AZƏRBAYCAN PREZİDENTİ HEYDƏR ƏLİYEV İSTİRAHƏT GÜNÜ PAYTAXTDA GƏZİNTİYƏ ÇIXMIŞDIR
Azərbaycan Prezidenti Heydər Əliyev noyabrın 3-də paytaxtın mərkəzi hissəsində gəzintiyə çıxmışdır. Dövlətimizin başçısı Bülbül prospektindən keçərkən paytaxt sakinləri ilə səmimi söhbət etdi.
Bakılılar Azərbaycan Prezidentini ürəkdən salamlayır, öz problemlərindən söhbət açırdılar. Uşaqlar isə, həmişə olduğu kimi, Heydər baba ilə bir daha görüşmək fürsətindən duyduqları sevinc və fərəh hisslərini özlərinə xas mehribanlıqla ifadə edirdilər.
Prezident Heydər Əliyev Nizami küçəsində bəzi ticarət obyektlərinə baş çəkdi, camaatın alıcılıq imkanları, malların çeşidi, onların hansı ölkələrdən gətirilməsi ilə maraqlandı.
Dövlətimizin başçısı istirahət günü gəzintiyə çıxmış bir qrup gəncə yaxınlaşdı və onların nə ilə məşğul olduqlarını soruşdu. Azərbaycan Texniki Universitetinin tələbələri Prezident Heydər Əliyevə təhsil şəraitindən danışdılar, qəbul imtahanlarının test üsulu ilə keçirilməsini bəyəndiklərini söylədilər. Türkiyəli sahibkar isə Prezidentə yaxınlaşaraq, xarici iş adamlarının normal fəaliyyəti üçün hər cür şərait yaradan son Fərmanlarına görə təşəkkürünü bildirdi.
Söhbətlər zamanı paytaxt sakinləri Prezident Heydər Əliyevin apardığı məqsədyönlü siyasət sayəsində ölkəmizdə bərqərar edilmiş ictimai-siyasi sabitliyi, əmin-amanlığı yüksək qiymətləndirirdilər. Onlar vurğulayırdılar ki, indi Bakı sakinləri günün istənilən vaxtı qorxub-çəkinmədən şəhərdə asudə gəzə bilərlər.
Dövlətimizin başçısını səmimiyyətlə salamlayanlar arasında əcnəbi qonaqlar da vardı.
Azərbaycan Prezidenti HEYDƏR ƏLİYEV gəzinti zamanı kütləvi informasiya vasitələrinin nümayəndələrinə qısa müsahibə verdi:
- Şəhəri çox yaxşı görürəm. Camaatın əhval-ruhiyyəsini də çox yaxşı görürəm. Mağazalara baxıram, hamısı doludur, o qədər alıcı yoxdur. Çünki indi o qədər mal var ki, insanların çoxu alıb, tələbatını ödəyib, yeni-yeni şeylər istəyirlər.
Şəhər təmizdir, görürəm ki, insanlar bazar günü rahat istirahət edir, gəzirlər. Mənim özüm də burada rahat gəzirəm. Heç kəs bilmirdi ki, mən buraya gələcəyəm. Mənim mühafizə idarəmin rəisi general Axundov da heç bilmirdi ki, evdən çıxanda mən buraya gələcəyəm. Mən işə gedirdim. Amma buradan keçəndə, Bülbül prospektində maşını saxlatdım, oradan da buraya gəlmişəm. Görürəm, camaat, gənclər çoxdur. Yaşlı adamlar da var. Hamısının əhval-ruhiyyəsi yaxşıdır. Heç bir şikayət də eşitmirəm. Çoxları mənə yaxınlaşır, öz minnətdarlıqlarını bildirir ki, belə rahat yaşayırlar. Buna görə çox məmnunam. Şəhər gözəldir, çox gözəldir. Mən Bakı şəhəri ilə həmişə fəxr etmişəm. Amma indi, son dövrdə şəhər daha da gözəlləşib, müasirləşibdir. Ticarətin, mağazaların özəlləşdirilməsi şəhərin küçələrinə çox, yeni bir gözəllik veribdir. Çünki, hər bir mağaza sahibi çalışır ki, öz mağazasını daha da gözəl etsin, cazibədar etsin ki, onun malı satılsın. Deməli, bazar iqtisadiyyatı burada bizə hərtərəfli fayda verir.
SUAL: Cənab Prezident, bu gəzintidən sonra şəhərin abadlaşması istiqamətində hansısa konkret qərarlar, göstərişlər olacağı gözlənilirmi?
CAVAB: Bilirsiniz, bunun üçün elə bir qərar lazım deyildir. Mən qərarlar vermişəm. Əsas məsələ bu qərarların icrasıdır. Ötən illər o qərarların icrası qənaətbəxs deyildi, mən bundan narazı idim. İndi mən Bakıya yeni icra hakimiyyəti başçısı təyin etmişəm, Hacıbala Abutalıbov bu işlərlə çox yaxşı məşğul olur. Bunun üçün xüsusi qərar lazım deyildir. Bir halda ki, iş yaxşı gedir, onda yeni bir qərar qəbul etməyə ehtiyac yoxdur. O yerdə ki, iş yaxşı getmir, yaxud orada hansısa əlavə bir tədbir görmək lazımdır, onda qərar qəbul olunur. Qərar qəbul olunubdur, indi icra edilir. Güman edirəm ki, bundan sonra daha da yaxşı olacaqdır.
X X X
Respublikamızın rəhbəri onunla görüşmək və söhbət etmək istəyən hər kəsi diqqətlə dinləyirdi. Füzulu rayonundan olan qaçqın dövlətimizin başçısına öz problemlərindən danışdı. Prezident Heydər Əliyev ona müraciət edənlərin hamısını dinləyərək, konkret tədbirlər görmək üçün Bakı Şəhəri İcra Hakimiyyətinin başçısı Hacıbala Abutalıbova müvafiq tapşırıqlar verdi.
Gəzinti zamanı Prezident Bakının memarlığının gözəlliyinə diqqət yetirir, paytaxtın müasir simasının yaxşılaşdırılması ilə bağlı öz arzu və istəklərini bildirirdi.
Sonra dövlətimizin başçısı bakılıların sevimli istirahət guşələrindən biri olan Nizami meydanına gəldi. Paytaxt sakinləri Azərbaycan Prezidentini burada da böyük hörmət və məhəbbətlə salamladılar.
Prezident Heydər Əliyevin şəhərdə növbəti gəzintisi göstərdi ki, xalqla hər bir görüş, qeyri-rəsmi şəraitdə səmimi söhbət hamıda - camaatda da, dövlət başçısında da xoş əhval-ruhiyyə doğurur.
Paytaxtda gəzinti Nizami adına Azərbaycan Ədəbiyyatı Muzeyinin yanında başa çatdı. Dövlətimizin başçısı şəhər sakinləri ilə mehribancasına sağollaşdı. Bakılılar Prezidenti alqışlarla yolu saldılar.
Foto Rafiq Bağırovundur
Bölmənin digər xəbərləri
