AZƏRBAYCAN PREZİDENTİ HEYDƏR ƏLİYEVİN TÜRKİYƏYƏ RƏSMİ SƏFƏRİ
Dövlətimizin başçısı yola düşməzdən əvvəl Binə hava limanında jurnalistlərin suallarına cavab verdi.
Azərbaycan Prezidenti Heydər Əliyevi Binə hava limanında Milli Məclisin sədri Murtuz Ələsgərov, Baş nazir Artur Rasizadə, Prezidentin İcra Aparatının rəhbəri Ramiz Mehdiyev, Milli Məclis sədrinin, Baş nazirin müavinləri və digər rəsmi şəxslər yola saldılar.
Azərbaycan Prezidenti Heydər Əliyev Türkiyə Prezidenti Süleyman Dəmirəlin dəvəti ilə mayın 5-də qardaş ölkəyə rəsmi səfərə gəldi.
Ankaranın Esenboğa hava limanında dövlətimizin başçısını təyyarənin pilləkəni yanında Türkiyə Respublikasının Prezidenti Süleyman Dəmirəl mehribanlıqla qarşıladı. Hər iki Prezident xüsusi vertolyotlarla Çankaya köşkünə yollandılar.
Azərbaycan Prezidenti Heydər Əliyev burada onun üçün ayrılmış iqamətgahda qısa istirahətdən sonra Türkiyə Respublikasının banisi, türk dünyasının görkəmli xadimi Mustafa Kamal Atatürkün məqbərəsini ziyarət etdi, məzarın önünə əklil qoydu. Prezident Heydər Əliyev fəxri qonaqlar üçün xatirə kitabına ürək sözlərini yazdı:
“Bu müqəddəs yeri, Türkiyə Cümhuriyyətinin banisi böyük Mustafa Kamal Atatürkün məzarını yenidən ziyarət edərkən onun ruhu qarşısında baş əyirəm. Onun ölməz xatirəsinə, bəşər tarixindəki xidmətlərinə dərin hörmət və ehtiramımı bildirirəm. Azərbaycan xalqı böyük Atatürkün xatirəsini qəlbində yaşadır, daim yaşadacaqdır. Allah rəhmət eləsin”.
Sonra dövlətimizin başçısı Atatürkün muzeyi ilə tanış oldu.
Prezident Heydər Əliyev öz iqamətgahında Türkiyə Silahlı Qüvvələri Baş Qərargahının rəisi, ordu generalı İsmayıl Haqqı Qaradayı ilə təkbətək görüşdü.
Sonra Azərbaycan Prezidenti Heydər Əliyevin Türkiyəyə rəsmi səfəri ilə əlaqədar Çankaya köşkündə rəsmi qarşılanma mərasimi oldu. Həyətdəki meydanda fəxri qarovul dəstəsi düzülmüşdü. Prezidentlər Heydər Əliyev və Süleyman Dəmirəl fəxri tribunaya qalxdılar. Toplardan yaylım salam atəşi açıldı.
Azərbaycan Respublikasının və Türkiyə Respublikasının dövlət himnləri ifa olundu. Fəxri qarobul dəstəsinin rəisi Prezident Heydər Əliyevə raport verdi. Prezidentlər fəxri qarovul dəstəsinin qarşısından keçdilər, Türkiyənin və Azərbaycanın dövlət bayraqları önündə baş əydilər. Prezident Heydər Əliyev türk əsgərlərini salamladı.
Qarşılanma mərasimində iştirak edən Türkiyə Respublikasının rəsmi şəxsləri Prezident Heydər Əliyevə təqdim olundu. Türkiyə Prezidenti Süleyman Dəmirəl isə Azərbaycan nümayəndə heyətinin üzvləri ilə salamlaşdı.
Rəsmi qarşılanma mərasimi qurtardıqdan sonra prezidentlər mətbuat üçün qısa bəyanatlar verdilər.
Rəsmi qarşılanma mərasimindən sonra dövlət başçılarının təkbətək görüşü oldu.
Sonra prezidentlərin rəhbərliyi ilə iki dövlətin nümayəndə heyətləri arasında danışıqlar aparıldı. Danışıqlar başa çatdıqdan sonra Azərbaycan Prezidenti Heydər Əliyev və Türkiyə Prezidenti Süleyman Dəmirəl ölkələrimiz arasında strateji əməkdaşlığın dərinləşdirilməsi haqqında bəyannamə imzaladılar. Müxtəlif sahələrdə Azərbaycan-Türkiyə əməkdaşlığının genişləndirilməsinə dair daha 7 sənəd imzalandı.
Sənədlərim imzalanması mərasimindən sonra Prezident Süleyman Dəmirəl və Prezident Heydər Əliyev bəyanatla çıxış etdilər.
Mayın 5-də Ankarada Azərbaycan Respublikasının Prezidenti Heydər Əliyevə Türkiyə Respublikasının ən yüksək mükafatı - “Dövlət nişanı” təqdim olundu. Ali mükafatı dövlətimizin başçısına Türkiyə Respublikasının Prezidenti Süleyman Dəmirəl təqdim etdi.
Təqdimatdan sonra Süleyman Dəmirəl və Heydər Əliyev çıxış etdilər.
Mayın 5-də axşam Ankarada Azərbaycan Respublikasının Prezidenti Heydər Əliyev Türkiyə Respublikası Baş nazirinin müavini, xarici işlər naziri Tansu Çillər ilə görüşdü.
Azərbaycan Prezidenti Heydər Əliyevin Türkiyəyə rəsmi səfəri davam edir.
Bölmənin digər xəbərləri
