AZƏRBAYCAN PREZİDENTİ HEYDƏR ƏLİYEVİN ALMANİYAYA RƏSMİ SƏFƏRİ DAVAM EDİR
Elə həmin gün günortadan sonra Prezident Heydər Əliyev və səfərdə onu müşayiət edən nümayəndə heyətinin üzvlərini gətirən təyyarə Bonn hava limanına endi. Alman torpağında dövlətimizin başçısını mehribanlıqla, gül-çiçəklə qarşıladılar. Azərbaycan Prezidenti Heydər Əliyev fəxri motosikletçilər dəstəsinin müşayiəti ilə onun üçün ayrılmış rəsmi iqamətgaha yola düşdü.
Səfər proqramında nəzərdə tutulan ilk görüş Almaniyadakı Azərbaycan Cəmiyyətləri Federasiyasının üzvləri ilə oldu. Bu ölkədə yaşayan soydaşlarımız Prezidentə özlərinin həyatından, fəaliyyətindən danışdılar. Prezident Heydər Əliyev Azərbaycandakı ictimai-siyasi vəziyyət, Ermənistanın hərbi təcavüzü nəticəsində xalqımızın başına gəlmiş bəlalar barədə danışdı, müharibəyə sülh yolu ilə son qoymaq naminə görülən işdən söhbət açdı, ölkəmizin mövqeyini açıqladı. O, Almaniyadakı soydaşlarımızın bir ictimai təşkilatda - federasiyada birləşərək fəaliyyət göstərmələrindən məmnun qaldığını bildirdi.
Bu yaxınlarda yaradılmış Almaniya-Azərbaycan forumunun üzvləri ilə görüş də maraqlı keçdi. Forumun sədr müavini cənab Kesler dövlətimizin başçısını səmimi salamlayaraq, həmin qurumun məqsəd və vəzifələrindən bəhs etdi. Forumun rəyasət heyətinin üzvü xanım Kristina bildirdi ki, o, tibb mütəxəssisidir və Azərbaycanda çalışmaq istəyir. Rəyasət heyətinin digər üzvü - cənab Brügeman humanitar təşkilat adından azərbaycanlı qaçqınlara yardım məqsədilə 100 yerlik səhra xəstəxanası üçün tibb avadanlığı ayrılması barədə təqdimatı Prezidentə verdi.
Azərbaycanda sabit ictimai-siyasi vəziyyət yarandığını bildirən dövlətimizin başçısı forumun üzvlərini respublikamıza sərmayə qoymağa çağırdı və onları ölkəmizə dəvət etdi. Həmin gün axşam Prezident Heydər Əliyevin iqamətgahında ictimaiyyət nümayəndələri olan alman və azərbaycanlıların görüşü keçirildi. Azərbaycan Prezidenti görüş iştirakçıları qarşısında çıxış etdi.
Səfərin ikinci gününün proqramı daha geniş idi. İyulun 2-də dövlətimizin başçısı Heydər Əliyev Almaniya Prezidenti Roman Hersoq, federal kansler Helmut Kol, xarici işlər naziri Klaus Kinkel, Bundestaq sədrinin müavini, Bundestaqın Qafqaz parlament qrupunun üzvləri, siyasi partiyaların nümayəndələri ilə görüşlər keçirdi.
Prezident Heydər Əliyevin Almaniyanın xarici işlər naziri Klaus Kinkel ilə görüşü zamanı tərəflər həmin gün dövlətimizin baçısının Prezident Roman Hersoq və kansler Halmut Kol ilə apardığı danışıqları ölkələrimiz arasında münasibətlərin genişləndirilməsində yeni mərhələ kimi qiymətləndirdilər.
İyulun 2-də Heydər Əliyevin və Klaus Kinkelin iştirakı ilə Azərbaycanla Almaniya arasında siyasi, iqtisadi, maliyyə, mədəniyyət və s. sahələrdə əməkdaşlıq haqqında sənədlər imzalandı. Cənab Kinkel Prezident Heydər Əliyevi əmin etdi ki, gələcəkdə Azərbaycan Respublikası özünün bir sıra problemlərinin həllində Almaniyaya ümid bəsləyə bilər. Çünki indən belə iki ölkənin qarşılıqlı münasibətləri konkret hüquqi sənədlərlə tənzimlənir.
Almaniya parlamentinin nümayəndələri ilə Heydər Əliyevin görüşlərində belə bir fikir səsləndi ki, Azərbaycanın Avropaya inteqrasiyası, onun Avropa parlamentində təmsil olunması, öz istiqlaliyyətini böyük səylə qoruması Qərbdə rəğbətlə qarşılanır.
Azərbaycan Prezidenti Heydər Əliyevin Almaniyaya rəsmi səfəri davam edir.
Bölmənin digər xəbərləri
