Oktyabrın 13-də Azərbaycan Respublikasının Prezidenti Heydər Əliyev İqtisadi Əməkdaşlıq Təşkilatının üzvü olan ölkələrin dövlət başçılarının Zirvə görüşündə iştirak etmək üçün İstanbula gəldi. 

Atatürk beynəlxalq hava limanında dövlətimizin başçısının şərəfinə fəxri qarovul dəstəsi düzülmüşdü.

Prezident Heydər Əliyevi təyyarənin pilləkəni yanında İstanbul valisi Erol Çakır, İstanbul bələdiyyə başqanı Əli Müfit Gurtana, habelə Azərbaycanın xarici işlər naziri Vilayət Quliyev, ölkəmizin Türkiyədəki səfiri Məmməd Əliyev, respublikamızın İrandakı səfiri, İƏT-in Daimi Nümayəndələr Şurasının üzvü Abbasəli Həsənov, Azərbaycanın İstanbuldakı baş konsulu Xeyrəddin Qoca və digər rəsmi şəxslər qarşıladılar.

Azərbaycan Prezidenti fəxri qarovul dəstəsinin qarşısından keçdi və türk əsgərini salamladı.

Dövlətimizin başçısı hava limanından maşın karvanının müşayiəti ilə onun üçün ayrılmış iqamətgaha - “Çırağan Palas” mehmanxanasına gəldi. Ali qonağı burada Türkiyə hökumətinin rəsmi şəxsləri mehribanlıqla qarşıladılar.

X x X

Oktyabrın 14-də “Çırağan” sarayında İƏT-in üzvü olan ölkələrin VII Zirvə görüşü öz işinə başladı.

Türkiyə Prezidenti Əhməd Necdət Sezər Azərbaycan Prezidenti Heydər Əliyevi sarayın qarşısında ehtiramla, səmimiyyətlə salamladı.

Salona toplaşanlar Türkiyə Prezidenti Əhməd Necdət Sezəri, Azərbaycan Prezidenti Heydər Əliyevi, Əfqanıstan Prezidenti Həmid Kərzaini, İran Prezidenti Məhəmməd Xatəmini, Qırğızıstan Prezidenti Əsgər Akayevi, Pakistan Prezidenti Pərviz Müşərrəfi, Tacikistan Prezidenti Emoməli Rəhmonovu, Özbəkistan Milli Məclisinin sədri Erkin Xəlilovu, Türkmənistan Nazirlər Kabineti sədrinin müavini Rəcəb Saparovu və Qazaxıstanın dövlət katibi - xarici işlər naziri Qasımcomərd Tokayevi alqışlarla qarşıladılar.

İclası giriş sözü ilə İran İslam Respublikasının Prezidenti, İƏT-in sədri Məhəmməd Xatəmi açdı və qarşıdakı dövr üçün bu təşkilata sədrliyin Türkiyə Respublikasının Prezidenti Əhməd Necdət Sezərə verildiyini bildirdi.

Prezident Əhməd Necdət Sezər dövlət başçılarını salamladı, Zirvə görüşünün işinə uğurlar arzuladı.

Azərbaycan Prezidenti Heydər Əliyev İƏT-in üzvü olan ölkələrin dövlət başçılarının Zirvə görüşündə nitq söylədi. (Dövlətimizin başçısının nitqi qəzetin bugünkü nömrəsinin birinci səhifəsində dərc olunur).

Zirvə görüşündə təşkilatın üzvü olan digər ölkələrin başçıları da çıxış etdilər.

Türkiyənin xarici işlər naziri, baş nazirin müavini Şükrü Sina Gürəl İƏT-in üzvü olan ölkələrin xarici işlər nazirləri iclasının yekunları barədə dövlət başçılarına məlumat verdi.

İƏT-in üzvü olan ölkələrin dövlət başçılarının VII Zirvə görüşündə “2002-ci il İstanbul bəyannaməsi” qəbul olundu.

Zirvə görüşünün sonunda bu təşkilatın 2002-ci il üçün kənd təsərrüfatı və ətraf mühitin qorunması, tarix, mədəniyyət və təsiviri sənət, elm və texnologiya, təhsil və iqtisadiyyat sahəsində mükafatları təqdim olundu. Azərbaycan MEA-nın akademiki, Y.Məmmədəliyev adına Neft Kimyası Prosesləri İnstitutunun direktoru Musa Rüstəmov elm və texnologiya sahəsində mükafat aldı.

İƏT-in yüksək mükafatlarını Türkiyə Respublikasının Prezidenti Əhməd Necdət Sezər təqdim etdi.

Pakistan Prezidenti Pərviz Müşərrəf və İran İslam Respublikasının Prezidenti Məhəmməd Xatəmi çıxış edərək, VII Zirvə görüşünün yüksək səviyyədə təşkilinə görə Türkiyə Prezidenti Əhməd Necdət Sezərə iştirakçılar adından təşəkkür etdilər.

