AZƏRBAYCAN REJİSSORUNUN YARADICILIĞINA HƏSR OLUNMUŞDUR
Aprelin 21-də İstanbulun Tarık Zəfər Tunaya konfrans salonunda Azərbaycanın əməkdar incəsənət xadimi, professor Tofiq İsmayılovun yaradıcılığına həsr olunmuş tədbir keçirilmişdir. İstanbul Böyük Şəhər Bələdiyyəsi Mədəniyyət departamentinin müdiri Şenol Dəmiröz, Moskvadakı Eyzenşteyn Kino Akademiyasının prezidenti Bulat Mansurov, Azərbaycan Mədəniyyət və İncəsənət Universitetinin rektoru Timurçin Əfəndiyev, respublikamızın İstanbuldakı baş konsulu Xeyrəddin Qoca, Türkiyənin məşhur kino və televiziya rejissoru Xəlid Rəfiq və başqaları çıxış edərək, Tofiq İsmayılovun yaradıcılığından danışdılar, İstanbulda türk dünyasının kino, teatr, opera günlərinin, Azərbaycan mədəniyyəti həftəsinin, şer və muğam gecələrinin keçirilməsində böyük əməyinin olduğunu vurğuladılar. Türkdilli xalqların mədəni əlaqələrinin inkişafı sahəsindəki fəaliyyətindən söhbət açan natiqlər onun üçcildlik “Türk xalqlarının kino tarixi” əsərini türkdilli xalqların kino sənəti tarixinin ensiklopediyası kimi qiymətləndirdilər.
Azərbaycan Mədəniyyət və İncəsənət Universitetinin rektoru Timurçin Əfərdiyev Tofiq İsmayılova bu təhsil ocağının fəxri doktoru diplomunu təqdim etdi.
İstanbul Bələdiyyəsi tərəfindən təşkil olunan “Türk dünyasının ulduzları: Azərbaycandan bir ziyalı - Tofiq İsmayılov” tədbiri bir həftə davam edəcəkdir. Həmyerlimizin yaradıcılığına həsr olunmuş sərgi nümayiş etdiriləcək, çəkdiyi filmlər göstəriləcəkdir.
Tural Rzayev
AZƏRTAC-ın xüsusi müxbiri
İstanbul
Bölmənin digər xəbərləri
