarı və qurucusu Heydər Əliyevin büstünün açılış mərasimi olmuşdur.
Qurultay Azərbaycanın dövlət himninin səsləndirilməsi ilə başlamışdır.
Prezidentin İcra Aparatının ictimai-siyasi məsələlər şöbəsinin müdiri Əli Həsənov dövlətimizin başçısı İlham Əliyevin qurultay iştirakçılarına təbrik məktubunu oxumuşdur.
Azərittifaq Şurasının prezidenti, idarə heyətinin sədri Eldar Quliyev qurultaya beynəlxalq təşkilatlardan, MDB ölkələri kooperatorlarından da təbriklərin gəldiyini bildirmişdir.
Qurultayın gündəliyindəki birinci məsələ ilə bağlı Eldar Quliyev demişdir ki, rayonlarda keçirilmiş hesabat yığıncaqlarında iştirak edən payçılar və müvəkkillər 2008-ci ilin prezident seçkilərində dövlət başçısı İlham Əliyevə bir daha etimad göstərərək, onun namizədliyinin irəli sürülməsi və seçkilər zamanı dəstəklənməsi barədə Azərittifaqa çoxsaylı müraciətlər etmişlər. Bu müraciətlərdə Prezident İlham Əliyevin seçkiqabağı vədlərinə sadiq qaldığı yüksək qiymətləndirilmişdir.
Son beş ildə Azərbaycanda əldə olunmuş nailiyyətlərdən danışan Eldar Quliyev Bakı-Tbilisi-Ceyhan neft və Bakı-Tbilisi-Ərzurum qaz boru kəmərlərinin istismara verilməsini, Bakı-Tbilisi-Qars dəmir yolunun təməlinin qoyulmasını, dövlətimizin beynəlxalq miqyasda nüfuzunun daha da artaraq regionda aparıcı mövqeyə çıxmasını, Dağlıq Qarabağ münaqişəsinin Azərbaycanın ərazi bütövlüyü çərçivəsində həllinə yönəlmiş məqsədyönlü səyləri, məcburi köçkünlərin məskunlaşdığı son çadır düşərgəsinin ləğv edilməsini, yeni iş yerlərinin açılması hesabına ölkədə yoxsulluğun səviyyəsinin üç dəfə azaldılmasını, xalqımızın maddi rifah halının nəzərəçarpacaq dərəcədə yaxşılaşdırılmasını, iqtisadiyyatın dinamik inkişafının təmin edilməsini xatırlatmışdır.
Bildirilmişdir ki, ötən beş ildə ölkənin əsas makroiqtisadi göstəricisi olan ümumi daxili məhsulun həcmi müqayisəli qiymətlərlə 2,7 dəfə artaraq 2008-ci ilin birinci yarısında 18,5 milyard manat olmuşdur. İlin sonuna bu göstəricinin 40 milyard manata çatacağı gözlənilir. Avqustun 1-nə ölkənin valyuta ehtiyatları 14 milyard ABŞ dolları təşkil etmişdir. Ölkəmizin dünya iqtisadi sisteminə inteqrasiyası daha da sürətlənmiş və ticarət əlaqələri genişlənmiş, xarici ticarət dövriyyəsi 9,9 dəfə, o cümlədən ixrac 17,5 dəfə artmışdır.
X X X
İdarə heyətinin sədri son illərdə Azərbaycanın sosial-iqtisadi inkişafını səciyyələndirən digər çoxsaylı faktları da xatırlatmış, ölkəmizin perspektivlərinin daha yaxşı olacağına əminliyini söyləmişdir.
Sonra o, YAP-ın IV qurultayının prezident seçkilərində İlham Əliyevin namizədliyinin irəli sürülməsi barədə qərarının dəstəklənməsini və Azərbaycan kooperatorlarının XXI qurultayı tərəfindən də İlham Əliyevin namizədliyinin irəli sürülməsini təklif etmişdir.
E.Quliyev prezident seçkilərinin şəffaf, ədalətli keçəcəyinə əminliyini bildirmiş, müxtəlif dövlətlərin və beynəlxalq təşkilatların göndərəcəyi müşahidəçilər vasitəsilə dünya ictimaiyyətinin də bunun şahidi olacağını vurğulamışdır.
Təklif yekdilliklə qəbul edilmiş və qurultay iştirakçıları adından Prezident İlham Əliyevə müraciət qəbul olunmuşdur.
Sonra Azərittifaq Şurasının prezidenti, idarə heyətinin sədri E.Quliyev qurumun XX qurultayından keçən dövrdə görülmüş işlər barədə hesabat məruzəsi ilə çıxış etmişdir. Son illərdə ölkəmizdə iqtisadi islahatların dərinləşməsi, əhalinin həyat səviyyəsinin yüksəlməsi istiqamətində görülən işlərdən danışan məruzəçi bütün bunların kooperasiya sahəsinə də müsbət təsir göstərdiyini vurğulamışdır.
Məruzədə hesabat dövründə görülmüş işlərə ətraflı nəzər salınmış, mövcud nöqsanlar və çatışmazlıqlar təhlil edilmişdir.
Qurultayda Azərittifaqın Təftiş Komissiyasının hesabatı dinlənilmiş, kooperasiyanın 2009-2013-cü illərə dair inkişaf konsepsiyası təsdiq olunmuşdur.
Sonra təşkilat məsələlərinə baxılmışdır. Eldar Quliyev yenidən Azərittifaq Şurasının prezidenti və idarə heyətinin sədri seçilmişdir.
Qurultayda Yeni Azərbaycan Partiyasının sədr müavini-icraçı katibi, Milli Məclisin deputatı Əli Əhmədov, Milli Məclisin aqrar siyasət daimi komissiyasının sədri Eldar İbrahimov, Auditorlar Palatasının sədri Vahid Novruzov iştirak etmişlər.
######
 |
 |
 |
 |
Bölmənin digər xəbərləri
