AZƏRBAYCAN PREZİDENTİ HEYDƏR ƏLİYEVƏ KIRIKQALA UNİVERSİTETİNİN FƏXRİ DOKTORU ADI VERİLMİŞDİR
Respublikamızın Ankaradakı səfirliyindən AZƏRTAC-a bildirmişlər ki, Azərbaycan Prezidenti Heydər Əliyev Türkiyənin müdafiə sənayesi mərkəzi kimi tanınan Kırıkqala şəhərində yerləşən, bu ölkənin ən məşhur təhsil ocaqlarından biri olan Kırıkqala Universitetinin fəxri doktoru adına layiq görülmüşdür.
Universitetin rektoru professor Təhsin Nuri Durlunun səfirliyə göndərdiyi məktubda deyilir ki, universitetin senatı Azərbaycan Prezidenti Heydər Əliyevə fəxri doktor adı verilməsi barədə bu təhsil ocağının Sosial Elmlər İnstitutunun təklifini müzakirə etmişdir. Senat görkəmli siyasi xadim və dövlət xadimi, Azərbaycan Respublikasının Prezidenti Heydər Əliyevə dünya siyasətindəki və türk dünyası qarşısındakı böyük xidmətlərinə görə beynəlxalq münasibətlər sahəsində fəxri doktor adının verilməsi barədə yekdilliklə qərar qəbul etmişdir.
Bölmənin digər xəbərləri
