AZƏRBAYCAN PREZİDENTİ HEYDƏR ƏLİYEVİN GÜRCÜSTAN PREZİDENTİ EDUARD ŞEVARDNADZE İLƏ GÖRÜŞÜ
İki qonşu dövlətin başçıları mehribanlıqla, səmimiyyətlə görüşərək, ölkələrimiz arasındakı əlaqələrin hazırkı inkişafından razı qaldıqlarını bildirdilər və əməkdaşlığın genişləndirilməsi sahəsində bir sıra vacib məsələlərin həllində müntəzəm keçirilən belə görüşlərin çox faydalı olduğunu nəzərə çarpdırdılar.
Tarixi dostluq ənənələrinə malik olan xalqlarımızın münasibətlərinin daha da yaxşılaşdırılmasında iqtisadi ənənələrin sıxlaşdırılmasının böyük əhəmiyyətini vurğulayan Prezident Heydər Əliyev iki qonşu respublikanın bir çox sahələrdə əməkdaşlığının daha da möhkəmləndirilməsi üçün mövcud imkanlardan səmərəli istifadə edilməsinin vacib olduğunu bildirdi. Ölkələrimizin hər biri üçün həyati əhəmiyyət daşıyan məsələlərin bir sıra beynəlxalq təşkilatlarda müzakirəsində respublikalarımızın bir-birinə mənəvi kömək göstərməsindən razılıqla bəhs edən dövlətimizin başçısı Ermənistan-Azərbaycan münaqişəsinin aradan qaldırılması üçün ATƏT-in Lissabon zirvə görüşündə qəbul edilən prinsiplərin Gürcüstanın da dəstəkləməsindən məmnunluqla danışdı.
Avroasiya magistralının işə düşməsinin bir çox dövlətlər, xüsusən Azərbaycan və Gürcüstan üçün çox əhəmiyyətli olduğunu bildirən respublikamızın rəhbəri Heydər Əliyev Qafqazda sülhün və əmin-amanlığın bərqərar edilməsi barədə cənab Şevardnadze ilə vaxtilə birgə imzaladıqları bəyannamədən də söhbət açdı.
Prezident Heydər Əliyevin rəhbərliyi ilə son illər Azərbaycanda demokratik dövlət quruculuğu sahəsində görülən işlərin və həyata keçirilən islahatların bir çox nüfuzlu ölkələr tərəfindən rəğbətlə qarşılandığını və nəticədə dünya birliyinin Azərbaycana böyük maraq bəslədiyini bildirən cənab Şevardnadze respublikalarımızın əməkdaşlığının durmadan inkişafına cənab Heydər Əliyevin göstərdiyi diqqətdən razılıqla bəhs etdi. O, Xəzərin Azərbaycan sektorundakı yataqların birgə işlənməsi üçün xarici ölkələrin ən nüfuzlu şirkətləri ilə ARDNŞ arasında imzalanmış tarixi müqavilələrdən söhbət açaraq, bu yataqlardan hasil ediləcək neftin dünya bazarına çıxarılması ilə əlaqədar neft kəmərlərindən birinin Gürcüstandan keçməsinə göstərdiyi köməyə görə dövlətimizin başçısına bir daha minnətdarlıq etdi.
Söhbət zamanı Azərbaycan-Gürcüstan əməkdaşlığının perspektivləri nəzərdən keçirildi. Ermənistan-Azərbaycan münaqişəsinin ATƏT-in Minsk qrupu vasitəsilə həlli üçün görülən işlər barədə fikir mübadiləsi aparıldı.
Görüşdə Azərbaycan Baş nazirinin müavini Abid Şərifov, ölkəmizin Türkiyədəki səfiri Məmməd Əliyev və digər rəsmi şəxslər iştirak edirdilər.
Bölmənin digər xəbərləri
