RƏSMİ XRONİKA
AZƏRBAYCAN PREZİDENTİ HEYDƏR ƏLİYEVİN PARİS ŞƏHƏRİNİN MERİ İLƏ GÖRÜŞÜ
Cənab Tierini səmimiyyətlə qarşılayan Prezident Heydər Əliyev üç il bundan əvvəl mərhum Prezident Fransua Mitteranın rəsmi dəvəti ilə Fransada rəsmi səfərdə olduğunu xatırlatdı və müstəqil Azərbaycanla Fransa arasındakı əlaqələrin inkişafından razılıqla bəhs etdi.
Xəzərin Azərbaycan sektorundakı “Lənkəran-dəniz” və “Talış- dəniz” yataqlarının birgə işlənməsi barədə ARDNŞ və “Elf Akiten” və “Total” şirkətləri arasında Yelisey sarayında hər iki ölkə prezidentlərinin iştirakı ilə imzalanmış müqavilədən bəhs edən respublikamızın rəhbəri bu sənədin ölkələrimiz arasındakı münasibətlərin inkişafında mühüm rol oynayacağına əmin olduğunu bildirdi.
Azərbaycan Prezidenti Heydər Əliyevlə görüşündən şərəf duyduğunu bildirən cənab Tieri Fransa ilə Azərbaycan əlaqələrinin inkişafında hər iki dövlət başçısı arasındakı şəxsi dostluq münasibətlərinin xüsusi əhəmiyyətini nəzərə çarpdırdı. O, Paris ilə Bakı arasında əlaqələr qurulmasının və hər iki paytaxtın bələdiyyə strukturlarının işi haqqında informasiya mübadiləsinin vacib olduğunu bildirdi. Dövlətimizin başçısı Heydər Əliyev respublikamızda demokratik hüquqi dövlət quruculuğu sahəsində görülmüş işlərdən bəhs etdi. Sonra Prezident Ermənistanın Azərbaycana hərbi təcavüzündən ətraflı söhbət açdı. Respublikamızın rəhbəri dedi ki, Ermənistan silahlı qüvvələrinin ölkəmizə təcavüzü nəticəsində torpaqlarımızın 20 faizi işğal olunmuş, bir milyondan çox vətəndaşımız yerindən-yurdundan didərgin düşmüş, Azərbaycanın ərazi bütövlüyünə qəsd edilmişdir.
Prezident Heydər Əliyev münaqişənin sülh yolu ilə həll olunması üçün ATƏT-in Minsk qrupu çərçivəsində və böyük dövlətlərin vasitəsilə aparılan danışıqlardan ətraflı bəhs edərək, müharibədə əldə olunmuş atəşkəsdən də söhbət açdı. Dövlətimizin başçısı münaqişənin aradan qaldırılması sahəsində Azərbaycanın sülh təşəbbüslərindən və ATƏT-in Lissabon Zirvə görüşündə qəbul olunmuş əsas prinsiplərdən də ətraflı danışdı və Ermənistanın Azərbaycana təcavüzü ilə əlaqədar mövcud vəziyyəti xəritə üzərində izah etdi.
Prezident Heydər Əliyev Parisin merini respublikamıza səfərə dəvət etdi. Cənab Tieri dəvəti məmnunluqla qəbul etdi.