AZƏRBAYCAN PREZİDENTİ İLHAM ƏLİYEVİN “FİQARO” QƏZETİNƏ MÜSAHİBƏSİ
Xəbər verdiyimiz kimi, Azərbaycan Respublikasının Prezidenti İlham Əliyev mayın 30-da Parisdə, onun üçün ayrılmış iqamətgahda Fransanın ən nüfuzlu nəşrlərindən olan “Fiqaro” qəzetinin müxbiri Pyer Ruslənə müsahibə vermişdir. AZƏRTAC iyunun 2-də qəzetdə dərc olunmuş həmin müsahibənin mətnini oxuculara təqdim edir.
MÜXBİR: Azərbaycan Avropaya qaz təchizatının şaxələndirilməsinə nə kimi kömək göstərə bilər?
İLHAM ƏLİYEV: Biz 1996-cı ildə qazla bağlı proqramımıza başlayanda bu, yalnız Türkiyə və Gürcüstan bazarları üçün nəzərdə tutulmuşdu. Biz Avropanın qaz təchizatının şaxələndirilməsini nəzərdə tutmamışdıq. Bu məsələdə biz heç zaman Avropa bazarını nəzərdən keçirməmişdik. Yeni şəraiti öyrənmək və Avropanı qazla təchiz etmək üçün investisiyamızı şəraitə uyğunlaşdırmaq lazım olacaqdır. Texniki cəhətdən bu, cari ilin sentyabr ayında istifadəyə veriləcək Türkiyə istiqamətindəki yeni qaz kəməri vasitəsilə mümkün olacaq, lakin qazın həcmi hələ kifayət deyildir.
- Siz GUAM sammitində Ukrayna, Gürcüstan və Moldova prezidentləri ilə birgə iştirak etmisiniz. Tərəfdaşlarınız bu təşkilatda bəzən antirus cəbhəsi kimi təqdim olunurlar. Siz də özünüzü bu cür hiss edirsiniz?
- 1997-ci ildə biz GUAM-ın əsasını qoymuşuq, bu təşkilatı kiməsə qarşı fəaliyyət göstərən təşkilat kimi hesab etməmişik. Biz qonşu ölkələrlə münasibətlərimizi gərginləşdirmək siyasəti aparmırıq. Bizim üçün daha əhəmiyyətlisi yeganə zəngin təbii ehtiyatları olan GUAM üzvü kimi bu təşkilatda iştirak etməkdir. Avropa və Asiyanın astanasında yerləşdiyimizdən, bu regionda heç bir nəqliyyat layihəsi Azərbaycanın iştirakı olmadan həyata keçirilə bilməz.
- Qonşu İranın nüvə proqramı ilə bağlı ABŞ-la aralarında baş verə biləcək münaqişənin təhlükəsi Sizi narahat edirmi?
- Bəli. Sabitliyin pozulması bütün regiona öz təsirini göstərə bilər. Bu bizim üçün elə bir məsələ deyil ki, ona istədiyimiz vaxt televiziya vasitəsilə baxaq və yaxud da istəməyəndə söndürək. Biz hesab edirik ki, münaqişə diplomatik vasitələrlə, sülh yolu ilə və xoş məramla həll olunmalıdır.
-ABŞ-la hərbi əlaqələri nəzərə alaraq, İrana hərbi müdaxilə zamanı Azərbaycanın mövqeyi necə olacaq?
- Bütün digər sahələrdə olduğu kimi, ABŞ-la hərbi sahədəki əlaqələrimizdən də məmnunuq. İrana gəldikdə isə, Azərbaycan bu ölkəyə qarşı hərbi əməliyyatları dəstəkləməyəcəkdir. Vaşinqton buna anlaşma ilə yanaşır.
- Erməni separatçılarının nəzarətdə saxladıqları, Azərbaycan ərazisi olan Dağlıq Qarabağla bağlı münaqişənin həll olunacağına ümidiniz varmı?
- Dağlıq Qarabağ Azərbaycan ərazisidir. Bu, BMT tərəfindən, eləcə də, Ermənistan istisna olmaqla, bütün beynəlxalq birlik tərəfindən tanınıbdır. Azərbaycanın ərazi bütövlüyü bərpa olunmalıdır, Ermənistan silahlı qüvvələri işğal edilmiş ərazilərdən çıxarılmalı, etnik təmizləməyə məruz qalmış 1 milyon azərbaycanlı öz torpaqlarına qayıda bilməlidir. Azərbaycan çox böyük iqtisadi inkişaf mərhələsindədir. Ermənistan isə bütün regional layihələrdən təcrid olunmuşdur, rəqabətə davam gətirməyəcək və yoxsulluqdan əziyyət çəkəcəkdir. Ermənistan başa düşməlidir ki, işğalçılıq siyasəti ona heç nə verməyəcəkdir.
- Bəziləri belə hesab edir ki, Dağlıq Qarabağ münaqişəsinin həlli üçün ölkəniz neftdən gələn gəlirləri silahlanmaya sərf edərək, Ermənistana təsir edə bilər?
- Bizim hərbi büdcəmiz artır və ordumuzu müasirləşdiririk. Ermənistan bizimlə rəqabət apara bilməz. Dağlıq Qarabağ bizim bir nömrəli problemimizdir və əlbəttə ki, biz öz hərbi qüvvələrimizi müasirləşdiririk. Amma mən qeyd etmək istərdim ki, bu, bizim qonşularımızda qorxu yaratmamalıdır. Heç bir seçim istisna oluna bilməz, lakin xalqımız sülhsevərdir və qonşularımızla sülh şəraitində yaşamaq istəyirik. Biz heç zaman işğalla barışmayacağıq.
- 2003-cü ilin prezident seçkilərində və ötən ilin noyabr ayında keçirilmiş parlament seçkilərində saxtakarlıq halları olmuşdur. Siz Azərbaycanda demokratiya ilə bağlı çatışmazlıqları deyənlərə nə cavab verərdiniz?
- Prezident seçkilərinin nəticələri şübhə altına alınmadı. Mən səslərin 76 faizini qazandım. Bu gün də ən azı həmin nəticəni əldə edə bilərəm. Müxalifət özünü rüsvay etdi. Parlament seçkilərinə gəldikdə isə, 10 seçki dairəsində qanun pozuntularına yol verilmişdi. Cavabdeh şəxslər cəzalandırılmış, təkrar seçkilər keçirilmişdir. Bəzi tənqidlər doğrudur. Bizdə heç də hər şey mükəmməl deyildir. Müstəqilliyimizi yalnız 15 il bundan qabaq qazanmışıq və indi biz sovet sistemindən tamamilə fərqli bir sistemdə yaşayırıq.
Digər tənqidlər qəbulolunmazdır, çünki onlar ədalətsiz və qərəzlidir. Hər kəs başa düşür ki, inqilabın Azərbaycanda gələcəyi yoxdur, çünki xalq onu dəstəkləmir. Mən sizi əmin edirəm ki, bizdə demokratiyanın səviyyəsi elə deyil ki, qonşu ölkələrə həsəd aparaq.
Bölmənin digər xəbərləri
