Azərbaycan parlament nümayəndə heyəti Çilidə səfərdə olub
Bakı, 14 mart, AZƏRTAC
Milli Məclisin Azərbaycan-Çili parlamentlərarası əlaqələr üzrə işçi qrupunun rəhbəri Muxtar Babayevin başçılığı ilə parlament nümayəndə heyəti Çilidə səfərdə olub.
Xarici İşlər Nazirliyinin mətbuat xidmətindən AZƏRTAC-a bildiriblər ki, səfər çərşivəsində nümayəndə heyəti Çili Senatının sədri Patrikio Valker Prieto, Deputatlar Palatasının sədri Aldo Kornejo Qonzales, Çili Milli Konqresinin hər iki palatasında fəaliyyət göstərən Azərbaycanla parlamentlərarası dostluq qruplarının üzvləri ilə görüşlər keçirib.
Görüşlərdə Azərbaycan və Çili arasında parlamentlərarası əlaqələrin inkişafı, bu xüsusda dostluq qruplarının təmaslarının gücləndirilməsi, habelə siyasi, iqtisadi, ticarət, humanitar, mədəniyyət, təhsil sahələrində əməkdaşlığın genişləndirilməsinə qanunverici orqanların verəcəyi dəstək müzakirə olunub. Eyni zamanda, regional məsələlər, o cümlədən Ermənistan-Azərbaycan münaqişəsi, ölkəmizin enerji strategiyası, qlobal enerji təhlükəsizliyindəki rolu, mədəniyyətlərarası dialoqun təşviqinə verdiyi töhfələrə dair fikir mübadiləsi aparılıb. Çili parlamentariləri 2014-cü ildə Azərbaycanın bu ölkədə diplomatik nümayəndəliyinin təsis edilməsini yüksək qiymətləndiriblər. Bu yaxınlarda Çili Milli Konqresində qəbul olunmuş, bu ölkənin də Azərbaycanda tezliklə diplomatik missiyasının fəaliyyətə başlamasının vacibliyi ilə bağlı parlament adından hökumətə müraciəti nəzərdə tutan qətnamənin surəti Azərbaycan nümayəndə heyətinə təqdim edilib.
Milli Məclisin deputatları Çilinin iqtisadiyyat, inkişaf və turizm naziri Luis Felipe Cespedes, enerji naziri Maksimo Paçeko, xarici işlər nazirinin əvəzləyici müavini Qustavo Ayares Ossandon, habelə Çilinin dövlət enerji şirkətinin baş direktoru Marcelo Tokman Ramos ilə də görüşüblər.
Görüşlərdə Azərbaycan-Çili əməkdaşlığının genişləndirilməsi üçün kənd təsərrüfatı, şərabçılıq, neft və qaz, dağ-mədən, elm və texnologiya sahələrində geniş imkanların mövcudluğu vurğulanıb, bu xüsusda iki ölkənin müvafiq qurumları arasında təmasların gücləndirilməsinin vacibliyi qeyd olunub. Əlaqələrin inkişafı üçün iki ölkə arasında qarşılıqlı rəsmi səfərlərin, biznes missiyaların təşkili, müqavilə-hüquq bazasının inkişafının əhəmiyyəti qeyd edilib. Tərəflər iki ölkənin xalqları arasında təmasların yaxınlaşması üçün turizm, təhsil, mədəniyyət və humanitar sahələrdə də əlaqələrin təşviqinin vacibliyini bildiriblər. Görüşlərdə, həmçinin regional məsələlər, Azərbaycan və Çilinin yerləşdiyi bölgələrdəki vəziyyətlə bağlı fikir mübadiləsi aparılıb.
Səfər çərçivəsində Çili Xarici İşlər Nazirliyinin Andres Bello adına Diplomatik Akademiyasında “Azərbaycanın inkişaf strategiyası” mövzusunda təqdimat da keçirilib. Tədbirdə çıxış edən deputatlar Muxtar Babayev və Asim Mollazadə Azərbaycanın dövlətçilik ənənələri, son illərdə əldə etdiyi sosial-iqtisadi nailiyyətlər, ölkəmizin regional liderliyi, həyata keçirdiyi strateji enerji və infrastruktur layihələri, qlobal enerji təhlükəsizliyinin təmin edilməsində rolu, dünyada sülhün bərqərar edilməsinə verdiyi töhfələr haqqında məlumat veriblər. Deputatlar, həmçinin Ermənistanın ölkəmizə qarşı hərbi təcavüzü, Dağlıq Qarabağ münaqişəsinin yaratdığı humanitar faciə, problemin tezliklə nizamlanmasının regiondakı vəziyyətə göstərəcəyi təsir, ölkəmizin mədəniyyətlərarası dialoqa verdiyi önəm, Azərbaycanda elm, təhsil, yüksək texnologiyalar sahələrində dövlət siyasəti barədə söhbət açıblar.
Bölmənin digər xəbərləri
