AZƏRBAYCAN PREZİDENTİ HEYDƏR ƏLİYEV TÜRKİYƏ NÜMAYƏNDƏ HEYƏTİNİ QƏBUL ETMİŞDİR
Azərbaycan Respublikasının Prezidenti Heydər Əliyev iyulun 11-də Prezident sarayında Türkiyə Silahlı Qüvvələri quru qoşunlarının komandanı, ordu generalı Hilmi Özkökü və onun başçılıq etdiyi nümayəndə heyətini qəbul etmişdir.
Qonaqları səmimiyyətlə salamlayan, onun dəvətini qəbul edib Azərbaycana gəldiyinə görə təşəkkür edən dövlətimizin başçısı HEYDƏR ƏLİYEV onların Bakıda keçirdikləri görüşlərdən xəbəri olduğunu bildirdi və dedi ki, mən sizi dəvət edəndə istəyirdim daha çox istirahət edəsiniz, Azərbaycanı görəsiniz. Siz çox illər bundan öncə bir dəfə Azərbaycanda olmusunuz. Ona görə, heç olmasa, indi Bakını görmək imkanınız olub və hələ bir-iki gün də olacaqdır.
Azərbaycan Prezidenti Türkiyəyə bu yaxınlardakı işgüzar səfərindən danışaraq, İstanbulda, Ankarada və Qarsda keçirdiyi görüşləri və apardığı danışıqları, o cümlədən Türkiyə Silahlı Qüvvələri Baş Qərargahındakı görüşü xatırladı. Respublikamızın rəhbəri dedi ki, indiyədək bu qədər gözəl görüş olmamışdı. Türkiyə Silahlı Qüvvələrinin ən yüksək generalları, zabitləri, yüksək vəzifə sahibləri ilə çox səmimi görüşüm oldu. Mən bundan çox məmnunam. Ümumiyyətlə, bir həftəni Türkiyədə keçirdim. Artıq bu, mənim üçün adət olubdur. Bir neçə aydan sonra bir hadisə ilə əlaqədar Türkiyəyə gələcəyəm. Amma imkan olmasa, bir ildən sonra mütləq gəlib bir həftəni Türkiyədə keçirəcəyəm. Artıq bu, mənim proqramımdır. Sizin bu səfərinizi çox əhəmiyyətli hesab edirəm. Məqsədimiz həm ölkələrimiz, xalqlarımız arasında, həm də silahlı qüvvələr arasında əlaqələri inkişaf etdirməkdir.
Onları dəvət etdiyinə və səmimi qəbula görə respublikamızın rəhbərinə təşəkkür edən ordu generalı HİLMİ ÖZKÖK bu görüşün onun üçün və bütün Türkiyə Silahlı Qüvvələri üçün böyük şərəf, qürur olduğunu bildirdi. O, Azərbaycan Prezidentinə müraciətlə dedi: Hörmətli Cümhur başqanım, Sizin liderliyinizlə Azərbaycanın on il ərzində haradan-haraya gəldiyini çox yaxşı gördüm. İnsan bir şeyi hər gün görürsə, böyük dəyişiklikləri duymur, amma on illik fasilədən sonra Azərbaycanı gördüyüm zaman heyrət içində qaldım və qəlbim təqdir duyğuları ilə doldu. Hər şey o qədər gözəl olmuşdur ki, insanların üzündəki məmnuniyyət, əsgərlərin özlərinə güvənmələri, iş görmələri, Silahlı Qüvvələrin gücü - bütün bunlar hər sahədə çox böyük dəyişikliklər baş verdiyini aşkar göstərir. Bunların zati-alinizin böyük öndərliyi ilə əldə olunduğunu hər kəs bilir.
Cənab Prezident, Sizin çox gözəl ifadə etdiyiniz kimi, biz “bir millət iki dövlətik”. Böyük Atatürkün ifadə etdiyi kimi, “Azərbaycanın Sevinci bizim sevincimiz, kədəri bizim kədərimiz”dir. Amma indi görürük ki, kədərlər azalmış, sevinclər çoxalmışdır. Allah Sizə uzun ömür versin. Azərbaycan çox qısa zamanda daha da inkişaf edəcəkdir. Azərbaycan beynəlxalq aləmdə müstəqil bir dövlət kimi hər gün irəliyə getməkdədir. Azərbaycanın torpaqlarının 20 faizinin işğaldan azad edilməsi sahəsində bizim siyasətimizi və ürəyimizi bilirsiniz. Ən böyük arzumuz Sizin böyük öndərliyinizlə bu məsələnin süly yolu ilə həll edilməsi, Azərbaycanın ərazi bütövlüyünü təmin olunması, iqtisadiyyatı güclü olan bir dövlət kimi irəliləməsidir.
Xoş sözlərə görə hörmətli qonağa təşəkkür edən Prezident HEYDƏR ƏLİYEV ötən on il ərzində Azərbaycanın bütün sahələrdə böyük məsafə qət etdiyini, eyni zamanda ölkəmizin ən ağrılı problemi olan Ermənistan-Azərbaycan münaqişəsinin hələ həll edilmədiyini, xalqımızın müharibə şəraitində yaşadığını vurğuladı. Respublikamızın rəhbəri vaxtilə ölkəmizin daxilində müxtəlif silahlı qüvvələrin hakimiyyət uğrunda mübarizəsinin acı nəticələrindən bəhs edərək dedi: Torpaqlarımızın Ermənistan tərəfindən işğal olunmasının əsas səbəblərindən biri odur ki, o vaxt xalqımızı, millətimizi,-baxmayaraq ki, ordumuz yox idi, amma xalqımız güclü, qeyrətli xalqdır,- birləşdirib torpaqlarımızın müdafiəsinə yönəltmək əvəzinə, Azərbaycanı parçalamağa başladılar. Ermənilər də bundan çox məharətlə istifadə etdilər. Onlar son zamanlar bunu açıq deyirlər ki, torpaqların işğal olunmasında günahkar daha çox Azərbaycanın özüdür ki, daxildə mübarizə apararaq imkan verdi, ermənilər bəzi yerlərdə hətta heç bir müqavimət olmadan torpaqlarımızı işğal edə bildilər.
Dövlətimizin başçısı vurğuladı ki, bu problemi həll edə bilməsək də, böyük işlər görmüşük, iqtisadiyyatımız inkişaf edir, ölkədə sabitlik yaranıbdır. Azərbaycan iqtisadiyyatında əldə edilmiş uğurlardan danışan
Prezident Heydər Əliyev nəhəng regional layihələrin həyata keçirildiyini də bildirdi, Bakı-Tbilisi-Ceyhan neft və Bakı-Tbilisi-Ərzurum qaz kəmərlərindən söhbət açaraq dedi ki, bunların həm iqtisadi, həm də siyasi əhəmiyyəti vardır. Biz böyük bir qurşaqla Türkiyə ilə Azərbaycanı birləşdiririk. Özü də elə birləşdiririk ki, onu heç vaxt qırmaq olmaz. Bizdə qaz ehtiyatı çoxdur, Türkiyəni də təmin edəcəyik, hətta Türkiyədən Avropaya da qaz verəcəyik. Qəbulda müdafiə naziri general-polkovnik Səfər Əbiyev, Prezidentin Katibliyinin rəisi Dilarə Seyidzadə Türkiyənin ölkəmizdəki səfiri Əhməd Ünal Çeviköz və digər rəsmi şəxslər iştirak edirdilər.
Foto Yaşar Xəlilovundur
Bölmənin digər xəbərləri
