AZƏRBAYCAN QADINLARININ III QURULTAYINA NÜMAYƏNDƏLƏR SEÇİLİR
AZƏRTAC xəbər verir ki, sentyabrın 5-də Azərbaycan qadınlarının III qurultayına hazırlıq çərçivəsində Xətai rayonu qadınlarının konfransı keçirilmişdir.
Konfransda qeyd edilmişdir ki, 1969-1982-ci illərdə Heydər Əliyevin Azərbaycana birinci rəhbərliyi dövründə ölkədə qadın hərəkatı genişlənmiş, onların problemlərinin həlli istiqamətində məqsədyönlü addımlar atılmışdır. 1993-cü ildə ulu öndərin yenidən hakimiyyətə qayıdışı Azərbaycan qadın hərəkatında böyük dönüş yaratmış, qadın problemlərinin həllinə dövlət səviyyəsində diqqət yetirilməyə başlanmışdır.
Tədbirdə rayon təşkilatının hesabatı dinlənilmişdir. Hesabatda bildirilmişdir ki, son illər qadınlar rayonun ictimai-siyasi həyatında fəal iştirak etmişlər. Hazırda rayonun bütün idarə və təşkilatlarında qadınlar yüksək səviyyədə təmsil olunurlar.
Konfransda Ailə, Qadın və Uşaq Problemləri üzrə Dövlət Komitəsi sədrinin müavini Aynur Sofiyeva və Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvü Rəna Mirzəzadə iştirak etmişlər.
Konfransda Azərbaycan qadınlarının III qurultayına nümayəndələr seçilmiş, Ağbirçəklər Şurası yaradılmışdır.
Bölmənin digər xəbərləri
