AZƏRBAYCAN PREZİDENTİ HEYDƏR ƏLİYEVİN NORVEÇİN “KVERNER” ŞİRKƏTİNİN PREZİDENTİ İLƏ GÖRÜŞÜ
Azərbaycan dövlətinin başçısını mehribanlıqla salamlayan cənab Korstye məlumat verdi ki, Norveç iqtisadiyyatının inkişafında neft başlıca rol oynayır. O dedi ki, ölkədə neft sənayesi 1964-cü ildən inkişaf etməyə başlamışdır. Həmin il Şimal dənizinin Norveçə aid hissəsində zəngin neft yataqları aşkara çıxarılmışdır. Ötən il Norveçdə təxminən 140 milyon ton neft çıxarılmışdır. Son vaxtlar Norveç Avropada üç ən iri neft istehsalçısından biri sayılır. Ölkənin ümumi milli məhsulunun təqribən 16 faizini və ixracının yarısından çoxunu neft təşkil edir.
Ölkəmizlə əlaqələr qurulmasında “Kverner”ə göstərilən kömək üçün dövlətimizin başçısına minnətdarlığını bildirən cənab Korstye bu şirkətin fəaliyyəti haqqında Prezident Heydər Əliyevə geniş məlumat verdi. O dedi ki, şirkət neft və qaz hasilatı, neft maşınqayırma sənayesi sahəsində, elektrik stansiyalarının və platformaların tikilməsində böyük təcrübəyə malikdir. Şirkətin rəhbəri “Kverner”in Azərbaycanla əlaqələrə böyük üstünlük verdiyini nəzərə çarpdırdı.
Cənab Korstyenin məlumatını diqqətlə dinləyən Prezident Heydər Əliyev neft sahəsində qədim ənənələri olan ölkəmizin bu gün Norveç neftçiləri ilə sıx əlaqələrinə ciddi ehtiyac olduğunu bildirdi. Dünyada neftin sənaye üsulu ilə ilk dəfə Bakıda çıxarıldığını və Azərbaycanda neft sənayesi sahəsində zəngin təcrübə olduğunu xatırladan dövlətimizin başçısı əlavə etdi ki, “Statoyl” və ümumiyyətlə, Norveç neftçiləri qısa vaxtda ən müasir texnika və texnologiyaya sahib olmuşlar, ona görə də biz həm “Kverner”lə, həm də ölkənizin digər şirkətləri ilə əməkdaşlığa xüsusi fikir veririk.
Görüşdə Avropa Yenidənqurma və İnkişaf Bankının ayırdığı kreditlə ölkəmizdə tikiləcək “Yenikənd” su elektrik stansiyasının inşası ilə bağlı məsələlər ətrafında geniş müzakirələr aparıldı. Prezident Heydər Əliyev dedi ki, biz “Kverner”in su elektrik stansiyaları tikintisi sahəsindəki işindən xəbərdarıq və buna görə də belə hesab edirik ki, sizin şirkət “Yenikənd” SES-in tikintisini də dünya standartları səviyyəsində aparacaqdır.
Azərbaycanda iqtisadi islahatların həyata keçirilməsi ilə əlaqədar tədbirlərdən bəhs edən dövlətimizin başçısı dedi ki, ölkəmizin strateji yolu bazar münasibətləri yoludur və biz xarici şirkətlərlə sıx əlaqələr qurmağa böyük üstünlük veririk. Qərbin ən nüfuzlu şirkətlərinin, o cümlədən “Statoyl”un da iştirak etdiyi “Əsrin müqaviləsi”ndən geniş söhbət açan Prezident Heydər Əliyev bildirdi ki, biz xarici ölkələrin iş adamlarının ölkəmizə investisiya qoymaları üçün hər cür şərait yaratmışıq. İndi Azərbaycan öz iqtisadiyyatının dünya iqtisadiyyatı ilə sıx bağlanması yolunda mühüm addımlar atmışdır. Dünyanın bütün ölkələrində iş adamları respublikamızın təbii ehtiyatlarına, zəngin potensialına böyük maraq göstərir və biz onların hamısı ilə, o cümlədən Qərbi Avropanın demokratik ölkələrindən biri olan Norveçin şirkətləri, iş adamları ilə sıx əlaqələr qururuq və bu yolu bundan sonra da davam etdirəcəyik.
Bölmənin digər xəbərləri
