AZƏRBAYCAN PROKURORLUĞU: 90 İLLİK ÇƏTİN VƏ ŞƏRƏFLİ YOL
AZƏRTAC xəbər verir ki, oktyabrın 2-də Azərbaycan Prokurorluğunun yaradılmasının 90 illiyi və 1 oktyabr - prokurorluq işçilərinin peşə bayramı günü münasibətilə prokurorluq orqanlarında bir sıra tədbirlər keçirilmişdir.
Baş Prokurorluğun, Respublika Hərbi və Bakı şəhər prokurorluğu orqanlarının nümayəndələri Fəxri xiyabana gələrək, Azərbaycan xalqının ümummilli lideri Heydər Əliyevin xatirəsini anmış, məzarı önünə əklil qoymuşlar.
Görkəmli oftalmoloq alim, akademik Zərifə xanım Əliyevanın da məzarı üzərinə gül dəstələri düzülmüşdür.
Sonra Şəhidlər xiyabanında Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının xatirəsi anılmış, məzarları üzərinə al qərənfillər düzülmüş, “Əbədi məşəl” abidəsinin önünə əklil qoyulmuşdur.
Daha sonra Baş Prokurorluqda prokurorluq işçilərinin peşə bayramı və Azərbaycan Prokurorluğunun 90 illiyi ilə əlaqədar geniş kollegiya iclası keçirilmişdir.
Kollegiyanın işində iştirak edən Prezidentin İcra Aparatının hüquq mühafizə orqanları ilə iş şöbəsinin müdiri Fuad Ələsgərov peşə bayramı günü və 90 illik yubiley ilə əlaqədar dövlətimizin başçısı İlham Əliyevin təbrik məktubunu oxumuş, prokurorluğun fəaliyyətinin müasirləşdirilməsinə dair Dövlət proqramının təsdiq edilməsi barədə sərəncamlarını elan etmişdir.
Məruzə ilə çıxış edən baş prokuror Zakir Qaralov prokurorluq orqanlarının kollektivinə dövlət səviyyəsində göstərilən etimadın təzahürü kimi yubiley ərəfəsində bir qrup prokurorluq əməkdaşının yüksək dövlət mükafatlarına və ali xüsusi rütbələrə layiq görülməsini, prokurorluğun fəaliyyətinin müasirləşdirilməsinə dair Dövlət proqramının təsdiq olunmasını yüksək qiymətləndirmişdir.
Baş prokuror əmin olduğunu bildirmişdir ki, Azərbaycan Prokurorluğu bundan sonra da öz işini bu etimada layiq səviyyədə qurmaq üçün bütün mümkün və zəruri tədbirlərin görülməsini təmin edəcək, imkanlarını prokurorluğa həvalə olunmuş vəzifələrin layiqincə yerinə yetirilməsinə, dövlətçiliyimizin maraqlarının müdafiəsi işinə səfərbər edəcəkdir.
Diqqətə çatdırılmışdır ki, 90 illik tarixi ərzində mürəkkəb və şərəfli yol keçmiş Azərbaycan Prokurorluğunun dövlətçiliyimizin maraqlarına, insan hüquqlarının müdafiəsinə xidmət edən sivil və demokratik bir qurum kimi formalaşması, onun fəaliyyətinin hərtərəfli təminatı üçün qanunvericilik və maddi-sosial bazanın yaradılması ölkəmizdə həyata keçirilən möhtəşəm islahatların, o cümlədən məhkəmə-hüquq islahatlarının memarı kimi müstəqil dövlətçiliyimizin yaradıcısı Heydər Əliyevin dövlətçilik siyasəti, onun qayğısı və dəstəyi nəticəsində mümkün olmuşdur.
