AZƏRBAYCAN PREZİDENTİ HEYDƏR ƏLİYEVİN TÜRKİYƏYƏ RƏSMİ SƏFƏRİ DAVAM EDİR
Dövlətimizin başçısının sonrakı görüşü Bakıda akkreditə edilmiş, iqamətgahları isə Ankarada yerləşən xarici ölkə səfirləri ilə oldu.
X X X
Mayın 6-da Azərbaycan Prezidenti Heydər Əliyev və Türkiyə Prezidenti Süleyman Dəmirəl Ankaranın yaraşıqlı küçələrindən birinə - 3-cü küçəyə Azərbaycan prospekti adı verilməsinə həsr olunmuş təntənəli mərasimdə iştirak etdilər. Paytaxt sakinləri dövlət başçılarını alqışlarla qarşıladılar, onlara gül-çiçək dəstələri təqdim olundu, qurban kəsildi. Mərasimdə Azərbaycan nümayəndə heyətinin üzvləri, Türkiyənin yüksək vəzifəli şəxsləri də iştirak edirdilər.
Hər iki ölkənin dövlət himnləri səsləndikdən sonra Türkiyə paytaxtının bələdiyyə başçısı mərasimi giriş sözü ilə açdı, Ankara ilə Bakı şəhərlərinin qardaşlaşması barədə təklif irəli sürdü.
Sonra Prezident Süleyman Dəmirələ söz verildi. Qardaş ölkənin dövlət başçısı Ankaranın ən gözəl küçələrindən birinə Azərbaycan prospekti adı verilməsi barədə təklifi məmnunluqla qarşıladığını bildirərək dedi ki, bu, təkcə adın dəyişdirilməsi deyil, eyni zamanda, Azərbaycan adına bəslədiyimiz böyük sevginin, sayğının təzahürüdür. Prezident Süleyman Dəmirəl qeyd etdi ki, Azərbaycanın müstəqillik qazanmasından altı ilə yaxın vaxt keçmişdir, ancaq ölkələrimiz arasındakı qardaşlıq duyğularının sayəsində əlaqələrimizin inkişafında altmış illik yol keçmişik. Gələcəkdə bu əlaqələrin daha da inkişaf edəcəyini bildirən Türkiyə dövlətinin başçısı vurğuladı ki, iki qardaş xalqın bir-birini qucaqlaması, bir-biri ilə sevgi içində olması, bir-birinə yardımçı olması qədər gözəl bir şey yoxdur.
Azərbaycan Prezidenti Heydər Əliyev mərasimdə çıxış edərək bu hadisədən çox sevindiyini bildirdi, onu ölkələrimiz arasında dostluğun mühüm təzahürü kimi qiymətləndirdi.
Dövlətimizin başçısı dedi ki, ölkəmiz müstəqillik qazanandan öncə də, indi də Azərbaycanın müxtəlif şəhərlərində gözəl küçələrə Türkiyə ilə bağlı adlar verilmişdir. Belə qərarlar xalqımızın arzu və istəkləri əsasında qəbul olunur. Türkiyə ilə Azərbaycan arasında əlaqələrin daha da dərinləşəcəyini və genişlənəcəyini vurğulayan Prezident Heydər Əliyev ölkələrimizin paytaxtlarının qardaşlaşması haqqında Ankara bələdiyyə başçısının təklifini böyük məmnuniyyətlə qarşıladığını bildirdi.
Prezidentlər Heydər Əliyev və Süleyman Dəmirəl üzərində “Azərbaycan prospekti” sözləri yazılmış lövhənin üzərindəki örtüyü götürdülər, xatirə olaraq şəkil çəkdirdilər.
Elə həmin gün Azərbaycan Prezidenti Heydər Əliyev və Türkiyə Prezidenti Süleyman Dəmirəl respublikamızın Ankaradakı səfirliyinin yeni binasının bünövrəsinin qoyulması mərasimində iştirak etdilər. Bayramsayağı bəzədilmiş ərazidə Azərbaycanın və Türkiyənin dövlət bayraqları dalğalanır, qardaş ölkələrimizin prezidentlərinin portretləri diqqəti cəlb edirdi.
