Azərbaycan minifutbol millisinin üzvü: Bəhreynə qalib gələ bilməsək də, onlar bizdən zəif komandadır
Bakı, 22 may, AZƏRTAC
“Bəhreynə qalib gələ bilməsək də, düşünürəm ki, onlar bizdən zəif komandadır”.
Bu sözləri AZƏRTAC-a açıqlamasında minifutbol üzrə Azərbaycan millisinin kapitanı Elvin Əlizadə Bakıda keçirilən dünya çempionatının A qrupunda Bəhreynlə heç-heçə etdikləri oyun barədə danışarkən deyib.
“Əslində, rəqib də meydanda yaxşı performans nümayiş etdirmədi. Təəssüf ki, biz də şansları dəyərləndirə bilmədik. Meydançanın yeni olması oyunumuza müəyyən təsir göstərdi. Düşünürəm ki, bu düzələcək”, - deyə o, oyun zamanı xırda səhvlər etdiklərini bildirib.
E.Əlizadə dünya çempionatında uğurlu nəticə qazanacaqlarına inandığını söyləyib: “Qarşıda bizi Sloveniya və Mavritaniya ilə oyunlar gözləyir. Hər iki komandanın fiziki və taktiki hazırlığı yüksək səviyyədədir. İki çətin görüş olacaq. Lakin qrupdan çıxıb, sonda medalçılar sırasında olacağımıza inanırıq”.
Qeyd edək ki, Azərbaycan seçməsi mayın 23-də Sloveniya ilə qarşılaşacaq. Milli Gimnastika Arenasında reallaşacaq matç saat 20:45-də başlayacaq.
Bölmənin digər xəbərləri