Xüsusi vurğulanmışdır ki, dövlətimizin hərtərəfli dəstəyi ilə həyata keçirilən islahatların nəticəsidir ki, bu gün Azərbaycan Prokurorluğu müasir standartlar səviyyəsində normativ hüquqi bazası, demokratik məzmunlu fəaliyyət prinsipləri və iş metodları olan sivil dövlət təsisatına çevrilmiş, şəffaf prosedurlar əsasında kadr tərkibi mütəmadi olaraq yenidən formalaşdırılan prokurorluğun kollektivinin və hər bir əməkdaşın məsuliyyət hissi artırılmış, qarşıda duran vəzifələrin yerinə yetirilməsini və nöqsanların dərhal aradan qaldırılmasını təmin edən nəzarət mexanizmi yaradılmışdır.
Daha sonra baş prokuror Zakir Qaralov “Prokurorluğun fəxri işçisi” döş nişanını, “Fəxri Fərmanı”, “Azərbaycan Respublikasının Prokurorluğunun 90 illiyi” yubiley xatirə medalı ilə təltif edilmiş bəzi əməkdaşlara həmin mükafatları, habelə vaxtından əvvəl və növbədənkənar verilmiş rütbələri təqdim etmişdir.
Baş Prokurorluqda, eyni zamanda, şəffaf prosedurlar əsasında cari ildə 7-ci dəfə keçirilən müsabiqə yolu ilə prokurorluğa yeni qəbul edilmiş 79 gənc mütəxəssisin andiçmə mərasimi keçirilmişdir.
Baş prokuror Zakir Qaralov bildirmişdir ki, bu gənclərin taleyinə qismət olan və prokurorluğun kadr korpusunun formalaşdırılmasının yeganə düzgün yolu kimi beynəlxalq standartlara uyğun prosedur əsasında işə qəbul edilmələri ölkəmizdə uğurla davam etdirilən hərtərəfli məhkəmə-hüquq islahatları nəticəsində mümkün olmuşdur. 2002-ci ildən başlayaraq builki müsabiqə də nəzərə alınmaqla keçirilən müsabiqələr nəticəsində işə qəbul edilmiş 293 gənc mütəxəssis hazırda prokurorluq işçilərinin ümumi sayının 32 faizini təşkil edir.
Prokurorluq işçiləri üçün çox əlamətdar hadisə olan bu tədbirin əhəmiyyətini xüsusi vurğulayan müsabiqə komissiyasının sədri, baş prokurorun müavini Namiq Əsgərov komissiyanın fəaliyyəti və müsabiqənin keçirilməsi ilə bağlı iclas iştirakçılarına ətraflı məlumat vermişdir.
Bundan sonra, stajor qismində prokuroruğa işə qəbul edilən şəxslər barəsində əmr elan olunmuşdur. İşə qəbul olunanlar Azərbaycan Respublikasının Dövlət bayrağı önündə təntənəli surətdə and içmişlər. Onlara Baş prokuror tərəfindən xidməti vəsiqələr təqdim olunmuşdur.
Yeni işçilər yüksək etimadı layiqincə doğruldacaqlarına söz vermişlər.
Baş prokuror Zakir Qaralov ilk dəfə prokurorluğa işə qəbul olunan gənc mütəxəssisləri təbrik etmiş, ümidvar olduğunu bildirmişdir ki, onlar öz fəaliyyətləri dövründə prokurorluq işçisi adının şərəfini yüksək tutacaq və bu adı həmişə qoruyacaqlar. Gənc işçilər bildirmişlər ki, stajorluq müddəti ərzində öz biliklərini daha da təkmilləşdirəcək, “Prokurorluq haqqında” Qanunda nəzərdə tutulmuş fəaliyyət istiqamətləri üzrə işi hərtərəfli öyrənəcək, yeni informasiya texnologiyalarından istifadə vərdişlərini daha da təkmilləşdirəcək, xarici dilləri mükəmməl mənimsəməyə səy göstərəcəklər.
Eyni zamanda, Baş Prokurorluğun Kadrlar idarəsinə gənc mütəxəssislərin stajorluq dövrü ərzindəki fəaliyyətlərinin mütəmadi nəzarətdə saxlanılması, bu işin düzgün təşkilinə görə tabe prokurorların məsuliyyətinin daha da artırılması üçün zəruri təşkilati tədbirlərin görülməsi barədə tapşırıqlar verilmişdir.
######
 |
 |
 |
Bölmənin digər xəbərləri
