AZƏRBAYCAN PREZİDENTİ HEYDƏR ƏLİYEVİN AFR-İN FEDERAL KANSLERİ HELMUT KOL İLƏ GÖRÜŞÜ
Dövlətimizin başçısı Heydər Əliyevi mehribanlıqla və səmimiyyətlə salamlayan cənab Helmut Kol son vaxtlar Azərbaycanda hüquqi demokratik dövlət quruculuğu sahəsində görülən işləri diqqətlə izlədiyini və Almaniyanın bütün bunları dəstəklədiyini bildirdi.
Federal kansler İkinci dünya müharibəsində qələbənin 50 illik yubileyi münasibətilə Parisdə və Moskvada keçirilən mərasimlərdə Heydər Əliyev ilə görüşlərini məmnunluqla xatırladığını söylədi.
Səmimi sözlərə görə və AFR-ə səfəri zamanı ona göstərilən qonaqpərvərliyə və mehribanlığa görə minnətdarlığını bildirən və federal kanslerlə əvvəlki görüşlərini həmişə xatırladığını nəzərə çarpdıran Prezident Heydər Əliyev Azərbaycanda mövcud ictimai-siyasi vəziyyət, hüquqi demokratik dövlət quruculuğu istiqamətində aparılan islahatlar barədə geniş söhbət açdı. Bazar iqtisadiyyatı yolunun Azərbaycan üçün strateji yol olduğunu vurğulayan dövlətimizin başçısı ölkəmizin iqtisadiyyatının dünya iqtisadiyyatı ilə sıx bağlanması istiqamətində görülən işlərdən bəhs edərək dedi ki, biz Almaniya ilə də bütün sahələrdə ikitərəfli əlaqələrin inkişaf etdirilməsinə xüsusi diqqət yetiririk.
Respublikamıza sərmayə qoyan bütün şirkətlərlə sıx münasibətlər yaradılmasına böyük maraq bəsləyən ölkəmizdə Almaniyanın bir çox şirkətlərinin də geniş fəaliyyət göstərməsindən və onlar üçün hər cür şərait yaradılmasından bəhs edən Prezident Heydər Əliyev Azərbaycanın zəngin təbii ehtiyatlara malik olmasından da ətraflı söhbət açdı. Alman şirkətlərinin Azərbaycanla qədim tarixi əlaqələri olmasını xatırladan dövlətimizin başçısının fikrincə, bu əlaqələr bu gün daha da canlandırılmalı və bütün sahələrdə əməkdaşlıq inkişaf etdirilməlidir.
Müstəqil Azərbaycan Respublikası ilə əlaqələrə Almaniyanın böyük maraq göstərdiyini nəzərə çarpdıran cənab Helmut Kol respublikamızda islahatların gedişindən razılıqla söhbət açaraq, bir çox sahələrdə konkret layihələrin reallaşdırılması üçün AFR-in ölkəmizə lazımi kömək etmək niyyətində olduğunu bildirdi. O, “TRASEKA” proqramının həyata keçirilməsi sahəsində görülən işləri yüksək qiymətləndirdi.
Görüş zamanı Ermənistanın Azərbaycana təcavüzündən ətraflı söhbət açıldı. Prezident Heydər Əliyev münaqişənin sülh yolu ilə həll edilməsi istiqamətində ATƏT-in Minsk qrupunun xətti və böyük dövlətlərin vasitəçiliyi ilə, habelə ikitərəfli aparılan danışıqlardan bəhs edərək, problemin aradan qaldırılması sahəsində ölkəmizin irəli sürdüyü şərtləri şərh etdi. Respublikamızın rəhbəri əmin olduğunu bildirdi ki, Almaniya beynəlxalq təşkilatlarda, xüsusən ATƏT-in Minsk qrupu çərçivəsində bundan sonra aparılacaq danışıqlarda da Azərbaycanın haqq işini dəstəkləyəcəkdir. Dövlətimizin başçısı dedi ki, biz Almaniyaya böyük tərəfdaş kimi baxır və ölkələrimiz arasında münasibətlərin daha sürətlə inkişaf etməsini arzulayırıq. Prezident Azərbaycan qaçqınlarına edilən yardım üçün Almaniya hökumətinə minnətdarlığını bildirdi.
Cənab Helmut Kol Azərbaycanın qarşılaşdığı çətinliklərdən, qaçqınların ağır vəziyyətdə yaşamasından xəbərdar olduğunu söylədi və dedi ki, Almaniya öz imkanları daxilində Azərbaycana yardımı bundan sonra da davam etdirəcəkdir. Federal kansler dedi ki, Almaniya Ermənistan-Azərbaycan münaqişəsinin ATƏT çərçivəsində sülh yolu ilə həllində Azərbaycanın mövqeyinin dəstəklənməsində səylərini daha da artıracaqdır. Bu münaqişənin beynəlxalq hüquq normaları çərçivəsində həllinin vacibliyini nəzərə çarpdıran Helmut Kol ölkələrin sərhədlərinin dəyişdirilməsinin yolverilməz olduğunu bildirdi.
Bu fikirlərə görə AFR-in dövlət və hökumət rəhbərlərinə minnətdarlığını bildirən Prezident Heydər Əliyev münaqişənin həlli ilə əlaqədar aparılan ikitərəfli danışıqlardan bəhs edərək, Ermənistan Prezidenti Levon Ter-Petrosyanla bu ilin aprelində Lüksemburqdakı görüşündən və imzalanmış birgə bəyanatdan da söhbət açdı.
Prezident Heydər Əliyev və federal kansler Helmut Kol regionda və bütövlükdə dünyada gedən proseslər barədə geniş fikir mübadiləsi apardılar. Tərəflər Almaniya-Azərbaycan əməkdaşlığının daha da sıxlaşdırılması və möhkəmləndirilməsi üçün lazım olan bütün tədbirlərin görüləcəyinə öz inamlarını ifadə etdilər. Söhbət zamanı bir sıra digər məsələlər də nəzərdən keçirildi.
Bölmənin digər xəbərləri
