AZƏRBAYCAN NÜMAYƏNDƏLİYİ STRASBURQDA 20 YANVAR FACİƏSİ İLƏ BAĞLI MƏRASİM KEÇİRMİŞDİR
Paris, 20 yanvar (AZƏRTAC). Yanvarın 19-da Strasburqda Azərbaycanın Avropa Şurası yanında daimi nümayəndəliyində Qanlı 20 Yanvar faciəsinin 20 illiyi ilə bağlı tədbir keçirilmişdir.
Mərasimdə nümayəndəliyin rəhbəri səfir Arif Məmmədov 20 il əvvəl yanvarın 19-dan 20-nə keçən gecə təpədən-dırnağadək müasir silahlarla silahlanmış sovet ordusu birləşmələrinin Bakıya daxil olaraq öz müstəqilliyi uğrunda mübarizə aparan sülhsevər və dinc əhaliyə qarşı tutduğu divandan, günahsız insanları XX əsrdə görünməmiş vəhşiliklərlə qətlə yetirməsindən, hər cür terror aktlarına və zorakılığa əl atmasından söhbət açmışdır. A.Məmmədov 20 Yanvar faciəsinin sovet rəhbərliyinin xalqımıza qarşı məkrli siyasətinin nəticəsi olduğunu vurğulamışdır.
Tədbir iştirakçıları 20 Yanvar faciəsini əks etdirən sərgi ilə yaxından tanış olmuşlar. Sərgidə nümayiş etdirilən fotolar qonaqların 20 Yanvar qırğını haqqında dolğun məlumat əldə etmələrində xüsusi rol oynamışdır. Mərasimdə, həmçinin 20 Yanvar faciəsindən bəhs edən film göstərilmişdir.
Səfir Arif Məmmədov qonaqlara xalqımızın yaddaşına və tarixinə qanlı bir gün kimi daxil olmuş 20 Yanvar faciəsi ilə bağlı kitablar, broşürlər, CD və DVD diskləri, habelə Azərbaycan həqiqətlərindən bəhs edən “Azerbaijan Diary” (ingilis dilində) kitabçanı təqdim etmişdir.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