Prezident Əhməd Necdət Sezər zirvə görüşünə yekun vurdu, üzv ölkələrin dövlət başçılarına və təmsilçilərinə minnətdarlığını bildirdi.

Beləliklə, İƏT-in üzvü olan ölkələrin dövlət başçılarının VII Zirvə görüşü başa çatdı. Dövlət başçıları birgə xatirə şəkli çəkdirdilər.

X X X

Oktyabrın 14-də günortadan sonra “Çırağan” sarayında Azərbaycan Prezidenti Heydər Əliyevin Türkiyə Prezidenti Əhməd Necdət Sezər ilə görüşü olmuşdur.

Səmimilik və mehribanlıq şəraitində keçən görüşdə Azərbaycan-Türkiyə əməkdaşlığının perspektivləri, bölgədə vəziyyət, Ermənistan-Azərbaycan münaqişəsinin sülh yolu ilə aradan qaldırılması və hər iki ölkəni maraqlandıran bir sıra digər məsələlər barədə fikir mübadiləsi oldu.

X X X

Azərbaycan Prezidenti Heydər Əliyev elə həmin gün “Çırağan” sarayında Pakistan Prezidenti Pərviz Müşərrəf ilə görüşmüşdür.

Ölkələrimiz arasında əlaqələrin daha da inkişaf etdirilməsinin vacibliyini vurğulayan prezidentlər beynəlxalq aləmdə vəziyyət, Ermənistan-Azərbaycan, Dağlıq Qarabağ münaqişəsinin sülh yolu ilə həlli, terrorizmə və təcavüzkar separatizmə qarşı birgə mübarizənin daha da gücləndirilməsi və hər iki tərəfi maraqlandıran başqa məsələlər ətrafında müzakirələr apardılar.

Prezident Pərviz Müşərrəf dövlətimizin başçısı Heydər Əliyevi Pakistana, Azərbaycan Prezidenti isə Pakistan rəhbərini ölkəmizə rəsmi səfərə dəvət etdilər. Hər iki dəvət məmnunluqla qəbul olundu.

X X X

Oktyabrın 14-də axşam “Çırağan” sarayında Azərbaycan Prezidenti Heydər Əliyev ilə Əfqanıstan Prezidenti Həmid Kərzai arasında görüş keçirilmişdir.

Ölkələrimizin tarixi ənənələrə malik münasibətlərinin daha da möhkəmləndirilməsinin zəruriliyini vurğulayan prezidentlər Azərbaycan-Əfqanıstan əlaqələrinin inkişaf etdirilməsi, beynəlxalq aləmdə vəziyyət, terrorizmə və separatizmə qarşı mübarizənin daha da gücləndirilməsi və hər iki tərəfi maraqlandıran bir sıra digər məsələlər barədə fikir mübadiləsi etdilər.

Prezident Həmid Kərzai Prezident Heydər Əliyevi Əfqanıstana, dövlətimizin başçısı isə Əfqanıstan rəhbərini Azərbaycana rəsmi səfərə dəvət etdilər. Hər iki dəvət razılıqla qəbul olundu.

X X X

Elə həmin gün gecə Azərbaycan Prezidenti Heydər Əliyevin İran Prezidenti Məhəmməd Xatəmi ilə görüşü olmuşdur.

Cənab Xatəmi dövlətimizin başçısını səmimiyyətlə, mehribanlıqla salamladı, onunla hər bir görüşdən çox məmnun qaldığını bildirdi.

Azərbaycan ilə İran arasında bütün sahələrdə qarşılıqlı surətdə faydalı əlaqələrin daha da inkişaf etdirilməsindən razılıqla bəhs edən dövlət başçıları bölgədə vəziyyət, Ermənistan-Azərbaycan, Dağlıq Qarabağ münaqişəsinin sülh yolu ilə aradan qaldırılması və hər iki ölkəni maraqlandıran bir sıra başqa məsələlər haqqında ətraflı müzakirələr apardılar.

Prezident Heydər Əliyev cənab Məhəmməd Xatəminin Azərbaycana rəsmi səfərinin respublikamızda səbirsizliklə gözlənildiyini vurğuladı. İran Prezidenti tezliklə Bakıya səfər edəcəyini bildirdi.

X X X

Oktyabrın 14-də gecə Türkiyə Prezidenti Əhməd Necdət Sezərin adından İƏT-in üzvü olan ölkələrin dövlət başçılarının şərəfinə rəsmi qəbul təşkil olundu. Azərbaycan Prezidenti Heydər Əliyev qəbulda iştirak edirdi.

Aslan Aslanov,

Tural Rzayev

AZƏRTAC-ın xüsusi müxbirləri

İstanbul