Azərbaycan Respublikasının Ankaradakı fövqəladə və səlahiyyətli səfiri Məmməd Əliyev mərasimdə çıxış edərək, səfirliyimizin yeni binasının tikilməsi üçün belə bir imkan yaradılmasına görə minnətdarlığını bildirdi.
Mərasimdə çıxış edən Prezident Süleyman Dəmirəl Azərbaycanın müstəqillik qazandığı andan Türkiyə tərəfindən tanındığını xatırladaraq dedi ki, səfirliyin yeni binasının bünövrəsinin qoyulması ölkələrimiz arasında dostluq və qardaşlığın əbədi olduğunu sübut edir. Bu sırada Azərbaycan Cümhuriyyəti də, Türkiyə Cümhuriyyəti də əbədidir, yüksələn bayraqlar enməyəcək və ay-ulduzlu bayraqlar Azərbaycanın və Türkiyənin gözəl səmalarını sonsuzluğa qədər süsləməkdə, parlaqlıq verməkdə davam edəcəkdir.
Sonra Azərbaycan Prezidenti Heydər Əliyev çıxış edərək bildirdi ki, yeni tikiləcək bina ölkələrimiz arasında diplomatik əlaqələrin daha səmərəli olmasına kömək edəcəkdir. Dövlətimizin başçısı Azərbaycan səfirliyinə göstərilən qayğıya görə Türkiyə rəhbərliyinə minnətdarlığını bildirdi.
Sonra prezidentlər tikinti sahəsində qoyulmuş mərmər lövhənin üzərindən örtüyü götürdülər. Dövlət başçıları burada xatirə olaraq ağac əkdilər, habelə Azərbaycan səfirliyinin yeni binasının maketi ilə tanış oldular.
Azərbaycan Prezidenti həmin gün Ankaradakı Quru Qoşunları Məktəbinə gəldi. Burada hərarətlə qarşılanan Prezident Heydər Əliyev Türkiyənin müxtəlif mülki və hərbi məktəblərində təhsil alan azərbaycanlı tələbələrlə görüşdü və onların qarşısında nitq söylədi.
Görüşdə Türkiyədəki Azərbaycan lobbisinin rəhbəri Yəhya Taşdələn, habelə Azərbaycan cəmiyyətlərinin başçıları da çıxış etdilər.
Dövlətimizin başçısı mayın 6-da günortadan sonra Bilkənd Universitetində oldu. Dünya şöhrətli həkim, Azərbaycanın yaxın dostu İhsan Doğramacı Prezident Heydər Əliyevi səmimiyyətlə qarşıladı. Azərbaycan Prezidentinin şərəfinə konsert verildi. Konsertdən sonra İhsan Doğramacı və Prezident Heydər Əliyev çıxış etdilər. İhsan Doğramacı Azərbaycan Prezidentinin şərəfinə ziyafət verdi.
Həmin gün Prezident Heydər Əliyev Türkiyə Böyük Millət Məclisinə gəldi. Türkiyə parlamentinin sədri Mustafa Qələmli Azərbaycan Prezidentini səmimi qarşıladı. Sonra Azərbaycan Prezidenti Heydər Əliyev ilə Türkiyə parlamenti sədrinin görüşü oldu. Türkiyə parlamenti nümayəndələrinin də iştirak etdikləri görüşdə Mustafa Qələmli dövlətimizin başçısına onun portretini hədiyyə etdi.
Prezident Heydər Əliyev millət vəkilləri qarşısında geniş nitq söyləyərək, son bir neçə ildə ölkəmizin həyatında baş vermiş dəyişikliklərdən danışdı, çətinliklərə baxmayaraq Azərbaycanın müstəqilliyinin dönməz olduğunu vurğuladı.
Azərbaycan Prezidentinin nitqi dəfələrlə gurultulu və sürəkli alqışlarla qarşılandı. Prezident Heydər Əliyevin böyük rəğbət doğuran nitqini Türkiyənin nüfuzlu partiyalarından olan Demokratik Sol Partiyansıın lideri Bülənd Ecevit tarixi nitq adlandırdı.
Azərbaycan Prezidenti Heydər Əliyevin Türkiyəyə rəsmi səfəri davam edir.
Bölmənin digər xəbərləri
