AZƏRBAYCAN PREZİDENTİ HEYDƏR ƏLİYEVİN QƏRBİ AVROPA ÖLKƏLƏRİNƏ SƏFƏRİ

23.04.1996 [14:14]
Çap et
A⁺ A^-

Aprelin 21-də Azərbaycan Respublikasının Prezidenti Heydər Əliyev Qərbi Avropa ölkələrinə işgüzar səfərə yola düşmüşdür. Səfər zamanı Azərbaycan Prezidenti Brüsseldə, Belçikada və Norveçdə olacaq, bu ölkələrin dövlət rəhbərləri ilə görüşəcək, Lüksemburqda Avropa Birliyi və onun üzvü olan dövlətlərlə tərəfdaşlıq və əməkdaşlıq sazişi imzalayacaq, Brüsseldə isə NATO ilə “Sülh naminə əməkdaşlıq” proqramı çərçivəsində Azərbaycan Respublikasının prezentasiya sənədini NATO-nun Baş Qərargahında keçiriləcək görüşdə təqdim edəcəkdir.

Prezident Heydər Əliyev yola düşməzdən əvvəl Binə hava limanında müxbirlərin suallarına cavab vermişdir.

Binə hava limanında Azərbaycan dövlətinin başçısını Milli Məclisin sədri Rəsul Quliyev, Baş nazir Fuad Quliyev, Prezidentin İcra Aparatının rəhbəri Ramiz Mehdiyev və digər rəsmi şəxslər yola salmışlar.

X X X

Azərbaycan Prezidenti Heydər Əliyev Lüksemburqa gəldiyi gün - aprelin 21-də axşam Ermənistan Prezidenti Levon Ter-Petrosyanla onun təkbətək görüşü oldu. Görüş zamanı Ermənistan-Azərbaycan münaqişəsinin aradan qaldırılmasına dair geniş müzakirələr aparıldı, ATƏT-in Minsk qrupu çərçivəsində sülh danışıqlarının bərpa olunması və daha səmərəli məcraya yönəldilməsi, habelə Böyük Siyasi Sazişin tezliklə imzalanması və iki ölkə arasında birbaşa dialoqun davam etdirilməsi zərurəti barədə birgə rəsmi məlumat qəbul olundu.

Aprelin 22-də Azərbaycan, Gürcüstan və Ermənistan prezidentlərinin görüşündə Qafqazdakı vəziyyət müzakirə edildi. Bu müzakirədə Almaniyanın xarici işlər naziri Klaus Kinkel də iştirak etmişdir. Prezident Heydər Əliyev Lüksemburqun böyük hersoqu Jan, Böyük Britaniya, Fransa və Finlandiyanın xarici işlər nazirləri ilə də görüşdü.

Günortadan sonra Azərbaycan rəhbəri Avropa Birliyi Komissiyasında oldu. Məlum olduğu kimi, hazırda Lüksemburqda Avropa Birliyinin üzvü olan ölkələrin xarici işlər nazirləri səviyyəsində ənənəvi illik sessiyası keçirilir. Belə bir vaxtda buraya işgüzar səfər etmiş dövlət başçımızın əsas məqsədi Avropa Birliyi ilə ölkəmizin əməkdaşlığına dair sazişi imzalamaq, bununla da birliyin üzvləri ilə Azərbaycan arasında qarşılıqlı surətdə faydalı tərəfdaşlıq üçün normativ hüquqi baza yaradılmasına nail olmaqdır.

Həmin gün Prezident Heydər Əliyev Avropa Birliyi ilə və onun üzvü olan ölkələrlə Azərbaycan Respublikası arasında tərəfdaşlıq və əməkdaşlıq haqqında sazişi, habelə Avropa Birliyinin yekun sənədini imzaladı. Dövlətimizin başçısı təntənəli imzalanma mərasimində çıxış edərək, bu sazişi Azərbaycanın Avropa Birliyinə inteqrasiyası yolunda tarixi addım kimi qiymətləndirdi. Ölkəmizin rəhbəri belə bir fikri də vurğuladı ki, Qafqazın digər iki müstəqil dövləti - Gürcüstan və Ermənistan ilə də Avropa Birliyi arasında əməkdaşlığa dair sazişlərin imzalanması birliyin bu regionda aparılan iqtisadi islahatlara marağını, həm də burada sabitliyə nail olmaq üçün iqtisadi amili ön plana çəkməsini göstərir.

Sənədlərin imzalanması mərasimindən sonra Heydər Əliyev, Eduard Şevardnadze və Levon Ter-Petrosyan birgə mətbuat konfransı keçirdilər.